1 A̱vu Abija kuwa̱ ucina nkaya ma̱ yi reve a̱ ciɗo yi a̱ Lyuci va̱ Da̱wuda. A̱vu ulobo wa̱ yi Asa wo o'wo mogono o una̱ wa̱ yi. A̱vu lyuci'i u tsura̱ nden n lafiya hali acina a'wan kupa.

2 Asa gba yuwan ta̱ ili i na i ri mejege uba̱ta̱ wa̱ A̱sulazuva A̱sula̱ a̱yi. 3 A̱vu u tawa Masa'a ma̱ musula̱ na̱ ba̱ta̱ va̱ a̱ga̱nda̱. A̱vu u kototo atali a na a yuwusaan a̱ga̱nda̱, a̱vu waru u gagasa a̱shuwutsu a Ashera. 4 Asa damma ta̱ ama a Yahuda na a zami A̱sulazuva A̱sula̱ a nkaya nle, a̱vu waru a yuwan tsutoni nu uritosu wa̱ a̱yi nu udammu wa̱ a̱yi. 5 A̱vu waru u kototo suru ba̱ta̱ va̱ a̱ga̱nda̱, na̱ Masa'a ma na a yuwusan ukula̱tosu wi ili ma̱guru suru uba̱ta̱ a̱tsuma̱ lyuci va Yahuda. A̱tsuma̱ a'wan o tsugono tsa Asa a̱ a̱tsura̱ ta̱ nden n lafiya. 6 A̱vu u lapula ilyuci i na i ri nu ukari vu ucira ya Yahuda, adama a na lyuci'i u da̱na̱ta̱ na̱ nden n lafiya. Agba waru babu za na yuwain uvon ne ele a̱tsuma̱ a'wa'an, adama a na A̱sulazuva a ca yi ta̱ asuvu nden.

7 A̱vu Asa damma ama a Yahuda, <<Lyawa na tsa̱ da̱shi suwisa ilyuci a̱vu tsu ka̱nda̱ruwa̱i na̱ kari na atsura na a̱ ri uga'an na̱ na̱ntsu ni irumu. Iɗa i nda za tsu ɗa hali n gogo, adama a na tsu zami ta̱ A̱sulazuva A̱sula̱ a̱tsu. Tsu toniyi ta̱, a̱vu waru u ca tsu asuvu nden uba̱ta̱ suru.>> Avu a yuwusan usa, nu utsuru wu lyuwu we elime.

8 Mogono Asa da̱na̱ ta̱ na̱ a̱soja ukpakukupa ukpakuta'atsu (300,000) aza a na a gurai uvon lon diga o ugundo wa Yahuda, suru nle a̱da̱na̱ ta̱ uguzu na̱ a̱ra̱ga̱ ni ibata. Agba waru u da̱na̱ ta̱ na̱ a̱soja ukpakukupa ukpakure na̱ kupakunla̱ (280,000) aza a na a gurai uvon lon diga o ugundo wa Banyami, suru nle a̱ ta̱ uguzu na̱ a̱ra̱ga̱ na̱ tan.

9 Zera vuma va Kush ta̱wa̱ ta̱ nu uvon na̱ a̱soja na a yuwain ukpakukupa udoɓonuwu ni ikeke yi ido ukpaku uta'atsu (300). A̱vu u rawa Maresha na wa yuwan uvon ne ele. 10 Adama o ndolo, a̱vu Asa uta̱ a̱vu a dara adama o uvon a Zefata zuzu na̱ Maresha.

11 A̱vu Asa yuwan mesun a̱ tyo uba̱ta̱ wa̱ A̱sulazuva A̱sula̱ a̱yi, u damma, <<A̱vu A̱sulazuva A̱sula̱ a̱tsu, babu za na ri nu ucira tsa̱ wu, za na a kamba za na ri nu ucira shi e ekere aza a na a̱ ri nu ucira. Vu kamba a̱tsu, a̱vu A̱sulazuva A̱sula̱ a̱tsu, adama a na tsu zuwa ta̱ ucira u tsu ya̱ wu! A̱vu A̱sulazuva, a̱tsuma̱ aala a̱ wu a ɗa tsu ta̱wa̱i na tsa yuwan uvon na̱ a̱soja a nda. A̱vu A̱sulazuva, a̱vu ɗa A̱sula̱ a̱tsu! She vu lyawa nanza la'a ucira wa̱ wu wan.>>

12 A̱sulazuva gba o kototo ta̱ a̱soja a̱ Kush elime o mogono Asa na̱ a̱soja a Yahuda, reve a̱za̱ a̱ Kush a suma. 13 A̱vu Asa na̱ a̱soja a̱yi o toni le hali a̱ tyo Gera. A̱vu a̱ ka̱ra̱ a̱ mo una ma̱ a̱soja a̱ Kush hali a gura oɓoloto na a lyuwa elime nu u uvon waru shi, adama a na A̱sulazuva a ɗa na̱ a̱soja a̱yi a yuwain uvon ne ele. A̱soja a Yahuda gba a usa ta̱ itana na̱ a̱bunda̱ e ekere a̱ a̱soja a̱ Kush. 14 A̱vu o kototo ilyuci i na i ri yu uka̱nda̱ruwu na̱ Gera, a̱vu a usa itana i le, adama a na A̱sulazuva a zuwa ta̱ ɗe wovon u guza̱ ama a̱ Kush. Adama a na a̱da̱na̱ ta̱ ni itana i sa'ani ya̱ a̱bunda̱. 15 A̱vu a̱ riya̱a̱ va̱la̱ta̱ va aza a aguɓa e iliyamunga, a̱vu a usa inan i le na̱ mgbele nle na̱ arakumi e le na̱ a̱bunda̱. Reve a̱ ka̱mba̱ Urishelima.