1 Mogono Josiya yuwan ta̱ A̱buki a Mapasa adama A̱sulazuva a̱tsuma̱ a̱ Urishelima, a̱vu a paɗa ikyon adama A̱buki a Mapasa a̱tsuma̱ o urana wa kupa na̱ a̱za̱ a̱ na̱shi u woto wu ufaru. 2 Josiya zuwa ta̱ nan ganu na a yuwan ulinga ule, a̱vu waru u cuɗuwa le na a yuwan ulinga a̱tsuma̱ A̱a̱'isamapaɗa A̱sulazuva ulobonu. 3 A̱vu u damma nan Levi, aza a na o uritosu aza a Isra'ila, waru aza na a tawai na akiza adama A̱sulazuva, <<I zuwa Akpati a Nzuwulai a̱tsuma̱ a̱ A̱a̱'isamapaɗa na mogono Sulemanu ulobo wa̱ Da̱wuda mogono ma Isra'ila suwai a̱tsuma̱ Isra'ila. Wa̱a̱ da̱na̱ ulobonu na ya̱a̱ da̱na̱ a tanusu yi e lyungu shi. Gogo yuwaan yi A̱sulazuva A̱sula̱ a̱ɗu a̱ga̱nda̱ oɓolo na ama a̱ɗu aza a Isra'ila. 4 I foɓo aciya̱ɗu o una̱ wu 'wa oɓolo oɓolo, cine a ɗanai e ekere o udammu u mogono Da̱wuda va Isra'ila nu ulobo wa̱ yi Sulemanu.

5 <<A̱vu yi isawan uba̱ta̱ wa akiza, oɓolo na̱ nan Levi na a kamba ugundo u na wa̱ ta̱wa̱a̱ na̱ kucci le a̱tsuma̱ A̱a̱'isamapaɗa. 6 A̱vu i paɗa ikyon adama A̱buki a Mapasa, a̱vu i tawa aciya̱ɗu i foɓo ikyon adama a̱za̱ a̱ɗu, a yuwusan ununa A̱sulazuva a dammai o una̱ wa Musa.>>

7 Josiya ca ta̱ ikambishi ya̱ a̱yi diga a̱tsuma̱ o oɓolo e ikyon na̱ mgbele ma̱ a̱yi ukpaku mata'atsu (30,000), adama a̱ kucci va̱ A̱buki a Mapasa. Oɓolo no ogono e ina ukpakukupa uta'atsu (3,000) diga o utsuru u mogono.

8 Waru azagbain a̱yi fo a ca ta̱ une'e u le nu ucigu wo okolo a̱ tyo e ekere ama oɓolo na̱ nan ganu na̱ nan Levi. Hilikiya na̱ Zakariya na̱ Jehiyel aza a na a tsu idanusan A̱a̱'isamapaɗa A̱sulazuva, a ca ta̱ nan ganu ikyon ukpakukupa ure nu ukpaku uta̱li (2,600) adama a na a yuwan A̱buki a Mapasa, ni inan ukpaku uta'atsu (300). 9 A̱vu Konaniya oɓolo na̱ Shemaya na̱ Netane mawun ma̱ a̱na̱wun ma̱ a̱yi, na̱ Hashabiya na̱ Jeyiye na̱ Jozaba azagbain a nan Levi a ca ta̱ ikyon ukpakukupa uton (5,000) adama a̱ A̱buki a Mapasa, ni inan ukpakuton (500) adama a nan Levi.

10 A mantsa ma na o foɓoi ili suru adama a na a yuwan A̱buki a Mapasa'a, a̱vu nan ganu e isawan uba̱ta̱ ule, reve nan Levi e isawan oɓolo oɓolo cine mogono ma dammai. 11 A̱vu a paɗa ikyon ya̱ A̱buki a̱ Mapasa'a, reve nan ganu o kyo'onu mpasa n na a ca nle, a̱vu nan Levi a̱da̱na̱ amunusa inama'a. 12 A̱vu a tawa kucci vu ukula̱tosu'u adama a na e ne'eshen ama cine e ne'eshen nle oɓolo oɓolo o una̱ wu 'wa vu nkaya nle, adama a na a ca A̱sulazuva, cine u ri uɗanu a̱tsuma̱ aatagada a Musa. Ne ɗa fo a yuwain ni inan. 13 Reve nan Levi azatsu inama ya̱ A̱buki a Mapasa'a cine a damma nle a yuwan. A̱vu a aralu kucci na ri na akiza a̱tsuma̱ o pondo na̱ npondo mgbain mgbain na akwanu, reve a̱ jika̱ a̱ delyo wa ama suru. 14 Ana a yuwain ne o kotoi, a̱vu nan Levi a yuwan ifoɓi adama aciyele na adama a nan ganu, adama a na nan ganu ugundo wa Haruna a̱ da̱na̱ ta̱ a casu kucci vu ukula̱tosu nu upasu wa abaji a mani'in hali ayin. A̱vu nan Levi a yuwan ifoɓi adama aciyele na adama a nan ganu olobo a Haruna.

15 Aza a na a yuwusan ishipa diga o ugundo wa Asaf, a̱da̱na̱ lo uba̱ta̱ u na a zuwa nle ununa Da̱wuda dammai. Asaf na̱ Heman na̱ Yedutun a̱za̱ a̱ yindi o mogono. Aza na a yuwusan ipiri yu una̱ntsu wa̱ A̱a̱'isamapaɗa A̱sulazuva a lyawa uba̱ta̱ wu ulinga u le shi, adama a na a̱za̱ e le nan Levi o foɓoo le ta̱ fo.

16 A̱tsuma̱ o urana ndolo ili i na wuntsayi a yuwan biti a yuwain ta̱ adama a̱ga̱nda̱ A̱sulazuva. A yuwan ta̱ A̱buki a Mapasa, a̱vu a ca kucci vu kucci vu ukula̱tosu u le zuva Masa'a ma̱ A̱sulazuva cine mogono Josiya dammai a yuwan. 17 Suru aza a Isra'ila a na a̱ da̱na̱i lo uba̱ta̱'a̱ a yuwan ta̱ A̱buki a Mapasa a̱tsuma̱ a mantsa'a, oɓolo na̱ opopofu a na a̱ ri na̱ wolilo shi hali acina arana cindere. 18 Ɗee nu ufaru a mantsa ma vumava̱sula̱ Sama'ila Koto ofoɓo cu'un va̱ A̱buki a Mapasa tsundolo shi. Waru babu mogono ma na maa yuwain cu'un va̱ a̱ A̱buki a Mapasa cine Josiya yuwain na̱ nan ganu na̱ nan Levi na aza a Yahuda suru na̱ Isra'ila aza a na a̱da̱na̱i lo oɓolo na̱ a̱za̱ a̱ Urishelima. 19 A̱tsuma̱ a'wan a kupa na̱ kunla̱ o tsugono tsa Josiya ɗa a yuwain A̱buki a Mapasa'a.

20 Ana a yuwain tsundolo suru, a mantsa ma na Josiya kotoi ulapulu wa̱ A̱a̱'isamapaɗa A̱sulazuva, a̱vu mogono Neko va Masar ta̱wa̱a̱ nu uvon a̱tsuma̱ a Karkemi wu upasu wa̱ Yufiriti. A̱vu Josiya uta̱ adama a na wa yuwan uvon na̱ a̱yi. 21 Amma a̱vu mogono Neko lyunguwa̱a̱ yi na̱ nlingata a damma yi, <<Nla̱ngi n ne ɗa n ri ekere a̱ va̱ na̱ a̱vu, a̱vu mogono ma Yahuda? A̱vu ɗa ma zama n riya̱a̱ nu uvon a mantsa ma nda shi, amma u'wa u na ma yuwusan uvon na̱ a̱yi. Waru A̱sula̱ a damma ta̱ n jika̱, to, adama o ndolo vu lyawa tsushu'un na̱ A̱sula̱ za na ri oɓolo na̱ a̱mu, ko gba shi u kototo wu.>>

22 Amma suru na̱ ne Josiya vadala u lyuwa yi shi, a̱vu u pusa̱n iroci ya̱ yi u uwa uvon adama she e revei wan. U 'yuwan ta̱ na wa uwwa ili i na Neko damma niyi o una̱ wi ili i na A̱sulazuva a dammai, reve u ka̱ra̱ na wa yuwan uvon na̱ a̱yi agalaci a̱ Megido.

23 A̱tsuma̱ a ali o uvon wa aza a Masar a tawan ta̱ Mogono Josiya. A̱vu u damma a̱soja a̱yi, <<U ta̱ numu diga pa, adama a na amaton mu ta̱ lon!>> 24 A̱vu a tarai o uta̱ yi pe a̱tsuma̱ keke vi ido ya̱ yi, reve a zuwai e keke ro na u ri na̱ a̱yi a̱vu a̱ tyo na̱ yi Urishelima, uba̱ta̱ u na u kuwa̱i. A̱vu gba a̱ ciɗo yi uba̱ta̱ u na a̱ ciɗoi nkaya ma̱ yi. A̱vu aza a Yahuda na̱ Urishelima a yuwan nden n wirota̱ adama a̱ Josiya.

25 Irimiya ɓatsa ta̱ ishipa ya̱a̱ a̱tsumola̱ngu adama a̱ Josiya, za na hali acina a na'an ali na̱ a̱ma̱ci suru a canasa a cuwan na̱ Josiya a̱tsuma̱ a̱tsuma̱la̱ngu. A̱yi nda wo o'wo ta̱ ili i na aza a Isra'ila a̱ ri kurusu waru a ɗanai ta̱ a̱tsuma̱ a̱tsuma̱la̱ngu.

26 Akapi o ulinga u tsugono tsa a na Josiya yuwain, nu ulinga wa̱ a̱ɓula̱ na u yuwain, ununa u ri uɗanu a̱tsuma̱ a̱ wila̱ wa̱ A̱sulazuva, 27 nu ulinga u na u yuwain suru diga o ufaru hali acina ukosu, a̱da̱na̱ ta̱ pe uɗanu a̱tsuma̱ aatagada o ngono ma aza a Isra'ila na aza a Yahuda.