1 Ana Sulemanu kotoi a yuwusan avasa, a̱vu akina o uta̱ diga zuva a̱vu ukuloto kucci vu ukula̱tosu oɓolo na akapi a̱ kucci, a̱vu tsugbain tsa̱ A̱sulazuva tsa̱ shiton A̱a̱'isamapaɗa. 2 Nan ganu a gura uwa pe a̱tsuma̱ A̱a̱'isamapaɗa a̱ A̱sulazuva'a shi, adama a na tsugbain tsa̱ A̱sulazuva tsa̱ shiton ta̱ A̱a̱'isamapaɗa'a. 3 Ana aza a Isra'ila suru enei akina a̱ cipusa̱ oɓolo na̱ tsugbain tsa̱ A̱sulazuva zuva va̱ A̱a̱'isamapaɗa, a̱vu a̱ kingyo nu urewesu u le a̱ tyo e iɗa, reve a yuwan a̱ga̱nda̱ nu ugodyusho uba̱ta̱ wa̱ A̱sulazuva, adansa,

<<A̱sulazuva za vi isa'ani iɗa,

icigi ya̱ yi waru i tsu vadala shi hali hali.>>

4 A̱vu mogono oɓolo na akapi ama'a suru a ca kucci elime a̱ A̱sulazuva. 5 A̱vu mogono Sulemanu ca kucci vi inan ukpakukupa ushin ne ejere (22,000), ni ikyon na̱ mgbele ukpakukupa ukpaku nu ukpakukupa ushin (120,000). A̱vu mogono oɓolo na ama suru a yuwan ucasu wa̱ A̱a̱'isamapaɗa A̱sula̱. 6 A̱vu nan ganu e isawan uba̱ta̱ u na a zuwa nle, oɓolo na̱ nan Levi fo uba̱ta̱ u le uɓa̱nu ni itana yi ishipa ni itana i wivulu aza a na Mogono Da̱wuda foɓoi adama a na a lyuwa elime ni ishipa yu ugodyusho uba̱ta̱ wa̱ A̱sulazuva adansa, <<Icigi ya̱ A̱sulazuva i tsu vadala shi hali hali.>> A̱vu a yuwan ishipa yi ica ya̱ A̱sulazuva oɓolo ni itana yi ishipa ununa Da̱wuda damma nle. Upasu u na u ri ya̱ a̱ka̱nla̱ a nan Levi, a̱vu nan ganu e isawan e ivula̱ avana, a mantsa ma na ama Isra'ila suru a̱da̱na̱i mishin.

7 A̱vu mogono Sulemanu tawa memere mo ukowo elime a̱ A̱a̱'isamapaɗa a̱ A̱sulazuva, uba̱ta̱ u ɗaɗa u cayi kucci vu ukula̱tosu na abaji a mani'in a̱ kucci muwwulai, u yuwan ta̱ ne adama a na masa'a ma̱ rumushili na u yuwain u ka̱la̱ma̱ ta̱, u gura tara a̱bunda̱ a̱ kucci'i shi, na̱ za vi ishina na̱ za va abaji e iliyamunga.

8 Sulemanu zuwa ta̱ a yuwan rana cindere a yuwusan a̱buki. A̱vu ama a Isra'ila suru oɓoloto, a̱ba̱jini e iɓolo i ɗa lon. Waru ama a̱ ta̱wa̱ diga e iɗa ya alanga, diga o upasu u ma uwa ma Hamat wu ugana wi iɗa'a a̱ tyo o ukosu wu ka̱ri wi iɗa ya Masar wa̱ a̱livu. 9 O urana wa kunla̱ a̱vu a yuwan iɓolo i gbain, adama a na a yuwan ta̱ ɗe rana cindere a yuwusan a̱buki o ucasu u masa'a. Reve waru a̱da̱shi yuwisan rana cindere ro a yuwusan a̱buki. 10 A̱tsuma̱ o urana wu ushin na aza ata'atsu a̱tsuma̱ o woto wa̱ cindere, a̱vu u lyawa ama a̱ ka̱ra̱ a̱ tyo a 'wa le, a̱vu ama'a a̱ ka̱ra̱ na̱ ma̱za̱nga̱ na̱ mere a̱tsuma̱ okolo ele adama e isa'ani i na A̱sulazuva o rocoyi Da̱wuda na̱ Sulemanu, oɓolo na ama a̱yi Isra'ila.

11 Ne ɗa Sulemanu kotoi masuwa ma̱ A̱a̱'isamapaɗa a̱ A̱sulazuva oɓolo nu ukobu u mogono. Suru a̱tsuma̱ e ili i na Sulemanu foɓoi na wa yuwan a̱tsuma̱ A̱a̱'isamapaɗa A̱sulazuva oɓolo nu ukobu wa̱ yi u tsura̱ ta̱ ulyuwu we elime. 12 A̱vu A̱sulazuva a̱da̱shi rocowiso aciya̱yi uba̱ta̱ wa̱ Sulemanu na ayin u damma yi, <<Mu uwwa ta̱ avasa a̱ wu, waru n ɗangula ta̱ uba̱ta̱ u nda adama aciya̱va̱, na wo o'wo uba̱ta̱ u na a̱da̱na̱ a yuwusan mu kucci.

13 <<A mantsa ma na n ɓa̱ruyi zuva na aa yuwan mini shi, ko na̱ nlyungu na apapari a̱ lungusa̱ itana yu una, ko na̱ nlyungu mɓa̱la̱ a̱tsuma̱ ama a̱ va̱, 14 n na̱ ama a̱ va̱ na e ɗesu le na̱ aala a̱ va̱ a tara aciyele ili i ro shi, a̱vu a yuwan avasa a zami urewesu u va̱, a̱vu a vadala aa lyawa ure wi iwuya i le, n ta uwwa le diga ɗe zuva, a̱vu n yuwaan le gafura vu unusu u le, a̱vu waru n ca iɗa i le lafiya. 15 N ta zuwa esu e isa'ani i va̱ uba̱ta̱ u nda, waru n zuwa atsuvu avasa a na a yuwusan suru A̱a̱'isamapaɗa ma nda. 16 Adama a na n ɗangula ta̱ reve n tawa A̱a̱'isamapaɗa a nda tsura̱ Aala a̱ va̱ a̱tsura̱ tsugbain uba̱ta̱'a̱ hali hali. Esu a̱ va̱ no okolo a̱ va̱ a̱da̱na̱ uba̱ta̱'a̱ mantsa suru.

17 <<Amma adama aɗa a̱ wu gba, n na̱ vu yuwan mmalu elime a̱ va̱ cine Dada va wu Da̱wuda yuwain, a̱vu waru vu yuwan i li i na n damma nuwu suru, a̱vu vu yuwan tsutoni nu udammu u va̱ na̱ wila̱ u va̱, 18 to, n ta̱ shuwa̱ tsugono tsa̱ a̱ wu tsa lyuwa elime, ununa n yuwain Nzuwulai na̱ Da̱wuda dada va̱ wu na n dammai, <Vaa lamba nanza diga a̱tsuma̱ o ugundo wa̱ wu na a yuwan tsugono a aci aza a Isra'ila shi.>

19 <<Amma n na̱ i vadala a̱vu i lyawa tsutoni nu udammu u va̱ ni ili i na n zuwaa n ɗu, a̱vu i 'ya̱wa̱ i yuwaan musula̱ n ro a̱ga̱nda̱, 20 adama o ndolo n ta tawa Isra'ila diga a̱tsuma̱ e iɗa i va̱, za na n ca nɗu, a̱vu waru n 'yuwan A̱a̱'isamapaɗa a na n tawai adama Aala a̱ va̱. Reve mo o'woto yi ili i tsuzo'o ni ili ya adanshi e ekere a ama suru. 21 Ko na wo o'woi A̱a̱'isamapaɗa a nda wo o'wo ta̱ ili ya̱ a̱ka̱nla̱, a̱ tyo elime suru za na a̱ ka̱ra̱ lo ta damma, <Nye zuwai A̱sulazuva a yuwain tsundolo ni iɗa i nda? Oɓolo na̱ A̱a̱'isamapaɗa a̱yi?> 22 Ama a̱ta̱ usu le a̱vu a damma, <Adama a na a vadalaa ta̱ A̱sulazuva A̱sula̱ a nkaya nle za na uta̱ nle diga e iɗa ya Masar ucina̱. A̱vu avadala aa yuwusaan musula̱ n ro a̱ga̱nda̱. Adama o ndolo a ɗa A̱sulazuva a̱ ta̱wa̱yi na̱ a̱tsuma̱lima̱ aciyele.> >>