1 Ahaz da̱na̱ ta̱ na a'wan ushin a mantsa ma na wo o'woi mogono, u yuwan ta̱ tsugono tsa̱ Urishelima a'wan kupa na̱ a̱za̱ a̱ ta̱li. Agba u yuwan ili i na i ri mejege e ekere A̱sulazuva shi, cine akaya a̱yi Da̱wuda yuwain shi. 2 Ahaz yuwan ta̱ mmalu o ure wu ngono ma Isra'ila, waru u zuɗa̱ ta̱ a̱ma̱li a Ba'al adama a̱ga̱nda̱. 3 Reve u ca kucci vu ukula̱tosu o Uka̱ri wa Ben Hinom, a̱vu waru u ca olobo a̱yi kucci va akina. O tonishi re vi idaba vu nɗa n na A̱sulazuva a̱ gba̱ra̱i a̱ ma̱ka̱ka̱n ma aza a Isra'ila. 4 U casu ta̱ kucci nu ukula̱tosu wi ili i ma̱guru ba̱ta̱ va̱ a̱ga̱nda̱, ɗe zuva va agaɗi nu uɗanga u na u ri kpa̱la̱m.

5 Adama o ndolo a̱vu A̱sulazuva A̱sula̱ a̱yi a ca yi e ekere o mogono ma Suriya. A̱vu aza a Suriya a lyuwa yi nu uvon, a̱vu a̱ pura̱ ama a̱yi na̱ a̱bunda̱ a̱ tyo Dimaska.

Waru A̱sulazuva a ca yi ta̱ e ekere o mogono ma Isra'ila, za na lyuwa niyi nu uvon reve wu una yi a̱soja na̱ a̱bunda̱. 6 A̱tsuma̱ o uranu uta̱ Peka ulobo wa Remaliya una ta̱ a̱soja aza a Yahuda ukpakukupa ukpaku nu ukpakukupa ushin (120,000). Adama a na aza a Yahuda a vadalaa ta̱ A̱sulazuva A̱sula̱ nkaya nle ucina̱. 7 Zikiri vuma ɗa na gurai uvon lon diga a̱ lyuci va Ifiramu wu una ta̱ Ma'aseya ulobo u mogono na̱ Azirikam zagbain vu ukobu u mogono na̱ Elikana kambi mogono. 8 A̱vu aza a Isra'ila a̱ pura̱ a̱za̱ le agbashi aza a na a̱ shi e remei, ama ukpakukupa ukpakure (200,000), a̱ma̱ci no olobo ne esheli diga ama a Yahuda. Waru a̱ pura̱ ta̱ itana ya̱ a̱bunda̱ aza a na a tarai a̱ ka̱mba̱ a̱tsuma̱ a Samariya.

9 Amma vumava̱sula̱ va̱ A̱sulazuva za na tsu ɗe Oded da̱na̱ lo, a̱vu wu uta̱ adama a na wa ga'aton a̱soja a Isra'ila na a̱ ka̱mba̱i diga Samariya. A̱vu u damma le, <<Adama a na A̱sulazuva A̱sula̱ nkaya nɗu a yuwain upan na̱ Yahuda, ɗaɗa u ca nle e ekere a̱ɗu. Amma yu una le ta̱ wa'a shi a̱tsuma̱ o upan u ɗa hali na u rawai zuva. 10 Agba gogo i ta zama na ya̱a̱ ka̱mba̱to ali na̱ a̱ma̱ci a Yahuda na̱ a̱za̱ a̱ Urishelima agbashi a̱ɗu. A̱vu yi icina na i yuwayin A̱sulazuva a̱ A̱sula̱ a̱ɗu unusu? 11 Gogo, yu uwwa a̱mu! I ka̱mbuwa̱ a̱za̱ a̱ ɗu aza a Isra'ila na i pura̱i a̱ tyo tsugbashi, adama a na upan wa̱ A̱sulazuva u ta̱ aciya̱ɗu. >>

12 A̱vu azagbain o ro a̱tsuma̱ o ugundo wa̱ Ifiramu, Azariya ulobo wa Yehohana na̱ Berekiya ulobo wa Meshilemo na̱ Yehizikiya ulobo wa Shalum na̱ Amasa ulobo wa Hadilayi, a̱ 'yon e isawaton aza a na a̱ ri amarawa diga uba̱ta̱ o uvo'on. 13 A̱vu a damma le, <<Yaa uwa na agbashi o ndolo pa shi, adama a na ili yo ndolo u ta̱ rono tsu unusu e ekere A̱sulazuva. I ciga ta̱ na ya̱a̱ da̱shi tsu unusu? Adama a na unusu u tsu u yuwan ta̱ ɗe a̱bunda̱, waru upan wa̱ yi u ta aciya aza a Isra'ila.>>

14 A̱vu a̱soja'a a lyawa agbashi'i oɓolo ni itana i na a̱ pura̱i lo elime azagbai'in no oɓolo a ama'a suru. 15 A̱vu ama a na e ɗeyi ala ele a̱ 'yon a tara agbashi'i, waru na̱ diga pe a̱tsuma̱ e itana i na a̱ pura̱i'i reve oto aza a na a̱ da̱na̱i ataɓu itana. A zamiya le ta̱ itana yu otosu naa atan, ni ilyalya ni ili yo oso na̱ mani'i adama a na a sukuma antsu le. Waru aza a na a̱ da̱na̱i nu ucira shi a kumbato le ta̱ zuva vu nloli. A̱vu a̱ ka̱mba̱to le uba̱ta̱ wa̱ a̱za̱ le a̱ Jeriko, Lyuci vu Shuwa, a̱vu a̱ ka̱mba̱ Samariya.

16 A mantsa mo o ndolo ma ɗa Ahaz Mogono ma̱a̱ lyunguwa̱a̱ yi mogono ma Asuriya na wa kambai, 17 adama a na a̱za̱ a̱ Edom a̱ da̱shi ta̱ a̱ 'ya̱wa̱a̱ nu uvon uba̱ta̱ wa aza a Yahuda a̱vu a tara agbashi a̱ ka̱ra̱. 18 A̱vu aza a Filistiya a̱ 'ya̱wa̱ nu uvon e iɗa i mugaɗi na̱ Nege va Yahuda. A̱vu a lyuwa a usa iɗa ya Bet Shemesh na̱ Ajalon na̱ Gedero hali acina Soko na̱ Timna na̱ Gimzo oɓolo na̱ mulyuci n na n ri uka̱nda̱ruwu ne le, reve a̱ da̱nu pe. 19 A̱sulazuva a̱ ka̱ɗa̱to ta̱ aza a Yahuda adama a Ahaz mogono ma Isra'ila, adama a na u da̱shi ta̱ iwuya a̱tsuma̱ a Yahuda waru u da̱na̱ ta̱ nu ulambu wa̱ a̱ɓula̱ uba̱ta̱ wa̱ A̱sulazuva. 20 A̱vu Tiglat Filesa mogono ma Asuriya ma̱ ta̱wa̱ uba̱ta̱ wa̱ yi, reve u ca yi a̱tsuma̱lima̱ o una̱ wi ikambishi. 21 Ahaz mogono ma Isra'ila, ma̱ pura̱ ta̱ itana i ro diga a̱tsuma̱ A̱a̱'isamapaɗa a̱ A̱sulazuva, no ozo o ukobu u mogono, nu uba̱ta̱ wa azagbain a̱vu u ca mogono ma Asuriya. Agba ili ya̱ ndolo i kamba yi shi.

22 A mantsa ma̱ a̱tsuma̱lima̱ o Mogono Ahaz u da̱shishi ta̱ ulambu wa̱ a̱ɓula̱ e ekere A̱sulazuva. 23 U casu ta̱ kucci a̱ tyo uba̱ta̱ u musula̱ ma Dimaska, aza a na a lyuwa niyi nu uvon. Adama a na u dammai, <<Na wo o'woi musula̱ mu ngono ma Suriya n kamba le ta̱, a̱mu fo n ta ca le kucci adama a na aa kamba mu.>> Amma e le ɗa a̱ ta̱wa̱ niyi na̱ ma̱riya̱ oɓolo na̱ ma̱riya̱ ma aza a Isra'ila.

24 A̱vu Ahaz ɓoloto itana i na i ri ya̱ a̱tsuma̱ A̱a̱'isamapaɗa a̱ A̱sula̱ reve u tara le a̱ ka̱ra̱. A̱vu u ɓa̱ru suru na̱ntsu va̱ A̱a̱'isamapaɗa A̱sulazuva. A̱vu u suwa musa'a o ure suru a̱tsuma̱ a̱ mɓa̱nga̱ ma̱ Urishelima. 25 A̱tsuma̱ e ilyuci ya Yahuda suru Ahaz suwa ta̱ ba̱ta̱ va̱ a̱ga̱nda̱ na a ca kucci vu ukula̱tosu a̱ tyo uba̱ta̱ u musula̱ n ro, adama o ndolo u zuwa ta̱ A̱sulazuva A̱sula̱ a nkaya ma̱ yi a yuwan upan.

26 Akapi a linga tsugono tsa Ahaz na̱ re va̱ yi suru, diga o ufaru acina ukosu, a̱da̱na̱ ta̱ pe uɗanu a̱tsuma̱ aatagada alabari o ngono ma Yahuda na aza a Isra'ila. 27 Ahaz kuwa̱ ta̱ ucina nkaya ma̱ yi reve a̱ ciɗo yi a̱tsuma̱ a̱ lyuci va̱ Urishelima, amma a̱ ciɗo yi uba̱ta̱ u na a̱ ciɗosu ngono ma Isra'ila shi. A̱vu ulobo wa̱ yi Hezekiya wo o'wo mogono o una̱ wa̱ yi.