1 Mogono Sulemanu yuwan ta̱ masa'a ma̱ rumushili, za na uga'an wa̱ yi u rawai udasuwu mata'atsu, washin wa̱ yi waru udasuwu mata'atsu, mishin ma̱ yi waru udasuwu kupa no ozo o ton. 2 A̱vu u yuwan a̱ba̱jini o ura'atsu adama a na a zuwa mini za na u zuɗa̱i na̱ rumushili, za na e ɗesu Mala. A̱ru'un a̱yi a rawa ta̱ udasuwu ucindere na akapi, washin wa̱ yi waru udasuwu kupa no ozo o ton. Oɓolo na amunga a na a rawai udasuwu amunga no ozo o ton na a gura ka̱nda̱ruwa̱ una̱ wu ura'atsu'u. 3 Uka̱nda̱ruwu na̱ za̱la̱ vu ura'atsu'u u da̱na̱ ta̱ nu uzuɗu wu yo oroci e inan a̱ rumushili ugeru u re, uga'an wu yo oroci a nan suru u rawa ta̱ udasuwu kupa no ozo o ton, eɓele a̱ ta̱ a̱za̱ a̱ ta̱li eɓele a̱ ta̱ waru a̱za̱ a̱ ta̱li. A̱ jeruwe to ta̱ rumushili'i a̱vu a̱ zuɗa̱ yi uɓolu na̱ a̱ba̱jini o ura'atsu'u.

4 A zuwa ta̱ a̱ba̱jini o ura'atsu'u zuva vo oroci o ogono e inan kupa ne ejere. Urewesu wo ogono e ina'an a̱ da̱na̱ ta̱ a̱ ka̱lyuwusa̱ alanga. Urewesu wo ogono e inan ata'atsu a̱da̱na̱ ta̱ ka̱lyuwusa̱ upasu wa asana, aza a ta'atsu waru a̱a̱ ka̱lyuwusa̱ upasu wa̱ a̱livu, aza a ta'atsu waru a̱a̱ ka̱lyuwusa̱ upasu wu uyagi, aza ata'atsu waru a̱a̱ ka̱lyuwusa̱ upasu wu ugana. 5 Ugba̱mu wu nge'en wa̱ a̱ba̱jini o ura'atsu'u udasuwu u ta'atsu u ɗa, agba a̱ba̱jini o ura'atsu'u u ta gura tara a̱bunda̱ aakpatalutsu a̱ mini ukpakukupa kupota̱li (60,000). Una̱ wu ura'atsu'u urotsu ta̱ una̱ u mokkoto ko oroci a̱ yipa̱lu a na o ɓosoi.

6 A̱vu u yuwan a̱ba̱jini aakpatalutsu adama a na a̱da̱na̱ a yuwusan wuza̱'u, a̱vu u zuwa ozo o ton upasu wu uyagi, ozo o ton o ndolo waru upasu wu ugana. A̱ tsu eleleceshe ta̱ itana i na a yuwayin kucci vu ukula̱tosu ne le a̱tsuma̱ akpatalutsu'u. Amma a̱ba̱jini o ura'atsu a na a̱ tsu ɗe Mala, nan ganu ɗa goon a yuwan ulinga na̱ yi adama o usumbu.

7 A̱vu u yuwan wisawatan kupa a zinariya na a̱ guza̱ ifitila ununa o foɓoi. A̱vu waru u zuwa le pe a̱tsuma̱ A̱a̱'isamapaɗa, upasu wu uyagi u zuwa ta̱ ozo o ton, upasu wu ugana waru u zuwa ta̱ ɗe ozo o ton.

8 A̱vu waru u yuwan apada kupa na u zuwai pe a̱tsuma̱ a̱ A̱a̱'isamapaɗa. A̱vu u zuwa ozo o ton upasu wu uyagi, ozo o ton waru upasu wu ugana. A̱vu waru u yuwan a̱ba̱jini ara'atsu ukpaku a zinariya.

9 U yuwan ta̱ uba̱ta̱ a damma a nan ganu, oɓolo na̱ a̱ba̱jini o uba̱ta̱ u ro, oɓolo na̱ na̱ntsu na va uwa pe uba̱ta̱'a̱. Reve u sura na̱ntsu'u ni irumushili. 10 A̱vu u zuwa a̱ba̱jini o ura'atsu u na a̱ tsu ɗe Mala'a u pasu wu uyagi a̱ ka̱lyuwusa̱ asana a̱tsuma̱ a̱ A̱a̱'isamapaɗa.

11 Huram yuwan ta̱ mpondo, na̱ a̱ sheburu na̱ ntaɗa adama wu kyo'onusu. Ne ɗa Huram kotoi ulinga u na Mogono Sulemanu zuwa niyi u yuwan suru a̱tsuma̱ a̱ A̱a̱'isamapaɗa a̱ A̱sulazuva. 12 Apa ili i na u yuwain:

Atsura e re,

na̱ eegbezu aza a na a̱ kpa̱tu'wa̱i tsu ura'atsu zuva va atsura'a,

na̱ re e re na a kalai va akani zuva va̱ eegbezu na a̱ ri zuva va atsura'a,

13 ni yironishi yo oroci a̱ muwun mu ɗanga m peme ukpakuna̱shi (400), ugeru biti u da̱na̱ ta̱ nu ukpaku, nu ugeru u re zuva va atsura biti.

14 Waru u yuwan ta̱ wisawatan na̱ a̱bunda̱, wisawatan suru na aakpatalutsu a̱yi,

15 na̱ Mala ma̱ ta̱ adama a na a̱ tsu mini, no oroci ogono e inan kupa ne ejere aza na a̱ guzusa̱ a̱ba̱jini o ura'atsu'u.

16 Na̱ npondo ni isheburu ni ikune ya akatsu adama o ulinga wi inama.

Suru itana i na Huram Abi yuwayin Mogono Sulemanu adama A̱a̱'isamapaɗa a̱ A̱sulazuva u yuwan ta̱ ulinga ni irumushili na o gboroi. 17 Agalaci a na a̱ da̱na̱i zuzu nu upasu wu Uɗolu wa̱ Urudu, memere ma Sukot na̱ Zereda, Mogono ma zuwa ta̱ na a̱ tsu pe irumu i na a̱ ejejeruwetoyi a̱tsuma̱ olo'o a na o foɓoi adama a na a̱ zuɗa̱ itana'a. 18 Sulemanu yuwan ta̱ itana lon hali na a gura reve a̱bunda̱ o ume wi irumushili'i shi.

19 Sulemanu yuwan ta̱ suru itana i na a zuwai a̱tsuma̱ A̱a̱'isamapaɗa a̱ A̱sula̱,

masa'a ma zinariya

na apada e izuwa yo opopofu na a tawai,

20 Na̱ wisawatan na a̱ guza̱ ifitila suru i zinariya can adama a na a ca ekan uba̱ta̱ u na u La'ai Akiza ununa u na u foɓoi.

21 Na̱ wukalu u yironishi i yipa̱lu i zinariya ni ifitila ni ili i na e kene akinkina akina aza na a yuwain na̱ zinariya can,

22 Ni ili i na a̱ kimusa̱ ifitila na̱ a̱ba̱jini ara'atsu na̱ mupondo na̱ ntaɗa n na a̱ guza̱ ili i ma̱guru za na a yuwain na̱ zinariya can nu uwata wa̱ A̱a̱'isamapaɗa A̱sulazuva, nu una̱ntsu wu uba̱ta̱ wa akiza nu una̱ntsu vu uba̱ta̱ u na u La'ai Akiza, oɓolo na̱ za va asula a A̱a̱'isamapaɗa A̱sulazuva, aza a na a surai na̱ zinariya can.