1 Josiya da̱na̱ ta̱ na̱ a'wan kunla̱ na wo o'woi mogono, agba u yuwan ta̱ tsugono tsa a'wan mata'atsu na̱ za ta̱ a̱tsuma̱ a̱ Urishelima. 2 Agba u yuwan ta̱ ili i na i ri mejege e ekere A̱sulazuva. U yuwan ta̱ mmalu ma̱ a̱yi mejege a̱tsuma̱ o ure wa akaya a̱yi Da̱wuda, agba u vadala uba̱ta̱ u ro shi ko usa'ani ko ugula̱ shi.

3 A̱tsuma̱ a a'wan kunla̱ o tsugono tsa̱ a̱yi, a mantsa ma na u da̱na̱i a mawun, a̱vu u lyuwa elime ni izami yu urewesu wa̱ A̱sula̱ akaya a̱yi Da̱wuda. A̱tsuma̱ a'wan kupa ne ejere a̱yi, a̱vu u teme o kototosu ba̱ta̱ va̱ a̱ga̱nda̱ va Yahuda na̱ Urishelima na̱ a̱shuwutsu a Ashera na̱ a̱ma̱li a na e she'ein ni iroci i na a̱ zuɗa̱i. 4 O udammu wa̱ yi u zuwa ta̱ o kototo musula̱ n na n ri lo uba̱ta̱ wa̱ a̱ga̱nda̱ a Ba'al. Waru wi ira ta̱ masa'a ma na a̱ kula̱tosu ili i ma̱guru na ri zuva le, a̱vu u kototo a̱shuwutsu a Ashera na̱ a̱ma̱li ni iroci i na e she'ein. Ele nda wi ira le ta̱ suru a̱vu u kusha'wa okomo'o uba̱ta̱ wa ama a na a casu yi ukula̱tosu u ndolo ason e le. 5 U kula̱to ta̱ fo eetele a nan ganu zuva musa'a nle, na̱ ne tsundolo tsa ɗa wo o'wotoi Yahuda na̱ Urishelima cece. 6 A̱tsuma̱ e ilyuci yu ugundo wa Manase nu ugundo wa Ifiramu nu ugundo wa Saminu hali acina ugundo wa Nafutali no okongo e le, 7 u kototo ta̱ musa'a na̱ a̱shuwutsu a Ashera a̱vu wi ira a̱ma̱li o o'wo okomo waru u kototo ta̱ musa'a suru n na a̱ kula̱tosu ili i ma̱guru a̱tsuma̱ a Isra'ila. Reve u ka̱mba̱ Urishelima.

8 A̱tsuma̱ a'wan a̱ kunla̱ o tsugono tsa Josiya, na wo o'wotoi iɗa'a na̱ A̱a̱'isamapaɗa'a cece, a̱vu u lyungu Shafa ulobo wa Azaliya na̱ Ma'aseya gwamna lyuci gbain, na̱ Yowa ulobo wa Yowaha za maɗana ma alabari na a lapula A̱a̱'isamapaɗa A̱sulazuva A̱sula̱ a̱yi.

9 Reve a̱ 'ya̱wa̱ uba̱ta̱ wa Hilikiya ganu gbain a ca yi ikebe i na a̱ ta̱wa̱yi a̱tsuma̱ A̱a̱'isamapaɗa A̱sula̱, aza a na nan Levi na a yuwusan ipiri yu una̱ntsu a̱ ushiyi diga uba̱ta̱ wa ama o ugundo wa Manase na̱ Ifiramu na akapi ama a Isra'ila na̱ uba̱ta̱ wa ama a Yahuda suru na̱ Banyami na̱ nda̱na̱ta̱ ma̱ a̱ Urishelima. 10 A̱vu a ca ikebe'e e ekere aza a na a ɗangulai na e idana ulapulu wa̱ A̱a̱'isamapaɗa A̱sulazuva'a. Ama a nda e le ɗa aza a na a tsupa ozo o ulinga wu ulapulu wa̱ A̱a̱'isamapaɗa'a, adama a na a̱ ka̱mba̱to A̱a̱'isamapaɗa A̱sulazuva cine u da̱na̱i nu ufaru. 11 A̱vu waru a ca ikebe'e e ekere a nan kafinta na aza a na a yuwusan usaa na a tsula atali na e she'ein na̱ akpata adama o usaa na ngono ma Yahuda n lyawai o ocoi o'woi okongo.

12 Ama'a a yuwan ta̱ ulinga'a na̱ a̱ɓula̱. Aza a na a ɗangulai na e idana ulinga'a ele ɗa: Jaha na̱ Obadiya nan Levi diga o ugundo wa̱ Merari na̱ Zakariya na̱ Meshulam diga o ugundo wa̱ Koha. Oɓolo na̱ nan Levi na a gurai ishipa ni itana i tsuwe'e. 13 Ele ɗa aza a na e idanasa aza a na a tanusu itana. Waru ele ɗa aza a na o rocosu vuma suru cu'un vu ulinga u na waa yuwan. Ozo o ro a nan Levi gba a̱za̱ e iɗana i ɗa, ozo o ro waru azagbain, ozo o ro waru aza a na a yuwusan ipiri yu una̱ntsu ɗa.

14 A mantsa ma na a̱ da̱na̱i o uta̱su ikebe i na i da̱na̱i a̱tsuma̱ A̱a̱'isamapaɗa a̱ A̱sulazuva, a̱vu Hilikiya ganu tsura̱ aatagada a̱ wila̱ A̱sulazuva, za na a cayi e ekere a Musa. 15 A̱vu Hilikiya damma Shafa za vi iɗana i mogono, <<N tsura̱ ta̱ aatagada a̱ wila̱ a̱tsuma̱ A̱a̱'isamapaɗa a̱ A̱sulazuva.>> A̱vu Hilikiya ca Shafa aatagada'a.

16 A̱vu Shafa tara aatagada'a u 'ya̱wa̱a̱ mogono u damma yi, <<Azagbain a̱ wu a ta yuwusan suru ili i na a zuwa nle a yuwan. 17 A tara ta̱ ikebe i na i da̱na̱i pe a̱tsuma̱ a̱ A̱a̱'isamapaɗa a̱ A̱sulazuva, a̱vu a ca aza a na e idanasa ulinga'a no ozo o ulinga.>> 18 A̱vu Shafa za vi iɗana damma mogono, <<Hilikiya ganu ca a̱mu ta̱ aatagada.>> A̱vu Shafa ɗe nu una̱ elime o mogono.

19 A mantsa ma na mogono ma uwwai udammu u wila̱ u na a ɗanai a̱tsuma̱ a aatagada'a, a̱vu wukara a̱tugu a̱yi adama a̱ a̱tsumola̱ngu. 20 A̱vu mogono ma ca udammu e ekere a Hilikiya na̱ Ahikam ulobo wa Shafa na̱ Abadon ulobo wa Mika na̱ Shafa za vi iɗana na̱ Asaya za na a yuwusaan mogono a̱ga̱nda̱, u damma, 21 <<Ka̱ra̱i i zami ya a̱mu urewesu wa̱ A̱sulazuva na adama akapi ama a Isra'ila na̱ Yahuda adama e ili i na i ri pe a̱tsuma̱ aatagada a nda za na a̱ tsura̱i. Upan wa̱ A̱sulazuva u ta̱ a̱bunda̱ aciya̱tsu, adama a na nkaya ntsu n 'yuwain a yuwan tsutoni na adanshi A̱sulazuva. Waru a yuwan tsutoni ni ili i na a ɗanai a̱tsuma̱ a aatagada'a shi.>>

22 A̱vu Hilikiya oɓolo na aza a na mogono ma̱ lyungu yi oɓolo na̱ yi a̱ ka̱ra̱ a yuwan adanshi na̱ vumava̱sula̱ Hulda, za na da̱na̱i ka va Shalum ulobo wa Toha ulobo wa Hasra na a yuwusan ipiri yi itana yu otosu yu ulinga. Hulda da̱na̱ ta̱ nden a̱tsuma̱ a Urishelima wu Upasu u Sa'avu.

23 Reve u damma le, apa ili i na A̱sulazuva A̱sula̱ a Isra'ila a dammai, dammai vuma na lyungu n ɗu uba̱ta̱ u va̱, 24 <<Apa ili i na A̱sulazuva a dammai, n ta̱ ta̱wa̱ na̱ meleshe uba̱ta̱ u nda na̱ nda̱na̱ta̱ ma̱ a̱yi. Suru una̱ u na u ri pe uɗanu a̱tsuma̱ aatagada a na e ɗeyi nu una̱ elime o mogono ma Yahuda u ta shiwan aciyele. 25 Adama a na a vari mu ta̱, a̱vu a ca ukula̱tosu wi ili i ma̱guru a̱ tyo uba̱ta̱ u musula̱ n ro na zuwa numu n yuwain upan o una̱ we e ekere e ili i na a yuwain, upan u va̱ u ta̱ cipa̱ uba̱ta̱ u nda agba wa̱ fa̱la̱shi shi. 26 Amma i damma mogono ma a Yahuda za na lyungu nɗu na ya zami ya yi urewesu wa̱ A̱sulazuva, apa ili i na A̱sulazuva A̱sula̱ a Isra'ila a dammai, o una̱ wi idanshi i na vu uwwai, 27 adama a na okolo a̱ wu a̱ tsu la̱pa̱ vadala shi waru vu ka̱ɗa̱to ta̱ aciya̱wu uba̱ta̱ wa̱ A̱sula̱ na vu uwwai ili i na u dammai adama o uba̱ta̱ u nda na ama a̱yi, a na wo o'woi vu ka̱ɗa̱to ta̱ aciya̱wu uba̱ta̱ u va̱ a̱vu vukara a̱tugu a̱ wu a̱vu vu shon elime a̱ va̱, a̱mu waru A̱sulazuva mu uwwa wu ta̱. 28 Gogo adama o ndolo n ta lyawa wu vu yuwan wuma ma̱ wu na asuvu nden, a̱ ta̱ ciɗo wu vu cina nkaya ma̱ wu waru esu a̱ wu ene'e cu'un va̱ a̱tsuma̱lima̱ na ma̱a̱ ta̱wa̱a̱ uba̱ta̱ u nda shi oɓolo na̱ nda̱na̱ta̱ ma̱ a̱yi shi.>>

A̱vu a̱ ka̱mbuwa̱a̱ mogono nu udammu u ndolo.

29 Reve Josiya mogono mo ɓoloto suru mbara ma Yahuda na̱ Urishelima. 30 A̱vu u ka̱ra̱ a̱ tyo A̱a̱'isamapaɗa a̱ A̱sulazuva, oɓolo na ama a Yahuda na̱ Urishelima oɓolo na̱ nan Levi na̱ nan ganu, na ama suru, zagbain na̱ za ke'en. A̱vu u ɗenuna̱ atsuvu e le suru idanshi i na i ri pe a̱tsuma̱ Aatagada a Nzuwulai, za na a cinai a̱tsuma̱ A̱a̱'isamapaɗa a̱ A̱sulazuva. 31 A̱vu mogono me isawan uba̱ta̱ u wisawatan wa̱ a̱yi, a̱vu u yuwisan akucunu elime a̱ A̱sulazuva no o toni ya̱ A̱sulazuva waru a yuwan tsutoni na̱ wila̱ wa̱ a̱yi, ni ili i na u zuwai nu udammu wa̱ a̱yi no okolo a̱yi suru na̱ wuma wa̱ a̱yi suru, na̱ waru a yuwan tsutoni ni idanshi yi nzuwulai n na ri uɗanu a̱tsuma̱ aatagada a nda.

32 Reve u zuwa za suru a̱tsuma̱ a̱ Urishelima na̱ Banyami na a yuwan nzuwulai ndolo, a̱vu ama a̱ Urishelima a yuwan ne ununa nzuwulai na̱ A̱sula̱, A̱sula̱ a nkaya nle n ri.

33 Josiya gba tawa ta̱ suru a̱ma̱li e idaba a̱tsuma̱ e iɗa ya Isra'ila. A̱vu u zuwa a ama suru na a yuwan a̱ga̱nda̱ a̱ tyo wu uba̱ta̱ wa̱ A̱sulazuva A̱sula̱ e le. A̱tsuma̱ a rana wuma wa̱ yi suru a̱ kuɗa̱ na a yuwan tsutoni na̱ A̱sulazuva A̱sula̱ a nkaya nle shi.