1 A̱vu nda̱na̱ta̱ ma̱ Urishelima a katala Ahaziya ulobo wu ukosu wa̱ Jehoram mogono o una̱ wa dada va̱ yi, adama a na o oɓolo ama a na a̱ ta̱wa̱i diga Araba a̱ ta̱wa̱a̱ ta̱ nu uvon a̱tsuma̱ o uva̱la̱ta̱ wa aza a Isra'ila, reve o una aza a kpakpara o olobo suru. Ne ɗa Ahaziya farai tsugono tsa a Yahuda. 2 Ahaziya da̱na̱ ta̱ na a'wan ushin ne ejere na wo o'woi mogono, u yuwan ta̱ tsugono tsa̱ a̱ Urishelima a'wan a̱ ta̱. Aala a mma va̱ yi ɗa Ataliya, mawun ma tsukaya ma Omri.

3 A̱yi fo u toni ta̱ ure wu u'wa wa Ahabu, adama a na mma va̱ yi casu yi ta̱ a̱sa̱la̱ na wa yuwan iwuya. 4 U yuwan ta̱ iwuya uba̱ta̱ wa̱ A̱sulazuva cine u'wa wa Ahabu u yuwain, adama a na a mantsa ma na dada va̱ yi kuwa̱i, ele ɗa a̱ da̱na̱i a casu yi a̱sa̱la̱ a na a̱ ta̱wa̱ niyi nu ukototosu. 5 U yuwan ta̱ tsutoni na̱ a̱sa̱la̱ le a̱vu u ɓolo a aci na̱ Jehoram ulobo wa Ahabu mogono ma Isra'ila a̱ 'ya̱wa̱ a yuwan uvon na̱ Hazayel mogono ma Suriya ɗe Ramot Giliyadu. A̱vu aza a Suriya amaton Yoram, 6 a̱vu u suma a̱ tyo a̱ lyuci va̱ Yezireyel adama o usa̱n u na amatoniyi ɗe a Rama uba̱ta̱ o uvon u na u yuwain na̱ Hazayel mogono ma Suriya.

Reve Ahaziya ulobo wa̱ Jehoram mogono ma Yahuda ma̱ 'ya̱wa̱ adama a na wa̱ ka̱lyuwa̱ Joram ulobo wa Ahabu adama o usa̱n u na amatoniyi.

7 Amma adama o ka̱lyuwusa̱ wa Yoram, reve A̱sulazuva a̱ ta̱wa̱ nu ukototosu wa Ahaziya. A mantsa ma na Ahaziya rawai, a̱vu o uta̱ oɓolo na̱ Jehoram adama a na a ga'aton Yehu ulobo wa Nimishi, za na A̱sulazuva a̱ tsuwa̱a̱n mani'in u kototo u'wa wa Ahabu suru. 8 A mantsa ma na Yehu da̱na̱i o uge'etosu wu u'wa wa Ahabu, a̱vu uga'an na azagbain a Yahuda, oɓolo no olobo a mmaci ma Ahaziya, aza a na a yuwusan yi a̱ga̱nda̱, a̱vu wu una le. 9 Reve Yehu uwa izami ya Ahaziya, a̱vu ama a̱yi e remei cina upa'an a̱tsuma̱ a Samariya. A̱vu a̱ ta̱wa̱ na̱ yi uba̱ta̱ wa̱ Yehu a̱vu o una yi. A̱vu a̱ ciɗo yi, adama a na a dammai, <<A̱yi ulobo wa̱ Yehoshafat ɗa, za na yuwayin A̱sulazuva a̱ga̱nda̱ no okolo a̱yi suru.>> Agba a̱ tsura̱ lo nanza a̱tsuma̱ o u'wa wa Azariya za na a gura yuwan tsugono tse e iɗa'a shi.

10 Ana Ataliya mma va Ahaziya mogono me enei ulobo wa̱ yi u kuwa̱ ta̱, a̱vu u kototo muwun mu u'wa n tsugono tsa Yahuda. 11 Amma Yehosheba usheli u mogono Yehoram, iva̱ ta̱ Yowash ulobo wa Ahaziya a̱tsuma̱ a̱ muwun n mogono aza a na a zama o una oɓolo na̱ za vi ɓa̱ni va̱ yi a̱tsuma̱ aasula e nven. Adama a na Yehosheba usheli wa̱ Jehoram mogono na̱ ka va Yehoyida ganu muwun ma a̱na̱wun ma Ahaziya ɗa, a̱vu u soko mawu'un adama a na she Ataliya unai wan. 12 Yowash yuwan ta̱ a'wan a̱ ta̱li upa'awun a̱tsuma̱ A̱a̱'isamapaɗa a̱ A̱sula̱ oɓolo ne le, Ataliya gba a yuwusan tsugono tse e iɗa'a.