1 Manase da̱na̱ta̱ na a'wan kupa ne ejere a mantsa ma na u temei tsugono, u yuwan ta̱ tsugono a'wan kupoton no ozo o ton a̱tsuma̱ a̱ Urishelima. 2 Manase yuwan ta̱ iwuya e ekere a̱ A̱sulazuva, na u yuwain tsutoni na̱ wuma wi idaba yi nɗa n na A̱sulazuva a̱ gba̱ra̱i elime aza a Isra'ila. 3 U da̱shi ta̱ suwisa ba̱ta̱ va̱ a̱ga̱nda̱ n na dada va̱ yi Hezekiya shi kototoi, reve u suwisa musa'a ma Ba'al na̱ a̱shuwutsu a Ashera a̱vu waru u kingyowa̱ italyo'o ya zuva u yuwan le a̱ga̱nda̱. 4 Waru u suwa ta̱ musa'a a̱tsuma̱ A̱a̱'isamapaɗa a̱ A̱sulazuva, uba̱ta̱ u na A̱sulazuva a dammai, <<Lo ɗa Aala a̱ va̱ a̱da̱na̱ a̱tsuma̱ a̱ Urishelima hali hali.>> 5 Waru lo okowo wa̱ A̱a̱'isamapaɗa a̱ A̱sulazuva'a, u suwaa ta̱ lo italyo'o ya zuva suru musa'a. 6 Manase ca ta̱ olobo a̱yi kucci vu ukula̱tosu o Uka̱ri wa̱ Ben Hinom, reve u ɓoloso aci na̱ ruhu va̱ a̱kwa̱kwa̱ na̱ yindi. Agba waru u da̱na̱ ta̱ a yuwusan tsuboci. U yuwan ta̱ iwuya lon elime a̱ A̱sulazuva za na zuwai A̱sulazuva yuwain upan lon.

7 U tara ta̱ a̱ma̱li a na u she'ein reve u zuwa le a̱tsuma̱ A̱a̱'isamapaɗa a̱ A̱sulazuva, za na A̱sulazuva a dammai Da̱wuda nu ulobo wa̱ a̱yi Sulemanu, <<A̱tsuma̱ a̱ A̱a̱'isamapaɗa a nda a̱ Urishelima, za naa n ɗangulai a̱tsuma̱ o gundo suru va aza a Isra'ila, naa ma zuwa Aala a̱ va̱ hali hali.✝ 8 Ma̱a̱ da̱shi tawa waru ana aza a Isra'ila na a lyawa iɗa i na n cayi nkaya nle shi, n na a yuwan tsutoni ni ili i na n damma nle adama a̱ wila̱ suru, nu udammu nu uritosu u na aagbashi a̱ va̱ Musa cuɗuwai.>> 9 Amma Manase zuwa ta̱ ama a Yahuda na ama a̱ Urishelima a lyawa ure, na a yuwain iwuya lon na la'ai nɗa n na A̱sulazuva a̱ gba̱ra̱i elime aza a Isra'ila.

10 Reve A̱sulazuva a yuwan adanshi na̱ Manase na ama a̱yi, amma a̱vu a 'yuwan na a uwwa. 11 A̱vu A̱sulazuva a zuwa nan yali ya̱ a̱soja o mogono Asuriya, aza a na a tarai Manase a̱ tyo tsugbashi, na̱ makawani a̱ vunu, a̱vu a̱ nla̱ a̱yi na akani a̱ rumushili a̱vu a tara a̱yi a̱ tyo Babila. 12 Amma a mantsa ma na u da̱na̱i a̱tsuma̱lima̱ lon, u tara aciya̱yi ili i ro shi uba̱ta̱ wa̱ A̱sula̱ a nkaya ma̱ a̱yi a̱vu u zami urewesu wa̱ A̱sulazuva A̱sula̱ a̱yi. 13 Ana u yuwain avasa a̱ tyo uba̱ta̱ wa̱ A̱sulazuva reve we ene iliyali ya̱ a̱yi a̱vu wu uwwa avasa a̱yi, a̱vu u ka̱mba̱to yi a̱tsuma̱ a̱ Urishelima Ootogu o tsugono tsa a̱yi. A mantsa mo ndolo ɗa Manase revei A̱sulazuva A̱sula̱ a ɗa. 14 Ana a̱yi ndolo kotoi reve u suwisa ukari u Lyuci wa̱ Da̱wuda. Za na ka̱ra̱i a̱ tyo upasu wa̱ a̱livu wu Uɗolu wa Gihon a̱tsuma̱ o uka̱ri, hali acina una̱ntsu u mugula a̱ ka̱nda̱ruwa̱ acina upasu wa aagaɗi a Ofe uba̱ta̱ u na a suwa niyi uga'an lon. A̱vu u zuwa nan a̱soja a̱yi suru a̱tsuma̱ e ilyuci i na i ri na̱ kari vu ucira a̱tsuma̱ a Yahuda.

15 A̱vu Manase kototo musula̱ mo omocin a̱vu u tawa iroci i na i ri pe a̱tsuma̱ A̱a̱'isamapaɗa A̱sulazuva, oɓolo na̱ musa'a n na u suwai a̱tsuma̱ a masasan ma̱ A̱a̱'isamapaɗa na̱ a̱tsuma̱ a̱ Urishelima. Reve wo oco le ɗe a̱ca̱pa̱ a̱ lyuci. 16 A̱vu u da̱shi lapula masa'a ma̱ A̱sulazuva, reve u ca kucci muwwulai na̱ kucci vu ugodyusho zuva va̱ yi. A̱vu fo u damma ama a Yahuda a yuwaan A̱sulazuva A̱sula̱ a Isra'ila a̱ga̱nda̱. 17 Suru na̱ ne ama'a a lyuwa ta̱ elime nu ucasu u kucci a̱ ba̱ta̱ va̱ a̱ga̱nda̱, amma a̱vu a casu uba̱ta̱ wa̱ A̱sulazuva A̱sula̱ le goon.

18 Akapi o ulinga u tsugono tsa Manase, oɓolo na avasa a na u yuwain e ekere A̱sula̱ a̱yi, na adanshi a na aza a yindi a yuwaan niyi adama a Aala A̱sulazuva A̱sula̱ a Isra'ila, a̱da̱na̱ ta̱ pe uɗanu a̱tsuma̱ aatagada alabari o ngono ma Isra'ila. 19 Na avasa a̱yi na̱ cine A̱sula̱ enei a̱tsuma̱lima̱ a̱yi, na̱ nusu va̱ yi suru nu ulambu wa̱ a̱ɓula̱ a̱yi, na̱ ba̱ta̱ na u suwai ba̱ta̱ va̱ a̱ga̱nda̱ na̱ a̱shuwutsu a Ashera na̱ musula̱ babu u ka̱ɗa̱to aciya̱yi, a̱da̱na̱ ta̱ suru uɗanu a̱tsuma̱ aatagada a̱za̱ a̱ yindi. 20 A̱vu Manase kuwa̱ ucina nkaya ma̱ yi reve a̱ ciɗo yi a̱tsuma̱ o ukobu wa̱ yi. A̱vu ulobo wa̱ yi Amon wo o'wo mogono o una̱ wa̱ a̱yi.

21 Amon da̱na̱ ta̱ na̱ a'wan ushin ne ejere, a mantsa ma na wo o'woi mogono, waru u yuwan ta̱ tsugono tsa̱ Urishelima a'wan e re. 22 U yuwan ta̱ iwuya e ekere A̱sulazuva cine Dada va̱ a̱yi Manase yuwain. Amon ca ta̱ kucci uba̱ta̱ wa̱ a̱ma̱li n na dada va̱ yi yuwain, waru u yuwaan le a̱ga̱nda̱. 23 Amma Amon ka̱ɗa̱to aciya̱yi ununa dada va̱ yi yuwain shi uba̱ta̱ wa̱ A̱sulazuva, waru u da̱shi ta̱ nusu va̱ yi.

24 A̱vu azagbain Amon oɓolu una̱ a̱vu o unai a̱tsuma̱ o ukobu wa̱ a̱yi. 25 A̱vu a ama e iɗa ya Yahuda o una aza a na o ɓoloi una̱ o unai Mogono Amon, a̱vu a zuwa ulobo wa̱ yi Josiya wo o'wo mogono o una̱ wa̱ a̱yi.