1 A̱vu Sulemanu teme usaa wa̱ A̱a̱'isamapaɗa a̱ A̱sulazuva a̱tsuma̱ a̱ Urishelima a Masasan ma Moriya, uba̱ta̱ u na A̱sulazuva o rocoyi aciya̱yi uba̱ta̱ wa̱ Da̱wuda. Uba̱ta̱ wo osoroto a Aruna vuma va Jebusiya, uba̱ta̱ u na Da̱wuda foɓoi. 2 Reve u reme usaa o urana we ire u woto we ire a'wan a̱ na̱shi o tsugono tsa̱ a̱yi.

3 A̱a̱'isamapaɗa a na Sulemanu suwayi A̱sulazuva washin wa̱ yi u rawa ta̱ uga'an mishin udasu kupa kucci na̱ washin udasu mata'atsu. 4 Ukobu u na u ri lo elime a̱ A̱a̱'isamapaɗa'a una̱ta̱ ɗa na̱ washin wa̱ A̱a̱'isamapaɗa'a udasuwu ushin waru uga'an wa̱ yi mishin udasuwu ukpaku nu ushin.

A̱vu u sura suru a̱tsuma̱ a̱yi na̱ zinariya can. 5 A̱vu u ku'wa̱ asula a gbain na akpata a fir, a̱vu u sura le na̱ zinariya can. Reve u yuwan yironishi yo oroci aɗanga vu shuwa na akani ɗe. 6 A̱vu wu kala A̱a̱'isamapaɗa'a na atali e ikebe. Waru zinariya na u yuwayin ulinga zinariya va Farwayim ɗa. 7 U sura ta̱ A̱a̱'isamapaɗa'a na̱ zinariya na akpata a na a̱ kuruyi zuva na akpata a̱ na̱ntsu na̱ na̱ntsu va̱ A̱a̱'isamapaɗa, a̱vu a yuwan yironishi i nan Kerobobi o ɓaɓu'u.

8 U suwa ta̱ uba̱ta̱ u na u la'ai Akiza una̱ta̱ na̱ A̱a̱'isamapaɗa'a, uga'an wa̱ yi udasuwu mata'atsu washin wa̱ yi waru udasuwu mata'atsu. A̱vu u sura a̱tsuma̱ a̱yi nu ukpakuta̱li (600) u zinariya can. 9 Ume wi ikusa i zinariya u rawa ta̱ kilo ukpakuton na̱ kupocindere (570). Waru u sura ta̱ asula a zuva na̱ zinariya can.

10 Sulemanu she'en ta̱ oroci e ikerobobi e re vu ɗanga, a̱vu sura le na̱ zinariya can reve u zuwa le Uba̱ta̱ u na u La'ai Akiza. 11 Uga'an wa̱ evelu e kerobobi e re'e, n na̱ a̱ buba̱ruwa̱ le a ta rawa udasu mata'atsu, adama a na suru uvelu uta̱ u kerobobi u rawa ta̱ udasuwu ucindere na akapi. A̱vu kerobi vu ufaru'u u buba̱ruwa̱ uvelu uta̱ wa̱ yi u ju'wa̱n uɓaɓu wa̱ A̱a̱'isamapaɗa'a na̱ yi, reve u buba̱ruwisa̱n uvelu wa̱ i re u ju'wa̱n uvelu wu za va̱ yi. 12 Ne ɗa waru kerobi va̱ re'e wu ba̱ruwa̱i uvelu uta̱ wa̱ yi u ju'wa̱in za va̱ yi na̱ yi, reve wu buba̱ruwisa̱n uvelu wa̱ i re u ju'wa̱n uɓaɓu wa̱ A̱a̱'isamapaɗa. Uga'an wu uvelu biti udasuwu ucindere u ɗa na akapi. 13 Uga'an we evelu e ikerobobi o ndolo na̱ a̱ ba̱ruwa̱ le a ta rawa udasuwu mata'atsu. A̱ da̱na̱ ta̱ mishin a̱ ka̱lyuwusa̱ aasula a gbain.

14 U yuwan ta̱ apalutsu adama o uba̱ta̱ u na u la'ai akiza a̱ mini ma̱ bulu na̱ za vu ushili u mini u ma̱ɗiya̱ na̱ za shili san no okoro a sa'ani, reve a yuwan yironishi yo oroci e ikerobobi zuva va̱ yi.

15 Elime A̱a̱'isamapaɗa'a u yuwan ta̱ lo atsura e re, ele ra a̱da̱na̱ ta̱ udasuwu ushin na̱ a̱za̱ a̱ cindere, waru atsura suru a̱ da̱na̱ na̱ ta̱ eegbezu a na a rawai udasuwu ucindere na akapi. 16 U yuwaan ta̱ eegbezu atsura biti yikalishi ya akani za na u ka̱nda̱ruwa̱i eegbezu atsura'a. Waru u yuwan ta̱ oroci o uɗanga u muwun m peme ukpaku ukaɓulai zuva va akani'i. 17 A̱vu u shuwa̱ atsura'a eleme a̱ A̱a̱'isamapaɗa'a, za ta̱ a̱ ka̱lyuwusa̱ uyagi za ta̱ waru ugana. Za na ri a̱ ka̱lyuwusa̱ uyagi u ɗe yi ta̱ Yakin za vu upasu wu ugana waru Buwaza.