1 Mogono Yehoshafat va Yahuda da̱na̱ ta̱ nu utsuru lon na̱ tsugbain. Agba u da̱na̱ ta̱ a muwwulai na̱ mogono Ahabu va Isra'ila na u zuwai ulobo wa̱ yi u zuwai usheli wa Ahabu. 2 Ana a yuwain a'wan wa'a a̱vu Yehoshafat ka̱ra̱ a̱ tyo Samariya a Isra'ila na we ene mogono Ahabu. A̱vu Ahabu yuwan a̱buki wu paɗa ikyon ni inan ya̱ a̱bunda̱ adama a na wa ca Yehoshafat tsugbain na ama a̱yi. A̱vu Ahabu kpara Yehoshafat na wo oɓolo a aci na̱ yi na a̱ 'ya̱wa̱a̱ Ramot Giliyadu nu uvon. 3 A̱vu mogono Ahabu va Isra'ila damma mogono Yehoshafat va Yahuda, <<Ko vu ta̱ ta̱wa̱ oɓolo na̱ a̱mu na tsa yuwan uvon na̱ Ramot Giliyadu?>>

A̱vu mogono Yehoshafat usu u damma, <<N tu ufoɓu tsu wala. Ili yi lo shi, a̱soja a̱ va̱ a̱za̱ a̱ wu ɗa fo. Tsu ta̱ 'ya̱wa̱ uvon oɓolo na̱ a̱vu.>> 4 Amma a̱vu Yehoshafat damma mogono ma Isra'ila, <<Tsu zami urewesu wa̱ A̱sulazuva ne'e.>>

5 A̱vu mogono Ahabu va Isra'ila ɓoloto ama̱sula̱ ukpaku una̱shi (400) a̱vu we ece ele, <<Tsu ka̱ra̱ tsu riya̱a̱ Ramot Giliyadu nu uvon, ko tsu lyawa?>>

A̱vu a̱ usu suru nle a damma, <<Wuma wa̱ wu u jima, mogono! Vu ka̱ra̱, adama a na A̱sula̱ ta ca le e ekere a̱ wu!>>

6 Amma a̱vu Yehoshafat da̱shi dammisa, <<Babu vumava̱sula̱ va̱ A̱sulazuva na tsa̱ da̱shi yuwan yeci?>>

7 A̱vu mogono Ahabu va Isra'ila usu u damma, <<A̱ ta̱ tsura̱ vuma ta̱ na tsa zami urewesu wa̱ A̱sulazuva uba̱ta̱ wa̱ a̱yi, aala a̱yi ɗa Mikaya ulobo wa Imla. Amma gba n 'yuwan ta̱ mpasa ma̱ a̱yi adama a na u tsu ca udammu u sa'ani aciya̱va̱ shi, she iwuya goon.>>

A̱vu Yehoshafat damma, <<O'o Mogono she vu yuwan adanshi tsundolo wan!>>

8 A̱vu mogono Ahabu va Isra'ila ɗe za ro a̱tsuma̱ a̱soja a̱yi u damma, <<Vu jika̱ na va̱ ta̱wa̱ na̱ Mikaya ulobo wa Imla pa nda.>> 9 A̱vu mogono Ahabu va Isra'ila na̱ mogono Yehoshafat va Yahuda oto a̱tugu o tsugono, a̱vu a̱ da̱nu o otogu zuzu no osoroto a na a̱ ri zuzu nu una̱ntsu wa Samariya. A̱vu ama̱sula̱ suru a̱tsuma̱ e iɗa'a a yuwusan adanshi e ikaka elime ele. 10 Za ta̱ a̱tsuma̱ ele, Zedekiya ulobo wa Kena'ana, a̱vu u yuwan avana a̱rumu, u damma, <<A̱sulazuva a damma, <Na avana a nda a ɗa va sapa aza a Suriya hali o kototo le.> >>

11 A̱vu akapi ama̱sula̱ a̱ A̱sulazuva suru a ca udammu uta̱, adansa, <<Vu riya̱a̱ Ramot Giliyadu vu ta̱ tsura̱ ulyuwu wa a aci,>> A̱vu a damma, <<A̱sulazuva a ta ca le e ekere a̱ wu.>>

12 Malingata ma na a̱ lyunguyi na we ɗe Mikaya a̱vu u damma yi, << Ama̱sula̱ a̱ A̱sulazuva suru a yuwaan ta̱ ɗe mogono udammu u na wa̱ tsura̱ ulyuwu we elime. Adama o ndolo lyawa a̱vu fo vu yuwan ne, vu yuwan adanshi a na wo yo'onoto mogono okolo.>>

13 Amma a̱vu Mikaya usu u damma, <<N kucina ta̱ na̱ A̱sulazuva a na a̱ ri wuma, n ta damma ili i na A̱sula̱ a dammai n damma goon.>>

14 A mantsa ma na u rawai elime o mogono Ahabu, a̱vu mogono me ece yi, <<Mikaya, tsu ka̱ra̱ adama na tsa yuwan uvon na̱ Ramot Giliyadu, ko n lyawa?>>

A̱vu Mikaya usu yi u damma, <<Vu riya̱a̱ le vu ta̱ tsura̱ ulyuwu wa aci, adama a na a ta ca wu le e ekere a̱ wu.>>

15 Amma a̱vu mogono ma̱ usu yi, <<Hali uyan ɗa maa zuwa wu na va kucinaa a̱mu na va damma mu ili i ro wan na ka̱ra̱i amayun a̱tsuma̱ a ala a̱ A̱sulazuva?>>

16 A̱vu Mikaya usu u damma, <<Me ene ta̱ aza a Isra'ila suru ubetu'wu zuva vu nsasan va damma ikyon i na a̱ ri na̱ za va aguɓa shi. A̱vu A̱sulazuva a damma, <Ele nda a̱ ri na̱ zagbain shi, lyawa za suru ka̱mba̱ o u'wa wa̱ a̱yi na asuvu nden.> >>

17 A̱vu mogono ma Isra'ila ma damma Yehoshafat, <<Ashe n damma a̱ wu shi? A̱yi wa yuwan adanshi a sa'ani adama aciya̱va̱ shi, she iwuya shi?>>

18 A̱vu Mikaya damma, <<Gogo, vu uwwa adanshi A̱sulazuva. Me ene'e ta̱ A̱sulazuva nden ootogu o tsugono tsa a̱yi oɓolo na̱ a̱soja a zuva suru lo mishin o ukere u sa'ani nu ugula̱ wa̱ a̱yi. 19 A̱vu A̱sulazuva a damma, <Zane ɗa ri lo na 'ya̱wa̱ u luluma̱ Ahabu mogono ma aza a Isra'ila na wa̱ 'ya̱wa̱ nu uvon adama a na wa̱ kuwa̱ a̱tsuma̱ e iɗa ya Ramot Giliyadu?>

<<Reve a̱ ta̱wusa̱a̱ na̱ a̱sa̱la̱ icu'un icu'un. 20 O ukosu a̱vu ruhu ro uta̱ a̱vu wi isawan mishin elime a̱ A̱sulazuva u damma, <N ta̱ luluma̱ yi.>

<< A̱vu A̱sulazuva a̱ usu yi u damma, <Cine tsu ɗa va gura?>

21 <<A̱vu ruhu'u u damma yi, <N ta̱ ka̱ra̱ na mo o'wo ruhu ve epen a̱tsuma̱ o una̱ wa ama̱sula̱ a̱yi.>

<<A̱vu A̱sulazuva a damma, <'ya̱wa̱ na va̱a̱ luluma̱ yi, vu ta lyuwa aciya̱yi.> >>

22 A̱vu Mikaya damma <<Adama o ndolo A̱sulazuva a zuwa ta̱ ruhu ve epen a̱tsuma̱ o una̱ wa ama̱sula̱ a̱ wu, adama a na A̱sulazuva a damma ta̱ u ta̱ ta̱wa̱ wu na̱ meleshe.>>

23 A̱vu Zedekiya ulobo wa Kena'ana 'yon u ɓasa Mikaya o ugbaguzu, a̱vu we ece yi, <<Nu ure u ne u ɗa ruhu va̱ A̱sulazuva toniyi a̱vu u lyawa mu reve u yuwan adanshi na̱ a̱vu?>>

24 A̱vu Mikaya usu u damma, <<Vu ta̱ reve a̱tsuma̱ o urana u na va suma vu pa'an pe pe a̱tsuma̱ asula.>>

25 Adama o ndolo a̱vu Ahabu mogono ma Isra'ila ma ca udammu, <<Remei Mikaya a̱vu i tarai a̱ tyo uba̱ta̱ wa Amon zagbain lyuci nu uba̱ta̱ wa Yowash ulobo mogono. 26 A̱vu i damma, <Apa ili i na mogono ma dammai, a zuwa Mikaya a̱tsuma̱ o u'wa wa ali a̱vu a casu yi opopofu ke'en na̱ mini hali acina mantsa ma na ma̱ ka̱mba̱ gbaga diga uba̱ta̱ o uvon.> >>

27 A̱vu Mikaya damma, <<N na̱ vu ta̱wa̱ gbaga, A̱sulazuva a ɗa a yuwain adanshi na̱ a̱mu shi.>> A̱vu u da̱shi u damma, <<A̱ɗu ama yu uwwa adanshi a̱ va̱!>>

28 A̱vu mogono Ahabu va Isra'ila na̱ mogono Yehoshafat va Yahuda a̱ ka̱ra̱ a̱ tyo Ramot Giliyadu. 29 A̱vu mogono Ahabu damma Yehoshafat, <<N ta vadala iroci i va̱ na ma uwa uvon, amma a̱vu vo oto a̱tugu o tsugono tsa̱ wu.>> A mantsa mo ndolo a̱vu Ahabu mogono ma Isra'ila ma vadala iroci ya̱ a̱yi a̱vu u uwa uvon.

30 Mogono ma Suriya ma̱ shi ta̱ ma ca udammu e ekere a nan yali yi ikeke yi ido, <<She i yuwan uvon na̱ za ro wan, ko vuma ke'en ko zagbain wan, she mogono ma Isra'ila goon.>> 31 Ana nan yali yi ikeke yi ido'o e enei Yehoshafat, a yuwan ta̱ majiyan, <<A̱yi nda a̱yi ɗa mogono ma Isra'ila.>> Reve a vadala adama a yuwan uvon na̱ a̱yi, amma a na u showeyin A̱sulazuva a kamba yi, reve u kamba yi. Reve A̱sula̱ a wawa yi e ekere le. 32 A mantsa ma na nan yali yi ikeke yi ido'o e revei na a̱yi ɗa mogono ma Isra'ila shi, a̱vu a lyawa masaɓa ma̱ a̱yi.

33 Amma a̱vu nanza tewin liya va̱ yi ivama, a̱vu u tawan mogono ma Isra'ila nu upasu wi itana yu uvon ya̱ yi. A̱vu mogono ma damma za na a̱a̱ gba̱rusa̱ ikeke yi ido ya̱ yi, <<Vadala vu uta̱a̱ mu uba̱ta̱ wu uvon u nda, adama a na a amaton mu ta̱ lon.>> 34 Uvon u suɗuwa ta̱ lon urana u ndolo ma̱ɓula̱. A̱vu e keɗe mogono ma Isra'ila a gawan a̱tsuma̱ a̱ keke vi ido va̱ yi elime aza a Suriya hali acina ulivu. Urana a̱ ma̱riya̱a̱ reve u ukwa̱.