1 Amaziya da̱na̱ ta̱ na̱ a'wan ushin no ozo o ton na wo o'woi mogono, u yuwan ta̱ tsugono tsa a'wan ushin na̱ kuci a̱ Urishelima. Aala a mma va a̱yi ɗa Yehowadi diga Urishelima. 2 U yuwan ta̱ ili i na i ri mejege e ekere A̱sulazuva, amma u lamba unusu okolo a̱yi shi. 3 A mantsa ma na we enei tsugono tsa̱ yi tsa̱ shuwa̱ ta̱, a̱vu wu una azagbain a na o unai dada va̱ yi Yowash mogono. 4 Amma wu una olobo e le shi, u yuwan ta̱ cine u ri uɗanu a̱ wila̱ a̱tsuma̱ a aatagada a Musa. Uba̱ta̱ u na A̱sulazuva a dammai, <<She o una nan dada adama a̱ muwun nle wan, ko o una muwun adama a nan dada wan, za suru ta̱ kuwa̱ adama o unusu wa̱ yi.>>

5 A̱vu Amaziya ɓoloto ama o ugundo wa Yahuda a̱vu u zuwa le o una̱ wu 'wa le e ekere a nan yali vu ukpakukupa na̱ vu ukpaku ukpaku a̱tsuma̱ a Yahuda na̱ Banyami suru. A̱vu e kece aza a na a̱ ri na̱ a'wan ushin a̱ tyo zuva, a̱vu a̱ tsura̱ ali ukpakukupa ukpakuta'atsu (300,000) aza a na a rawai uvon, aza a na a gura guza̱ ibata na̱ a̱ra̱ga̱. 6 Waru u kopo ta̱ a̱soja a na a gurai uvon ali ukpakukupa ukpaku (100,000) diga e iɗa ya Isra'ila na̱ azurufa na rawai kilo ukpakukupa uta'atsu nu ukpakuna̱shi (3,400).

7 Amma a̱vu vuma va̱ A̱sula̱ ta̱wa̱ ya̱ a̱yi u damma, <<A̱vu mogono, she vu lyawa a̱soja a Isra'ila a̱ ka̱ra̱ oɓolo na̱ vu wan, adama a na A̱sulazuva a̱ ri oɓolo na aza Isra'ila ko na ama a Ifiramu shi. 8 Ko na̱ shi vu 'ya̱wa̱ vu yuwan uvon nu ugbamu wo okolo, A̱sula̱ a ta vari wu e ekere a n'yuwatan ma̱ wu, adama a na A̱sula̱ a̱ ta̱ nu ucira u na wa wawa ko waru na wa vari.>>

9 A̱vu Amaziya ece vuma va̱ A̱sula̱'a̱, <<Gogo cine ma yuwan adama a azurufa ukpakukupa uta'atsu nu ukpakuna̱shi (3,400) u na n tsupai adama a̱ a̱soja a Isra'ila?>>

A̱vu vuma va̱ A̱sula̱'a̱ u usu, <<A̱sulazuva a ta ca wu ili i na i la'ai ndolo a̱bunda̱.>>

10 A̱vu Amaziya bete'we a̱soja a na a̱ ta̱wa̱i diga Ifiramu a̱ ka̱mba̱ o u'wa. A̱vu a yuwan upan na aza a Yahuda a̱vu a̱ ka̱ra̱ a̱ ka̱mba̱ o u'wa nu upan lon.

11 Amaziya yuwan ta̱ okolo o ugbamu a̱vu u ka̱ra̱ na̱ a̱soja a̱yi a̱ tyo upasu wu Uka̱ri wa Akpaɗi, uba̱ta̱ u na wu unai ali a Seyi ukpakukupa kupa (10,000). 12 A̱soja a Yahuda e reme ta̱ ali wuma u le ukpakukupa kupa, a̱vu a tara le a̱ tyo zuva va aatali a̱vu a vari shi le e iɗa adama suru nle a̱ rukutsa̱ miri miri.

13 Amma a̱soja a na Amaziya ka̱mba̱toi na a̱ 'ya̱wa̱ uvon a̱ riya̱a̱ ta̱ ilyuci ya Yahuda na̱ Samariya hali a̱ tyo Bet Horon. O una ta̱ ama ukpakukupa uta'atsu (3,000), a̱vu a̱ pura̱ itana ya̱ a̱bunda̱.

14 A mantsa ma na Amaziya ka̱mba̱i diga uba̱ta̱ u mona ma̱ a̱za̱ a̱ Edom, a̱vu u ta̱wa̱ na̱ musula̱ ma̱ a̱za̱ a̱ Seyi. A̱vu u zuwa le na wo o'wo musula̱ ma̱ yi, a̱vu u ka̱ɗa̱towa̱ le waru u casu le kucci vu ukula̱tosu. 15 Amma a̱vu A̱sulazuva a yuwan upan na̱ Amaziya lon, a̱vu u lyunguwa̱a̱ yi na̱ vumava̱sula̱, na dammai, <<Adama a̱ nye ɗa vu zamiyi musula̱ ma a ama a nda aza a na a gura wawa ama e le diga e ekere a̱ wu shi?>>

16 A̱yi pe a̱tsuma̱ adanshi, a̱vu Amaziya usu yi u damma, <<Uwwa ne'e urana u ne u ɗa tsu katala nuwu za na a̱da̱na̱ a casu mogono a̱sa̱la̱? Rungwa̱! Ko n zuwa o una wu?>>

A̱vu vumava̱sula̱'a̱ u ɓa̱ru una̱ wa̱ yi, amma u damma ta̱, <<N reve ta̱ a na A̱sulazuva a yuwan ta̱ ifoɓi i na wo o kototo wu, vu yuwan ta̱ ili ya nda adama a na vu kuɗa̱i a uwwa a̱sa̱la̱ a̱ va̱.>>

17 Ana Amaziya mogono ma Yahuda ma zamiyi a̱sa̱la̱ uba̱ta̱ wa aza a na a casu yi a̱sa̱la̱, a̱vu u lyunguwa̱ Yowash ulobo wa Jehoha ulobo wa Yehu mogono ma Isra'ila, nu udammu, <<Ta̱wa̱, lyawa tsu yuwan esu na̱ esu.>>

18 Amma Yowash mogono ma Isra'ila ma̱ ka̱mbuwa̱ ta̱ na̱ adanshi e ekere Amaziya mogono ma Yahuda u damma, <<Awanda A̱tsuma̱ a Lebanon lyunguwa̱a̱ ta̱ uɗanga u Sida u Lebanon ni ikaka, <N ciga ta̱ na va ca ulobo u va̱ usheli wa̱ wu lolo.> Amma a̱vu nama vu una na ri a̱ ma̱ka̱ra̱ wu dasa awanda'a. 19 Agba a̱vu ɗa nda va̱ 'ya̱susa̱n aciya̱wu va adansa n tsura̱ ta̱ ulyuwu wa aci e ekere a̱ Edom, agba gogo vu ta̱ rocosu aciyogbamu nu uvaɗu. Amma vi isawan o u'wa! Adama nye vu ri e izami yi nla̱ngi na va̱a̱ ta̱wa̱a̱ aciya̱wu na̱ ma̱riya̱ oɓolo na̱ ma̱riya̱ ma Yahuda fo?>>

20 Amma suru na̱ ne, Amaziya 'yuwan ta̱ na wa uwwa, adama a na A̱sula̱ a ɗa a zuwai wo o'wo ne, adama a na wa ca le e ekere a Yehowash, adama a na a vadala ta̱ a yuwusan musula̱ ma̱ Edom a̱ga̱nda̱. 21 A̱vu Yowash mogono ma Isra'ila ma̱ riya̱a̱ le nu uvon. A̱vu a̱yi na̱ Amaziya mogono ma Yahuda a yuwan elime ne elime uba̱ta̱ o uvon ɗe Bet Shemesh a̱tsuma̱ a Yahuda. 22 A̱vu aza a Yahuda o sowo a̱tsuma̱lima̱ e ekere aza a Isra'ila, a̱vu za suru suma a̱ tyo o u'wa wa̱ yi. 23 A̱vu Yehowash mogono ma Isra'ila me reme Amaziya mogono ma Yahuda ulobo wa Yowash ulobo wa Ahaziya ɗe Bet Shemesh. A̱vu Yehowash ta̱wa̱ na̱ Amaziya a̱tsuma̱ a̱ Urishelima a̱vu wu ɓoso ukari wa̱ Urishelima diga o Uwata wa Ifiramu hali acina Uwata wu Mɓa̱nga̱, za na ri alanga udasuwu ukpaku kupota̱li (600). 24 U pura̱ ta̱ zinariya na̱ azurufa suru na akapi e itana ya̱ A̱a̱'isamapaɗa a̱ A̱sula̱ na da̱na̱i e ekere Obed Edom suru, oɓolo nu utsuru wu ukobu u mogono suru na ama na u pura̱i a̱vu u ka̱mba̱ Samariya.

25 Amaziya ulobo wa Yowash mogono ma Yahuda yuwan ta̱ a'wan kupa no ozo ton na Yehowash ulobo wa Jehoha mogono ma Isra'ila ma̱ kuwa̱i. 26 Akapi o ulinga u tsugono tsa a na Amaziya yuwain, diga o ufaru acina ukosu a̱da̱na̱ ta̱ na̱ ta̱ pe uɗanu a̱tsuma̱ aatagada alabari o ngono ma Yahuda na̱ Isra'ila. 27 Diga a mantsa ma na Amaziya lyawai i toni ya̱ A̱sulazuva, a̱vu ama a Urishelima oɓolo a aci adama a na o unai, a̱vu u suma a̱ tyo Lakish, amma a̱vu a̱ lyunguwa̱ yi na ama a̱ 'ya̱wa̱ Lakish reve o unai ɗe. 28 A̱vu a tara lipu va̱ yi zuva vi ido, a̱vu a̱ ciɗo yi oɓolo na̱ nkaya ma̱ yi a̱tsuma̱ a̱ Lyuci va Da̱wuda a Yahuda.