1 Ana Yehoshafat kuwa̱i, a̱vu a̱ ciɗo a̱yi a̱tsuma̱ a̱ Lyuci va̱ Da̱wuda. A̱vu ulobo wa̱ yi Jehoram o'wo mogono o una̱ wa̱ a̱yi.

2 Yehoram ulobo wa Yehoshafat da̱na̱ ta̱ na̱ muwun ma̱ a̱na̱wun mo o olobo a̱ ta̱li. Ele ɗa: Azariya na̱ Yehiye na̱ Zakariya na̱ Azariyahu na̱ Mikaye na̱ Shefatiya. Suru nle olobo a Yehoshafat ɗa mogono ma Isra'ila. 3 Dada le Yehoshafat ca le ta̱ ne'e va̱ a̱bunda̱ u azurufa na̱ zinariya ni itana i na i ri ulobonu ni ilyuci i na i ri na̱ kari vu ucira a̱tsuma̱ a Yahuda. Amma u ca ta̱ tsugono tsa̱ a̱yi e ekere a Jehoram adama a na a̱yi ɗa mawun mo ufaru.

4 A mantsa ma na Jehoram enei tsugono tsa̱ a̱yi tsa̱ shuwa̱ ta̱, reve wu una a̱za̱ a̱yi oɓolo na azagbain o ro a Isra'ila. 5 Jehoram da̱na̱ ta̱ na a'wan mata'atsu ne ejere na wo o'woi mogono, U yuwan ta̱ tsugono tsa a'wan kunla̱ a̱tsuma̱ a̱ Urishelima. 6 U yuwan ta̱ mmalu ma̱ a̱yi cine ngono ma Isra'ila n yuwain, u yuwan ta̱ iwuya e ekere A̱sulazuva cine Ahabu yuwain. U yuwan ta̱ ne adama a na ka va̱ yi usheli wa Ahabu Mogono ma Isra'ila ɗa. 7 Suru na̱ ne, adama a nzuwulai n na A̱sulazuva a yuwain na̱ Da̱wuda, A̱sulazuva a ciga na wo o kototo u'wa wa̱ Da̱wuda shi. U yuwan ta̱ nzuwulai wa lamba za na a yuwan tsugono a̱tsuma̱ a limatan va̱ a̱yi hali hali shi.

8 A mantsa mo tsugono tsa̱ Yehoram, a̱vu a ama a Edom a̱ 'ya̱sa̱a̱n tsugono tsa Yahuda a aci, a̱vu a katala aciyele mogono. 9 A̱vu Jehoram ka̱ra̱ a̱ tyo Edom, a̱yi na̱ a̱soja a̱yi ni ikeke yi ido ya̱ a̱yi. A̱vu a̱za̱ a̱ Edom a kandarai oɓolo na̱ nan yali yi ikeke yi ido ya̱ a̱yi, amma a̱vu a̱ 'yon na ayin a suma a la'a. 10 Diga lo hali acina a na'an a̱za̱ a̱ Edom a̱ ta̱ 'ya̱susa̱a̱n tsugono tsa Yahuda a aci.

A mantsa mo o ndolo ma ɗa fo lyuci va Libina yuwain ne, tsundolo fara ta̱ adama a na Yehoram vadalayi A̱sulazuva A̱sula̱ a nkaya nle ucina̱. 11 Yehoram suwa ta̱ ba̱ta̱ va̱ a̱ga̱nda̱ agaɗi a Yahuda na u zuwai nda̱na̱ta̱ ma̱ Urishelima n yuwain ulambu wa̱ a̱ɓula̱, a̱vu a yuwan tsushakala uba̱ta̱ u mayan ma̱ a̱ga̱nda̱ uba̱ta̱ u musula̱, waru u zuwa aza a Yahuda a lyawa ure wa̱ A̱sulazuva.

12 A̱vu vumava̱sula̱ Iliya ɗanaa Yehoram mepepelime u damma: <<Apa ili i na A̱sulazuva A̱sula̱ a dada va̱ wu Da̱wuda, dammai: <Vu yuwan mmalu a̱tsuma̱ o ure u va̱ cine dada va̱ wu Yehoshafat yuwain, ko cine Asa Mogono ma Yahuda ma yuwain shi. 13 Amma vu yuwan ta̱ mmalu a̱tsuma̱ o ure wu ngono ma Isra'ila, a̱vu vu zuwa ama a Urishelima na̱ nda̱na̱ta̱ ma Yahuda e teme ulambu wa̱ a̱ɓula̱ cine u'wa wa Ahabu u zuwai Isra'ila yuwayin A̱sulazuva ulambu wa̱ a̱ɓula̱. Reve fo vu una a̱za̱ a̱ wu aza a na i ri dada ta̱, aza a na ala'a nuwu a̱ɓula̱. 14 Agba gogo, a̱mu A̱sulazuva n ta̱ lyungu na addama o usuɗuwu e ekere ama wu no olobo a̱ wu na̱ a̱ma̱ci a̱ wu ni ili i na vu ri na̱ yi suru. 15 Agba a̱vu gba vu ta̱ reme mɓa̱la̱ n tsishi n wuya, za na a̱da̱na̱ a tamusa wu urana suru, hali she ni itana ya̱ a̱tsuma̱ ya̱ wu o uta̱ alanga.> >>

16 A̱vu A̱sulazuva a̱ 'ya̱sa̱n upan wa aza a Filistiya na̱ Araba aza a na a̱ ri nden zuzu na̱ Kush a aci o Mogono Jehoram. 17 A̱vu iɗa i ndolo a̱ ta̱wa̱ a̱ riya̱a̱ Yahuda nu uvon, a̱vu a̱ pura̱ itana i sa'ani i na a cinai o u'wa u mogono suru, oɓolo na̱ olobo a̱yi na̱ a̱ma̱ci a̱yi. Za na lyawai goon a̱yi ɗa Ahaziya ulobo wu ukosu.

18 Ana ili nda i kotoi suru, a̱vu A̱sulazuva a lapa yi na̱ mɓa̱la̱ n tsishi za na ri na̱ a̱guma̱ shi. 19 Ele lo, na yuwain a'wan e re, a̱vu itana ya̱ a̱tsuma̱ ya Yehoram o uta̱ alanga adama o usa̱n wu mɓa̱la̱, reve u kuwa̱ a̱tsuma̱ o usa̱n lon. Ama a̱yi agba a 'yuwan ta na a zuwaa yi akina a̱ tsugbain, cine a yuwayin nkaya ma̱ yi. 20 Yehoram da̱na̱ ta̱ na̱ a'wan mata'atsu ne ejere na wo o'woi mogono, waru u yuwan ta̱ tsugono a'wan kunla̱ a̱tsuma̱ a̱ Urishelima. Waru babu za na la̱nga̱i a̱tsuma̱ nu ukwisa̱ wa̱ yi. A̱vu a̱ ciɗo yi a̱tsuma̱ a̱ Lyuci va̱ Da̱wuda, agba a ciɗo yi ason ngono shi.