1 A mantsa ma na o kotoi a̱buki'i, a̱vu aza a Isra'ila suru aza a na a̱ da̱na̱i Urishelima o toni ilyuci ya Yahuda ni ilyuci ya Banyami ni ilyuci ya Ifiramu na̱ Manase. A̱vu o kototo atali a̱ga̱nda̱ na̱ a̱shuwutsu a Ashera. A̱vu o kototo ba̱ta̱ va̱ a̱ga̱nda̱ na̱ musa'a suru. Ana a yuwain ne a̱vu aza a Isra'ila a̱ ka̱mba̱ e ilyuci i le na̱ 'wa le.

2 Mogono Hezekiya ne'eshe ta̱ nan ganu na̱ nan Levi oɓolo oɓolo aza a na a̱da̱na̱ aa yuwusan a̱ga̱nda̱ ko yan nu ulinga wa̱ yi. Aza a na aa ca kucci vu ukula̱tosu na̱ kucci muwwulai, a yuwan a̱ga̱nda̱, waru o godyo a̱vu a cana ishipa yi ica a̱ na̱ntsu uba̱ta̱ wu nden wa̱ A̱sulazuva. 3 Mogono ma ca ta̱ diga o utsuru wa̱ yi ikambi i na a yuwan kucci vu ukula̱tosu vu usana nu ulivu na̱ za na a yuwan kucci vu ukula̱tosu vu urana wa Ashibi na̱ za va̱ A̱buki o Woto u Sa'avu na̱ A̱buki a na a zuwai, cine u ri uɗanu o uritosu u Wila̱ wa̱ A̱sulazuva. 4 A̱vu mogono ma damma ama na a̱ ri pe a̱tsuma̱ a̱ Urishelima a̱da̱na̱ a casu nan ganu na̱ nan Levi akunda e le, adama a̱ ka̱mbuwa̱ ugbozu u le suru uba̱ta̱ o uritosu u Wila̱ wa̱ A̱sulazuva. 5 A mantsa ma na ama a uwwai udammu'u, a̱vu aza a Isra'ila a̱ ta̱wa̱ nu umatsun wu ufaru wi ishina na̱ masayan ma inabi ma sa'avu na̱ mani'in ma zetun ni ishiki na̱ cu'un vi itana ya̱ a̱ɗuma̱ suru. A̱ ta̱wa̱ ta̱ na̱ ili ya̱ a̱bunda̱, za ta̱ a̱tsuma̱ a kupa vi itana yu una suru. 6 Ama a Isra'ila na aza a Yahuda, aza a na a̱ ri na̱ nden a̱tsuma̱ e ilyuci ya Yahuda a̱vu a̱ ta̱wa̱ na̱ za ta̱ a̱tsuma̱ a kupa le vi inan ni ikyon ni itana i na a tawai na a yuwan a̱ga̱nda̱ o ulinga wa̱ A̱sulazuva A̱sula̱ e le, a̱vu oɓoloto le oɓolo oɓolo. 7 A̱vu ama a fara o ɓolotosu itana i le diga woto wa ta'atsu a̱vu o koto o woto wa̱ cindere. 8 A mantsa ma na Hezekiya na azagbain a̱ ta̱wa̱i enei oɓolo oɓolo e itana i ndolo, a̱vu a yuwaan A̱sulazuva ica a̱vu u zuwaa ama a̱yi aza a Isra'ila aba'un.

9 A̱vu Hezekiya ece nan ganu na̱ nan Levi u damma, <<E te ɗa itana i nda yu uta̱i?>> 10 A̱vu Azariya ganu gbain diga o umatsun wa Saduku usu Hezekiya u damma, <<A mantsa ma na ama a farai a̱ ta̱wusa̱ nu une'e u le a̱tsuma̱ A̱a̱'isamapaɗa a̱ A̱sulazuva, tsu tsura̱ ta̱ ilyalya a na tsa lyuwa hali tsu lyawa akapi, adama a na A̱sulazuva a zuwaa ta̱ ama a̱yi aba'un lon. Adama o ndolo ɗa akapi e itana i nda a buwai.>>

11 A̱vu Hezekiya damma le o ofoɓo asula e izuwa a̱tsuma̱ A̱a̱'isamapaɗa a̱ A̱sulazuva. A̱vu a yuwan ne. 12 Reve a̱ ta̱wa̱ na̱ ne'en le na amayun, za ta̱ a̱tsuma̱ a kupa ni ili i na a tawai suru. A̱vu a zuwa Konaniya vu ugundo wa̱ Levi zagbain na a̱da̱na̱ e idanasa itana'a na̱ mawun ma̱ a̱na̱wun ma̱ yi Shimeyi za na o tonoi. 13 Akapi a na a kamba nle na a yuwan ulinga'a ele ɗa: Yehiyel na̱ Azaziya na̱ Naha na̱ Asahel na̱ Yerimo na̱ Yozaba na̱ Eliyel na̱ Ismakiya na̱ Maha oɓolo na̱ Benaya. Ele ɗa a̱ da̱na̱i a̱za̱ o uka̱lyuwusa̱ za̱la̱ tsugbain tsa Konaniya na̱ Shimeyi mawun ma̱ a̱na̱wun ma̱ a̱yi. Mogono Hezekiya na̱ Azariya zagbain nan ganu va̱ A̱a̱'isamapaɗa a̱ A̱sulazuva ele ɗa a aza a na a ɗangulai ama a nda'a.

14 Kore ulobo wa Imna vu ugundo wa̱ Levi, a̱yi ɗa za na e idanasa una̱ntsu wa asana, a̱vu a zuwai wi idana itana yu une'e u na a̱ ta̱wusa̱a̱ A̱sula̱ nu ucigu wo okolo. A̱yi ɗa waru za na tsu ne'eshen une'e u na a tawai adama A̱sulazuva oɓolo ni itana i na i ri na akiza. 15 Aza a na a tsu kambusa Kore ele ɗa: Adini na̱ Miniyamin na̱ Jesuwa na̱ Shemaya na̱ Amariya na̱ Shekaniya. A̱tsuma̱ amayun ele a̱ tsu ne'eshe ta̱ itana i nda e ilyuci i nan ganu, adama a ca a̱za̱ ele nan ganu babu aɗangulu, diga uba̱ta̱ wu zagbain a̱ tyo uba̱ta̱ wu za ke'en, cine a̱ ri oɓolo oɓolo.

16 A̱vu waru e ne'eshen ali aza a na a̱ ri na̱ a'wan ata'atsu a gawan aza a na a ɗanai ala e le a̱tsuma̱ o ucuɗuwu u nan Levi, aza a na a yuwan a̱ga̱nda̱ A̱a̱'isamapaɗa a̱ A̱sulazuva kuci cine a ca nle na a yuwan ulinga u le oɓolo oɓolo. 17 A̱vu e ne'eshen nan ganu itana cine a̱ ri uɗanu o ucuɗuwu vu 'wa vu nkaya nle. Na̱ nan Levi fo aza a na a̱ ri na a'wan ushin a gawan, a tsu ca le ta̱ akunda e itana i le adama a̱ cu'un vu ulinga u le na̱ cine a̱ ri oɓolo oɓolo. 18 Oɓolo ta̱ na̱ muwun ke'en ke'en na̱ a̱ma̱ci no olobo ne esheli na̱ lyuci suru aza a na ala ele a̱ ri uɗanu a̱tsuma̱ aatagada o ucuɗuwu u nan ganu na̱ nan Levi, adama a na a̱da̱na̱ ta̱ na amayun uba̱ta̱ u matawa ma aciyele.

19 Waru adama a nan ganu, limatan va Haruna, aza a na a̱ ri na̱ nden atsusa uka̱nda̱ruwu ni ilyuci, a̱vu a ɗangula ali o una̱ wa aala ele a̱tsuma̱ e ilyuci'i suru, aza a na a̱da̱na̱ o une'esun wi itana, uba̱ta̱ wa ali a na a ɗanai aala le a̱tsuma̱ aatagada o ucuɗuwu u nan Levi, a̱vu a ca le akunda e le.

20 Ne ɗa Hezekiya yuwain a̱tsuma̱ e iɗa ya Yahuda suru, u yuwan ta̱ ili i na i ri mejege na amayun na̱ a̱ɓula̱ a̱ ma̱ka̱ka̱n ma̱ A̱sulazuva A̱sula̱ a̱yi. 21 A̱tsuma̱ o ulinga u na Hezekiya yuwain o ulinga wa̱ A̱a̱'isamapaɗa a̱ A̱sula̱ suru, aza na a̱ ri pe a̱tsuma̱ o uritosu u wila̱ wa̱ Musa nu udammu wa̱ A̱sulazuva, waru u zami ta̱ A̱sula̱ a̱yi no okolo a̱yi suru, Adama o ndolo a̱vu u tsura̱ ulyuwu we elime.