1 Yotam da̱na̱ ta̱ na a'wan ushin no ozo o ton a mantsa ma na wo o'woi mogono, u yuwan ta̱ tsugono tsa̱ Urishelima a'wan kupa na̱ a̱za̱ ta̱li. Aala mma va̱ a̱yi ɗa Yerusha usheli wa̱ Saduku. 2 Yotam yuwan ta̱ ili i na i ri mejege e ekere A̱sulazuva, cine dada va̱ a̱yi Uziya yuwain, gba u uwa A̱a̱'isamapaɗa a̱ A̱sulazuva tsa dada va̱ yi shi. Amma a̱vu ama a lyuwa elime ni iwuya i le. 3 Yotam suwisa ta̱ Una̱ntsu wa zuva wa̱ A̱a̱'isamapaɗa a̱ A̱sulazuva, u yuwan ta̱ linga icu'un icu'un o ukari u na u ri aagaɗi a Ofe. 4 Suru na̱ ne u suwa ta̱ ilyuci ya agaɗi a Yahuda, na̱ saa vu uga'an na atsura na ri a̱tsuma̱ a̱a̱rumbu.

5 A̱vu Yotam yuwan uvon na̱ mogono ma aza a Amon a̱vu u tsura̱ ulyuwu wa aci. Aa'wan o ndolo u zuwa ta̱ aza a Amon a tsupa utafa u azurufa na rawai kilo ukpakukupa uta'atsu nu ukpakuna̱shi (3,400) no oroci a yitabo ukpakukupa (1,000) na̱ yitabo ukpakukupa (1,000). Aza a Amon a̱ da̱shi ta̱ ta̱wa̱a̱ yi na̱ cu'un vu ukunzuwu uta̱ a'wan a̱ ire naa a'wan ata'atsu.

6 Yotam da̱na̱ ta̱ a̱da̱shishi ucira adama a na u yuwan ta̱ mmalu a̱tsuma̱ o ure u sa'ani a̱ ma̱ka̱ka̱n ma̱ A̱sulazuva a̱ A̱sula̱ a̱yi.

7 Akapi a linga tsugono tsa na Yotam yuwain, nu uvon u na u yuwain biti, naa akapi e ili i na u yuwain biti, a̱da̱na̱ ta̱ uɗanu a̱tsuma̱ a aatagada a alabari o ngono ma Isra'ila na̱ Yahuda. 8 U da̱na̱ ta̱ na̱ a'wan ushin no ozo o ton a mantsa ma na wo o'woi mogono, waru u yuwan ta̱ tsugono tsa̱ Urishelima a'wan kupa na̱ a̱za̱ a̱ ta̱li. 9 Yotam kuwa̱ ta̱ ucina nkaya ma̱ yi, a̱vu a̱ ciɗo yi a̱tsuma̱ a̱ Lyuci va̱ Da̱wuda. A̱vu Ahaz ulobo wa̱ yi wo o'wo mogono o una̱ wa̱ yi.