1 Yehoshafat ulobo wa Asa wo o'wo ta̱ mogono o una̱ wa dada va̱ yi. Waru u zuwa ta̱ upasu wa Yahuda u da̱shi ucira lon, hali na u gura yuwain uvon nu upasu wa Isra'ila. 2 Waru u yuwan ta̱ va̱la̱ta̱ va̱ a̱soja suru a̱tsuma̱ e ilyuci na ri na̱ kari vu ucira vu upasu wa Yahuda, a̱vu u zuwa pe o oɓolo a̱soja na a yuwan ipiri a̱tsuma̱ o upasu wa Yahuda na̱ a̱tsuma̱ o upasu u mulyuci wa Ifiramu aza a na Dada va̱ yi Asa lyuwai nu uvon.

3 A̱sulazuva a̱da̱na̱ ta̱ oɓolo na̱ Yehoshafat adama a na nu ufaru u yuwan ta̱ tsutoni nu ure wa Dada va̱ yi Da̱wuda. U yuwaan a̱ma̱li a Ba'al a̱ga̱nda̱ shi, 4 amma u zami ta̱ A̱sulazuva A̱sula̱ a dada va̱ yi, a̱vu u yuwan tsutoni nu udammu wa̱ yi, u toni wuma wa̱ a̱za̱ a̱ Isra'ila shi. 5 Adama o ndolo A̱sulazuva a ca yi ta̱ ucira u na wa yuwan tsugono tsa Yahuda, a̱vu aza a Yahuda suru a̱ ta̱wusa̱a̱ Yehoshafat na̱ ne'en, a̱vu u tsura̱ utsuru wa̱ a̱bunda̱ na̱ tsugbain lon. 6 Yehoshafat ca ta̱ aciya̱yi ulobonu a̱tsuma̱ e itoni ya̱ A̱sulazuva. Adama o ndolo a̱vu u kototo ba̱ta̱ va̱ a̱ga̱nda̱ na̱ a̱shuwutsu a Ashera diga e iɗa ya Yahuda.

7 A̱tsuma̱ a'wan ta'atsu o tsugono tsa̱ a̱yi, a̱vu Yehoshafat lyungu azagbain a̱yi a̱ tyo a̱tsuma̱ e ilyuci yu upasu wa Yahuda na o rito wa ama'a. Azagbain a na a̱ lyunguyi ele ɗa: Benhayi na̱ Obadiya na̱ Zakariya na̱ Netane na̱ Mikaya. 8 Nan Levi o ro oɓolo na̱ nan ganu e re a̱ 'ya̱wa̱ ta̱ oɓolo ne ele. Nan Levi ele ɗa: Shemaya na̱ Nataniya na̱ Zebadiya na̱ Asahe na̱ Shemiramo na̱ Yehonata na̱ Adonija na̱ Tobiya na̱ Tobadoniya. Nan ganu'u ele ɗa: Elishama na̱ Yehoram. 9 A̱vu a tara aatagada a̱ wila̱ a̱ A̱sulazuva o tonishi suru ilyuci yu upasu wa Yahuda o ritosu ama.

10 A̱vu wovon wa̱ A̱sulazuva u reme nda̱na̱ta̱ n na n ri uka̱nda̱ruwu ni iɗa yu upasu wa Yahuda suru, adama o ndolo a̱ ta̱wa̱ le nu uvon shi. 11 Ozo o ro a̱tsuma̱ aza a Filistiya a̱ ta̱wa̱a̱ ta̱ Yehoshafat u une'e wi itana na̱ azurufa adama o utafa. Aza a Araba a̱ ta̱wa̱a̱ a̱yi ta̱ ni ikyon ukpakukupa ucindere nu ukpakucindere (7,700) na̱ mgbele ukpakukupa ucindere nu ukpakucindere (7,700).

12 Yehoshafat da̱na̱ ta̱ a̱da̱shishi ucira. Wu suwa ta̱ ilyuci yi kari vu ucira ni ilyuci yi izuwa a̱tsuma̱ a Yahuda. 13 U yuwan ta̱ izuwa yi itana ya̱ a̱bunda̱ a̱tsuma̱ e ilyuci ya Yahuda. A̱vu u zuwa a̱soja na a gurai uvon lon a̱tsuma̱ a Urishelima. 14 Apa mekece me le o una̱ wu nkaya nle.

Diga o ugundo wa Yahuza nan yali o oɓolo o ukpakukupa ele ɗa,

Adna yali ya̱ a̱soja vu ukpakukupa ukpakuta'atsu (300,000).

15 Za na toni niyi a̱yi ɗa Yehohana yali ya̱ a̱soja o ukpakukupa ukpaku ure na̱ kupakunla̱ (280,000).

16 Za na toni niyi a̱yi ɗa Amasiya ulobo wa Zikiri za na cayi aciya̱yi adama o ulinga wa̱ A̱sulazuva, waru u da̱na̱ ta̱ na̱ a̱soja ukpakukupa ukpakure (200,000).

17 Diga o ugundo wa Banyami:

Eliyada ɗa yali ya̱ a̱soja vuma ɗa na gurai uvon lon, u da̱na̱ ta̱ na̱ a̱soja ukpakukupa ukpakure (200,000), za suru da̱na̱ ta̱ uɓa̱nu na̱ tan na̱ a̱ra̱ga̱.

18 Za na toni niyi a̱yi ɗa Yehozabad, waru u da̱na̱ ta̱ na̱ a̱soja ukpakukupa ukpaku na̱ kupakunla̱ (180,000) aza a na a gurai uvon. 19 Ele nda ele ɗa a̱soja naa a yuwayin mogono ulinga a̱tsuma̱ a̱ Urishelima, babu na aza a na Yehoshafat shushuwa̱i e ilyuci vu kari vu ucira a̱tsuma̱ a Yahuda suru.