1 A̱tsuma̱ a'wan kupa na̱ kunla̱ o tsugono tsa̱ mogono Yerobowam ulobo wa Nebat, Abija temei tsugono tsa a Yahuda. 2 U yuwan ta̱ tsugono a'wan ta'atsu a̱tsuma̱ a̱ Urishelima. Aala a mma va̱ yi ɗa Ma'aka usheli wa Uriyel diga a Gibiya. Uvon u da̱na̱ lo e ekere Abija na̱ Yerobowam. 3 Abija yuwan ta̱ uvon na̱ a̱soja a na a gurai uvon lon ukpakukupa ukpakuna̱shi (400,000), Yerobowam gba foɓo ta̱ a̱soja na a gurai uvon lon ukpakukupa ukpakukunla̱ (800,000).

4 A̱vu Abija isawan zuva Masasan ma Zemarayim za na ri ɗe a̱tsuma̱ e iɗa ya agaɗi ya Ifiramu, a̱vu u ya̱sa̱n uɗyo wa̱ yi u damma,<<Yerobowam na̱ Isra'ila suru, uwa numu! 5 Ashe, i reve a na A̱sulazuva A̱sula̱ a Isra'ila u ca ta̱ tsugono tsa Isra'ila e ekere a̱ Da̱wuda nu ugundo wa̱ yi e ekere a nzuwulai ma akpaɗi hali hali shi? 6 Suru na̱ ne Yerobowam ulobo wa Neba aagbashi a̱ Da̱wuda ulobo wa̱ Sulemanu u 'yon ta̱ a̱vu u 'ya̱sa̱a̱n zagbain va̱ yi a aci. 7 A̱vu Yerobowam ɓoloto ama a vama oɓolo na̱ a̱yi na aza awuya a na a yuwan tsushu'un na̱ Rehobowam ulobo wa Sulemanu, a mantsa mo ndolo Rehobowam ulobo u ɗa za na da̱na̱i nu ugbozu lon shi, agba u gura rono ne ele shi.

8 <<Gogo i ciga ta̱ a na yoo o kototo tsugono tsa̱ A̱sulazuva za na u zuwai o ugundo wa̱ Da̱wuda? Ye ene ta̱ aciya̱ɗu i ta̱ a̱bunda̱, a̱vu i tara musula̱ n na Yerobowam zuɗa̱i na o o'wo musula̱ n ɗu. 9 Ashe fo i gba̱ra̱ nan ganu A̱sulazuva, ozo o ugundo wa Haruna na̱ akapi a nan Levi shi? Agba waru i katalaa ta̱ aciya̱ɗu nan ganu cine akapi a nɗa a yuwain shi? Suru za na ta̱wa̱i no moggono a nan na̱ a̱giri'i a̱ cindere na wa tawa aciya̱yi, wo o'wo ta̱ ganu n musula̱ fo, za va̱ A̱sula̱ ɗa shi.

10 <<Amma a̱tsu gba, A̱sulazuva a ɗa A̱sula̱ a̱tsu, agba tsu 'yuwain shi. Waru tsu ta̱ nan ganu a na a yuwusaan A̱sulazuva a̱ga̱nda̱ limatan va Haruna, waru nan Levi a ta yuwusan ulinga oɓolo ne ele. 11 Agba a tsu casu ta̱ kucci vu ukula̱tosu na̱ mani'i ma̱ ma̱guru aza a na a̱ ri nu uyo'o u mawwa e ekere A̱sulazuva usana nu ulivu suru. A̱ tsu zuwa ta̱ opopofu na a tawai zuva va apada a na a̱ ri cece, waru a tsu daɓusa ta̱ ifitila i zinariya ulivu suru. Adama a na tsu ta yuwusan tsutoni nu udammu wa̱ A̱sulazuva A̱sula̱ a̱tsu, amma a̱vu i 'yuwan yi. 12 A̱sula̱ oto o oɓolo na̱ a̱tsu, a̱yi ɗa mogono ma̱ a̱tsu. Nan ganu waru a̱ ta̱ ivulusa̱ tsu avana na tsa yuwan uvon na̱ a̱ɗu. Ugundo wa Isra'ila, she i yuwan uvon na̱ A̱sulazuva A̱sula̱ a nkaya nɗu wan, adama a naa ya̱a̱ tsura̱ u lyuwu wa aci shi.>> 13 Ele lo, a̱vu Yerobowam da̱shi zuwa a̱soja a na a̱da̱na̱ lo upa'an a̱ wu, na a̱ 'ya̱wa̱ nu uvon uba̱ta̱ wa̱ a̱soja a Yahuda nu ucina̱. 14 A mantsa ma na a̱soja a Yahuda a vadalai na enei a̱soja a Yerobowam na a yuwan uvon ne ele suru, a̱vu a yuwan mesun a̱ tyo wu uba̱ta̱ wa̱ A̱sulazuva. A̱vu nan ganu e ivula̱ avana. 15 A̱vu a̱soja a Yahuda a̱ ya̱sa̱n uɗyo u le na a yuwan uvon. Ana a yuwain ne, A̱sula̱ a̱ tsura̱ ta̱ ulyuwu wa aci e ekere a Yerobowam na̱ aza a Isra'ila, a̱vu u zuwa le a suma elime ama a Abija na̱ a̱soja a Yahuda. 16 A̱vu a̱soja a Isra'ila a sumaa a̱soja a Yahuda. A̱sula̱ gba a ca ta̱ aza a Isra'ila e ekere a̱soja a Yahuda. 17 Abija na̱ a̱soja a̱yi o una ta̱ a̱soja na a gurai uvon wa aza a Isra'ila ukpakukupa ukpakuton (500,000). 18 Ne ɗa a̱ tsura̱i ulyuwu wa a aci wa aza a Isra'ila a mantsa'a. A̱soja a Yahuda a̱tsura̱ ta̱ ulyuwu wa a aci adama a na a zuwa ta̱ ucira u le uba̱ta̱ wa̱ A̱sulazuva A̱sula̱ a nkaya nle.

19 Abija yuwan ta̱ uvon na̱ Yerobowam a̱vu usaa yi iɗa ya Betel na̱ Yeshana na̱ Efuron na̱ mulyuci nle. 20 Yerobowam da̱shi da̱na̱ nu ucira shi a mantsa mo tsugono tsa̱ a̱yi suru a rana tsugono tsa a Abija. A̱sulazuva gba o kototo ta̱ Yerobowam a̱vu u kuwa̱.

21 Amma Abija da̱shishi ta̱ ucira. A̱vu u zuwa a̱ma̱ci kupa na̱ a̱za̱ a̱ na̱shi, a̱vu a matsayin muwun mo o olobo ushin ne ejere na̱ muwun me esheli kupa na̱ a̱za̱ a̱ ta̱li.

22 Akapi o ulinga u tsugono tsa Abija ni ili i na u yuwain ni ili i na u dammai a̱ tu pe uɗanu a̱tsuma̱ aatagada alabari a vumava̱sula̱ Iddo.