1 Ana yi ndolo kotoi a̱vu a̱za̱ a̱ Mowa na̱ Amon na̱ a̱za̱ o ro a Menuta a̱ ta̱wa̱ na a yuwan uvon na̱ Yehoshafat.

2 A̱vu ama o ro a̱ ta̱wa̱ a damma yi, <<Apa a̱soja a̱bunda̱ diga Edom a̱ tu ɗe upasu u mala a̱ ta̱wa̱ wu nu uvon. Gogo a rawa tu ɗe Hazazon Tamar>> za na a̱yi ɗa En Gedi. 3 Yehoshafat uwwa ta̱ wovon lon, a̱vu u zami urewesu wa̱ A̱sulazuva, a̱vu u ca udammu a yuwan akuli e iɗa ya Yahuda suru. 4 A̱vu ama e ilyuci yu upasu wa Yahuda oɓoloto adama a zami A̱sulazuva waru a yuwan izami yi ikambishi diga uba̱ta̱ wa̱ yi.

5 A̱vu Yehoshafat 'yon mishin elime o oɓolo a ama a Yahuda na̱ a̱za̱ a̱ Urishelima a̱tsuma̱ a̱ A̱a̱'isamapaɗa a̱ A̱sulazuva elime o ukowo u sa'avu. 6 A̱vu u 'ya̱sa̱n uɗyo a̱tsuma̱ a avasa u damma, <<A̱sulazuva A̱sula̱ nkaya ntsu, ashe a̱vu ɗa A̱sula̱ za na ri zuva shi? Ashe a̱vu ɗa va yuwusan tsugono tsa̱ tsugono tsu uvaɗi ma̱bula̱ shi? Ucira na̱ tsugbain a̱ ta̱ uba̱ta̱ wa̱ wu, waru babu za na rawai na woo rono na̱ a̱vu. 7 A̱vu A̱sula̱ a̱tsu, ashe a̱vu ɗa vu gba̱ra̱i nda̱na̱ta̱ mu nɗa nda esu ama a̱ wu aza a Isra'ila shi? Ashe a̱vu ɗa vu cayi n'utsa̱ ma̱ wu Ibrahim agadu e iɗa i nda hali hali shi? 8 A̱vu a̱ da̱nu pe a̱tsuma̱ e iɗa'a, waru pe a̱tsuma̱ a̱yi ɗa a suwa nuwu Uba̱ta̱ wa Akiza adama a cuwa aala a̱ wu. 9 Waru a ca ta̱ okolo adansa, <N na̱ a̱tsuma̱lima̱ a̱ ta̱wa̱ a̱tsu, ko uge'etosu, ko addama, ko ambulu. N na̱ tsundolo fara, tsu ta̱ ta̱wa̱ elime a̱ wu a̱tsuma̱ o U'wa u nda uba̱ta̱ u na a cuwai Aala a̱ wu, tsu shon a̱ tyo ya̱'a̱ wu adama atakaci a̱tsu, a̱vu waru vu ta uwwa reve vu usu tsu.>

10 <<Gogo gba, apa ili i na a̱soja Amon na̱ a̱za̱ a̱ Mowa na aza a Masasan ma̱ Seyi a yuwusan. Ele ɗa aza a na vu putsayi aza a Isra'ila na a̱ 'ya̱wa̱a̱ le nu uvon a mantsa ma na o uta̱i a̱tsuma̱ e iɗa ya Masar. Adama o ndolo, a̱vu a kanzu'wa, agba o kototo le shi. 11 To, gogo idana cine a cigai na a tsupaa a̱tsu! Ele ɗa a zama na a̱ gba̱ra̱ a̱tsu diga a̱tsuma̱ e iɗa i na vu ca ntsu wo o'wo agadu a̱tsu. 12 A̱vu A̱sula̱ a̱tsu, vee ge'eto le shi? Adama a na tsu ri nu ucira u na tsa yuwan uvon na̱ a̱soja a̱bunda̱, a na a̱ ri ɗe a̱ ta̱wa̱a̱ tsu nu uvon shi. Tsu reve ili i na tsa yuwan shi, adama o ndolo uba̱ta̱ wa̱ wu u ɗa tsu zuwai esu a̱tsu e izami yi ikambishi. >>

13 Suru ama a Yahuda a̱ da̱na̱ lo mishin elime A̱sulazuva oɓolo na̱ muwun ke'en ke'en nle na̱ a̱ma̱ci e le oɓolo na̱ muwun nle.

14 A̱vu Ruhu va̱ A̱sulazuva a̱ cipa̱a̱ Yahaziye ulobo wa Zakariya, mawun ma tsukaya ma Benaya ulobo wa Jeyiye, ulobo wa Mataniya diga o u'wa wa Asaf vu ugundo wa̱ Levi.

15 A̱vu u damma, <<Uwwai suru nɗu, na̱ ama a Yahuda suru, na̱ nda̱na̱ta̱ ma̱ Urishelima oɓolo na̱ Mogono Yehoshafat. Apa ili i na A̱sulazuva a damma n ɗu, <She yuwan wovon wan, ko i kuɗa okolo a̱ɗu wan, adama a̱ a̱soja a̱bunda̱ a nda wan. Adama a na uvo'on za ɗu ɗa shi, amma za va A̱sula̱ ɗa. 16 Nfa'an yu uta̱ i zura̱ i yuwan uvon ne le. A̱ ta̱ uta̱ nu Uwata wa̱ Ziz, waru i ta cina le za̱la̱ vu uka̱ri na toniyi a̱ tyo a̱tsumona a Yeruye. 17 Amma a̱ɗu ɗa ya yuwan uvo'on shi. A̱ɗu de i yuwan ifoɓi yu uvon goon, i dara aciya̱ɗu yi isawan kpen, ye ene cine A̱sulazuva a̱tsura̱ u lyuwu wa a aci adama a̱ɗu. A̱ɗu ama o upasu wa Yahuda na̱ Urishelima, she yu uwwa wovon wan ko na ya kuɗa okolo a̱ɗu, adama a na A̱sulazuva oto oɓolo na̱ a̱ɗu. Nfa'an yu uta̱ i yuwan uvon ne le!> >>

18 A̱vu Mogono Yehoshafat ka̱ɗa̱to nu urewesu wa̱ yi a̱ tyo e iɗa. Ne ɗa fo ama a Yahuda suru na̱ nda̱na̱ta̱ ma̱ Urishelima a yuwain. A yuwayin A̱sulazuva a̱ga̱nda̱. 19 A̱vu a̱za̱ a̱ Levi diga o ugundo wa̱ Koha na̱ a̱za̱ a̱ Kora a̱ 'yon mishin adama a cuwa A̱sulazuva A̱sula̱ a Isra'ila nu uɗyo gbain.

20 A̱vu a̱soja a Yahuda a̱ 'yon nu usana usana a̱ ka̱ra̱ a̱ tyo a̱ A̱tsumona a Tekowa. A mantsa ma na a̱ ri a̱ mota̱a̱ a̱vu Mogono Yehoshafat me e isawan u damma le, <<Uwwa numu, a̱ɗu ama a Yahuda na̱ nda̱na̱ta̱ ma̱ Urishelima. I ca okolo a̱ɗu uba̱ta̱ wa̱ A̱sulazuva A̱sula̱ a̱ɗu, i ta̱ tsura̱ ulyuwu wa a aci. Waru i ca okolo a̱ɗu uba̱ta̱ wa ama̱sula̱ a̱yi, i tsura̱ ulyuwu we elime.>> 21 A mantsa ma na u yuwain a̱sa̱la̱ na a ama, a̱vu u ɗangula ama a na a̱ ka̱ra̱ elime a̱ a̱soja na a̱ 'ya̱sa̱n ishipa yi ica a̱ tyo uba̱ta̱ wa̱ A̱sulazuva, na a cuwusa niyi adama e isa'ani ya akiza a̱yi, adansa,

<<I godyowo A̱sulazuva,

adama a na icigi ya̱ yi i tsu vadala shi hali hali.>>

22 A mantsa ma na e remei ishipa yi ica'a, a̱vu A̱sulazuva a vawan a̱soja a Amon na̱ a̱za̱ a̱ Mowa na̱ a̱za̱ e iɗa ya Masasan ma̱ Seyi, a̱vu a̱soja'a a̱ ra̱pula̱ e teme uvon va̱ni le. 23 A̱vu a̱soja a̱ Amon na̱ a̱za̱ a̱ Mowa a̱ 'yon na a̱ riya̱a̱ nda̱na̱ta̱ m Masasan ma̱ Seyi adama o kototo le waru a̱ rukutsa̱ le kpa̱ra̱. A mantsa ma na o kotoi wupaɗu wa ama a̱ Seyi, reve a̱ ka̱mba̱ a̱ munulai va̱ niyi le.

24 A mantsa ma na a̱ a̱soja a Yahuda a rawai aagaɗi a na a gura ene a̱tsumona uba̱ta̱ u na o oɓolo a̱soja o ndolo a̱ ri, a̱vu e ene a̱kwa̱kwa̱ a ama uba̱ta̱ suru! Babu za na la'ai. 25 Ana Yehoshafat na̱ a̱soja a̱yi a rawai uba̱ta̱ u na a̱ pura̱ itana yu uvon, a̱vu acina itana ya̱ a̱bunda̱ ni itana i wotosu ni ili yu ulobonu ya̱ a̱bunda̱ na a gura tanu le suru shi. Hali she na a yuwain rana ta'atsu ɗaɗa a gura pura̱i itana'a suru. 26 O urana wa̱ na̱shi a̱vu oɓoloto o Uka̱ri wa Beraka, a̱vu a yuwan ica a̱ tyo uba̱ta̱ wa̱ A̱sulazuva. Adama o ndolo a ɗa a̱ tsu ɗe uba̱ta̱'a̱ Uka̱ri wa Beraka* hali na ana'an. 27 A̱vu ama a Yahuda a̱ ka̱mba̱ a 'wa suru. A̱vu Mogono Yehoshafat walaa le elime a̱ ka̱mbusa̱ a̱tsuma̱ a̱ Urishelima na̱ ma̱za̱nga̱, adama a na A̱sulazuva a ca le ta̱ ulyuwu wa a aci e ekere n'yuwatan nle. 28 Reve a uwa a̱tsuma̱ Urishelima a̱ ka̱ra̱ a̱ 'ya̱wa̱ A̱a̱'isamapaɗa a̱ A̱sulazuva na̱ ma taɗa me igaraya ni ikumburu na̱ wi ivulusa̱ wa avana.

29 A mantsa ma na akapi a̱ nda̱na̱ta̱ n na ri uka̱nda̱ruwu ne ele a uwwai alabari e ili i na A̱sulazuva a yuwayin n'yuwatan ma aza a Isra'ila, reve wovon wa̱ A̱sulazuva e reme ele. 30 Adama o ndolo ɗa tsugono tsa̱ Yehoshafat tsa̱ da̱na̱i na asuvu nden babu uvon. Adama a na A̱sula̱ a ca yi ta̱ nden n lafiya uba̱ta̱ suru.

31 Yehoshafat yuwan ta̱ tsugono tsa a Yahuda. U da̱na̱ ta̱ na̱ a'wan mata'atsu no ozo ton a mantsa ma na u temei tsugono. Waru u yuwan tsugono a̱tsuma̱ a̱ Urishelima a'wan ushin no ozo o ton. Aala a mma va̱ a̱yi ɗa Azuba usheli wa Shilihi. 32 U yuwan ta̱ mmalu a̱tsuma̱ o ure u na u ri mejege tsa dada va̱ a̱yi Asa, u lyawa ure'e shi. U yuwan ta̱ ili i na i ri mejege o urewesu wa̱ A̱sulazuva. 33 Suru na̱ ne, u kototo ba̱ta̱ va̱ a̱ga̱nda̱ shi, waru ama a Yahuda a zuwa okolo le uba̱ta̱ wa̱ A̱sula̱ nkaya nle shi.

34 Suru akapi o ulinga u na Yehoshafat yuwain, diga o ufaru acina o ukosu, a̱da̱na̱ ta̱ pe uɗanu a̱tsuma̱ aatagada a alabari a̱ Yehu ulobo wa Hanani. Waru a̱ ta̱ uɗanu a̱tsuma̱ aatagada a alabari o ngono ma Isra'ila.

35 Ana a̱yi ndolo kotoi, a̱vu Yehoshafat mogono ma Yahuda yuwan muwwulai na̱ Ahaziya mogono ma Isra'ila za na yuwain iwuya. 36 A̱vu uɓolo ukere na̱ yi a yuwan antsun a̱ mini adama a̱ ma̱ 'ya̱wa̱ ma Tarshishi. Uba̱ta̱ u na a yuwain antsun a̱ mini'i a Eziyon Geba. 37 A̱vu Eliyaza ulobo wa Dodawahu diga Maresha ɓara Yehoshafat u damma, <<Na wo o'woi vu yuwain tsu'utsa̱ na̱ Ahaziya, A̱sulazuva oto kototo suru ili i na vu suwai.>>Adama o ndolo a̱vu antsun a̱ mini'i oɓoso a gura yuwan mmalu waru a̱ tyo Tarshishi shi.