1 Ana Sulemanu kotoi ulinga wa̱ A̱a̱'isamapaɗa a̱ A̱sulazuva suru, reve u ta̱wa̱a̱ pe ni itana i na dada va̱ yi Da̱wuda tawai, reve u ta̱wa̱ na̱ zinariya na̱ azurufa na̱ suru itana yu ulinga u zuwa le a̱tsuma̱ asula e izuwa ya̱ A̱a̱'isamapaɗa a̱ A̱sula̱.

2 A̱vu Sulemanu zuwa mbara ma Isra'ila na azagbain o gundo, na azagbain a 'wa vu nkaya va aza a Isra'ila na oɓoloto uba̱ta̱ wa̱ a̱yi a̱tsuma̱ a̱ Urishelima, na a̱ ta̱wa̱ na Akpati a Nzuwulai A̱sulazuva diga a̱ lyuci va Da̱wuda za na a̱yi ɗa Sihiyona. 3 A̱vu a ama a Isra'ila oɓoloto uba̱ta̱ mogono Sulemanu a mantsa ma na a yuwan A̱buki o Ogodo o Ucuwusan o woto wa̱ cindere.

4 A mantsa ma na mbara ma Isra'ila n rawai suru, a̱vu nan Levi a tara Akpati a Nzuwulai'i. 5 A̱vu a̱ ta̱wa̱ na̱ niyi a̱tsuma̱ A̱a̱'isamapaɗa A̱sulazuva. Reve nan ganu na̱ nan Levi a tara Oogodo o Uga'asusan, oɓolo na̱ ntaɗa n na tawai na ri pe a̱tsuma̱ Oogodo'o, a̱vu a̱ ta̱wa̱ ne le a̱tsuma̱ A̱a̱'isamapaɗa a̱ A̱sulazuva. 6 Mogono Sulemanu oɓolo na ama a Isra'ila suru aza a na o ɓolotoi elime a Akpati a Nzuwulai A̱sulazuva, a̱vu a casu kucci vi ikyon ni inan ya̱ a̱bunda̱, na a gura kece le shi ko na a kurato le shi.

7 A̱vu nan ganu a̱ 'ya̱wa̱ na̱ Akpati a Nzuwulai a̱ A̱sulazuva'a pe pe Uba̱ta̱ u na u La'ai Akiza, reve a zuwai uba̱ta̱ wu nden ma̱ yi za̱la̱ ve evelu e ikerobobi e re o ndolo. 8 Evelu e ikerobobi'i na a̱ ba̱ruwa̱i a̱vu a̱ ɓa̱ru uba̱ta̱ u na a zuwai Akpati'i oɓolo na aɗanga na a tanusa le. 9 Aɗanga'a a̱da̱na̱ ta̱ uga'an lon, hali na va cinkaya le diga elime o uba̱ta̱ u na u ri na Akiza. Amma diga alanga va gura ene le shi, hali n gogo a buwa ta̱ pe. 10 Ili i ro i da̱na̱ pe a̱tsuma̱ Akpati'i shi, amma she aɓaci a atali e re aza a na Musa zuwai pe a̱tsuma̱ yi ɗe Horeb, uba̱ta̱ u na A̱sulazuva a yuwain nzuwulai na ama a Isra'ila a mantsa ma na o uta̱i a̱tsuma̱ e iɗa ya Masar.

11 Avu nan ganu o uta̱ pe diga uba̱ta̱ u na u ri na Akiza. Agba nan ganu a na o ɓolotoi suru o o'wo ta̱ ɗe na Akiza, ko na wo o'woi a̱da̱na̱ oɓolo oɓolo shi. 12 A̱vu nan Levi na a̱ da̱na̱i ashipi suru, Asaf na̱ Heman na̱ Yedutun oɓolo na̱ muwun nle ni imaci i le a̱vu oto a̱tugu a na a yuwain no okoro a sa'ani. Reve e isawan asana na̱ masa'a'a a lapusa nyangi ni ikumburu na̱ igaraya. Waru a̱da̱na̱ ta̱ na̱ nan ganu ukpaku nu ushin (120) aza a na e ivulusa̱ avana. 13 A̱vu a̱za̱ a̱ wivulu wa avana na ashipi a̱ 'ya̱sa̱n uɗyo u le una̱ta̱ a yuwusan ica nu ugodyusho uba̱ta̱ A̱sulazuva. Reve a canasa ishipa a mantsa ma na akapi'i e ivulusa̱ avana waru a lapusa nyangi na lapusai akapi e itana i tsuwe'e. Reve a cuwa A̱sulazuva ni ishipa i na ya dansa,

<<U tu ulobonu,

icigi ya̱ yi i ri nu ukotu shi.>>

A̱vu A̱a̱'isamapaɗa A̱sulazuva a shiwan ne eleshe. 14 Hali na nan ganu a gura yuwan ulinga u le shi, adama a na tsugbain tsa̱ A̱sulazuva a shiwan ta̱ a̱tsuma̱ A̱a̱'isamapaɗa a̱ A̱sula̱.