1 Sulemanu ca ta̱ udammu adama a na a suwa A̱a̱'isamapaɗa adama Aala A̱sulazuva nu ukobu u mogono adama aciya̱yi. 2 U ɗangula ta̱ ama ukpakukupa kupocindere (70,000) aza a na a̱ tsu purusa̱ itana, nu ukpakukupa kupakunla̱ (80,000) aza a na a tsu oɓoso aatali a agaɗi, na ama ukpakukupa uta'atsu na̱ ukpakuta̱li (3,600) aza a na a̱da̱na̱ a̱ ka̱lyuwusa̱ ulinga u le.

3 Sulemanu lyungu ta̱ ni ikaka i nda uba̱ta̱ wa̱ Hiram mogono ma Taya:

<< Lyunguwa̱a̱ mu na̱ ɗanga Sida ununa vu yuwayin Dada va̱ Da̱wuda na vu lyunguwa̱ niyi na̱ Seda na u suwai ukobu u na u da̱nuyi. 4 Amma gogo a̱mu ɗa nda e ifoɓi adama a na ma suwa A̱a̱'isamapaɗa adama Aala A̱sulazuva A̱sula̱ a̱ va̱, waru n tawai adama o ukula̱tosu wi ili i ma̱guru na adama a na a zuwa opopofu a na a tawai kuci, nu ucasu kucci vu ukula̱tosu suru vu usana nu ulivu nu urana wa ashibi na̱ a̱buki o woto u sa'avu na̱ a̱buki a na a zuwai a̱ A̱sulazuva A̱sula̱ a̱tsu. A̱yi nda a̱yi ɗa ili i na a zuwayi aza a Isra'ila na ri n yuwusan hali hali.

5 <<A̱a̱'isamapaɗa a na ma suwa u ta̱ da̱na̱ mgbain, adama a na A̱sula̱ a̱tsu a la'a ta̱ akapi a̱ musula̱ suru. 6 Amma zane ɗa rawai na wa suwa A̱a̱'isamapaɗa adama a̱yi, a̱yi na zuva va zuva gura tara niyi shi! A̱mu za ne ɗa na ma gura suwaa yi A̱a̱'isamapaɗa, she de uba̱ta̱ u na a̱da̱na̱ a̱ kula̱tosu kucci elime a̱yi.

7 <<Adama o ndolo lyawa na va̱a̱ lyunguwa̱ mu na̱ vuma na gurai ulinga u zinariya na̱ azurufa, na̱ rumushili ni irumu nu ushili u ma̱ɗiya̱ nu ushili u san na̱ a̱punda̱ a̱ mini ma̱ bulu na̱ za na waru gurai cu'un vu ulinga yi she'en shi, a na wa yuwan ulinga a̱tsuma̱ a Yahuda a̱ Urishelima oɓolo na ama a̱ va̱ na a gurai ulinga, aza a na Dada va̱ Da̱wuda foɓoi.

8 <<Reve waru vu lyunguwa̱ mu na akpata a sida, na aza a fir, na aza algumu diga a Lebanon, adama a na n reve ta̱ na ama a̱ wu a gura ta̱ mapaɗa ma akpata ɗe uba̱ta̱'a̱. Agbashi a̱ va̱ a ta yuwan ulinga oɓolo na̱ a̱za̱ a̱ wu, 9 na o ɓolotowo mu akpata a̱bunda̱, adama a na A̱a̱'isamapaɗa a na n cigai n suwa u ta̱ da̱na̱ mgbain na asalama lon. 10 N ta tsupa agbashi a̱ wu, aza na a paɗasa akpata, ukunzuwu ukpakukupa ushin (20,000) vi ishina, nu ukunzuwu ukpakukupa ushin (20,000) u yitabo, nu ukpakukupa ushin (20,000) wu ndele n mini ma̱ ina̱bi, nu ukpakukupa ushin (20,000) wu ndele n mani'in ma̱ zetun.>>

11 A̱vu Hiram mogono ma Taya lyunguwa̱a̱ Sulemanu nu usuwu u mepepelime, u damma, <<Adama a na A̱sulazuva a ciga ta̱ ama a̱yi, ɗaɗa u ɗangula nuwu mogono me le.>> 12 A̱vu Hiram dammisa, ica za va A̱sulazuva ɗa, A̱sula̱ a Isra'ila, za na yuwain zuva ni iɗa! Waru u ca ta̱ Mogono Da̱wuda ulobo wu ugbozu, za va aaci, nu urevu, za na a suwa A̱a̱'isamapaɗa adama A̱sulazuva nu ukobu adama aciya̱yi.

13 <<N ta̱ lyunguwa̱a̱ wu na̱ Huram Abi, vuma na gurai ulinga wu ukere lon, 14 za na mma va̱ yi diga o ugundo wa Dan ɗa, dada va yi vuma va Taya ɗa. U gura ta̱ ulinga na̱ zinariya na̱ azurufa na̱ rumushili na̱ rumu na aatali na akpata na̱ ushili u ma̱ɗiya̱ na̱ mini ma̱ bulu nu ushili san no okoro a sa'ani, waru u gura ta̱ cu'un vu ulinga vu ushe'en biti na a zuwa niyi na we she'en, u ta yuwan ulinga na̱ a̱za̱ o uguru wa̱ wu na aza a dada va̱ wu zagbain va̱ Da̱wuda.

15 <<Gogo lyawa zagbain va̱ lyunguwa̱a̱ agbashi a̱yi no oroci a yitabo na̱ yitabo oɓolo na̱ mani'i ma̱ zetun na̱ mini ma̱ inabi ma na vu yuwain nzuwulai. 16 A̱tsu waru tsu ta paɗa akpata diga a Lebanon aza na vu cigai suru reve tsu ta̱wa̱to le nge'en m mala ma Japa. A̱vu vu tara le agawan a̱ tyo Urishelima.>> 17 Sulemanu kece ta̱ omocin a na a̱ da̱na̱i a̱tsuma̱ a Isra'ila suru, ununa Dada va̱ yi Da̱wuda yuwain, agba a rawa ta̱ a̱bunda̱ ama ukpakukupa ukpaku nu ukpakukupa kupoton na aza ata'atsu nu ukpakuta̱li (153,600). 18 A̱vu u zuwa ama ukpakukupa kupocindere (70,000) o o'wo a̱za̱ e itana, ama ukpakukupa kupakunla̱ (80,000) o o'wo a̱za̱ she'en va atali a masasan, na ama ukpakukupa uta'atsu nu ukpakuta̱li (3,600) na a̱da̱na̱ a̱ ka̱lyuwusa̱ aza na a yuwusan ulinga adama a yuwan ulinga.