1 A̱tsuma̱ a'wan mata'atsu na̱ a̱za̱ ta̱li o tsugono tsa mogono Asa va Yahuda, a̱vu mogono Basha va Isra'ila riya̱a̱ Yahuda nu uvon, a̱vu u lapula ukari wu ucira u lyuci wa Rama adama a na wa putsaa na̱ ma uwa na̱ mota̱ na̱ ma uwwa mo upasu u mogono Asa va Yahuda.

2 A̱vu Asa tara azurufa na̱ zinariya aza a na a̱ ri pe asula e izuwa a̱ A̱a̱'isamapaɗa a̱ A̱sulazuva na̱ a̱za̱ o ukobu wa̱ a̱yi, a̱vu u lyunguwa̱a̱ mogono Ben Hada va Suriya za na ri ɗe a yuwusan tsugono tsa Dimaska. 3 A̱vu u damma <<Lyawa tsu yuwan nzuwulai cine Dada va̱ wu na̱ Dada va̱ a yuwain ɗe nu ufaru. Apa une'e u azurufa na̱ zinariya n ta̱wa̱ nuwu. Lyawa vu 'ya̱wa̱ a na va kuɗa nzuwulai na vu yuwain na̱ mogono Basha va Isra'ila na wa lyawa iɗa i va̱.>>

4 Mogono Ben Hada gba usu ta̱ adanshi Asa, a̱vu u lyungu nan yali ya̱ a̱soja a̱yi na riya̱a̱ iɗa ya Isra'ila nu uvon. A̱vu a lyuwa ilyuci ya Iyon na̱ Dan na̱ Abel Ma'aka, ni iɗa yi izuwa yu upasu wa Nafutali suru. 5 A mantsa ma na Basha uwwai ili i na ya farasa, a̱vu u lyawa masuwa mo ukari wa Rama, a̱vu u lyawa ulinga u na wa yuwusan. 6 Adama o ndolo a̱vu Mogono Asa ɓoloto ama diga Yahuda suru, a̱vu u zuwa le na a̱ pura̱ atali na akpata a na Basha yuwain ulinga ne le na u suwai Rama. Asa yuwan ta̱ ulinga ne ele u lapula ukari u lyuci wa̱ Geba na̱ za va Mizfa.

7 A mantsa mo ndolo, a̱vu Hanani za yindi ta̱wa̱ uba̱ta̱ wa Asa mogono ma Yahuda, a̱vu u damma yi, <<Ana wo o'woi vu zuwa ta̱ ucira wa̱ a̱ wu uba̱ta̱ u mogono ma Suriya na wo o'woi vu zuwai ucira wa̱ a̱ wu uba̱ta̱ wa̱ A̱sulazuva A̱sula̱ a̱ wu shi, to, gogo a̱soja a Suriya ala'a ta̱ e ekere wa̱ wu. 8 Agba a̱soja a̱ Kush na̱ a̱za̱ a̱ Libiya a̱za̱ a̱bunda̱ ɗa na amayun. A̱ da̱na̱ ta̱ ni ikeke yi ido yu uvon na a kambi e ido a̱bunda̱. Amma na̱ a̱bunda̱ e le suru, adama a na vu zuwa ta̱ okolo a̱ wu uba̱ta̱ wa̱ A̱sulazuva, a̱vu u ca wa̱ le ekere a̱ wu. 9 Adama a na esu A̱sulazuva a̱ ta̱ idanasa suru uvaɗi na wa kamba aza a na o toni shi yi no okolo a̱ ta̱. Vu yuwan ta̱ tsulo. Adama o ndolo, diga gogo vu ta teme a yuwusan uvon kuci.>>

10 Asa yuwan ta̱ upan na̱ za yindi'i adama o ndolo, a̱vu u ca udammu na a zuwa Hanani za yindi a̱tsuma̱ o u'wa wa ali. Diga mantsa mo ndolo ma ɗa Asa farai a casu ama a̱ yi a̱tsuma̱lima̱.

11 Ulinga wa Asa diga o ufaru a cina ukosu u tsugono tsa̱ a̱yi u da̱na̱ uɗanu a̱tsuma̱ aatagada o tsugono tsa a Yahuda na aza a Isra'ila. 12 A̱tsuma̱ a'wan mata'atsu na̱ kuci o tsugono tsa̱ a̱yi, Asa reme ta̱ mɓa̱la̱ maa ana. Amma suru na̱ ne u zami A̱sulazuva shi, adama o ndolo reve u zami i kambi uba̱ta̱ wa aza a na a casu a̱guma̱. 13 Asa kuwa̱ ta̱ a̱tsuma̱ a'wan amunga na̱ za ta̱ o tsugono tsa̱ a̱yi, a̱vu ucina nkaya ma̱ a̱yi. 14 A̱vu a̱ ciɗo a̱yi a̱tsuma̱ aason a na u ka̱ba̱yi aciya̱yi a̱tsuma̱ a̱ Lyuci va̱ Da̱wuda. A̱vu o votoyin a̱a̱kpa̱ga̱ na o shiton yi nu ucita ni ili i ma̱guru, a̱vu a̱ ivula̱ akina adama a na a ca yi tsugbain.