1 A̱tsuma̱ a'wan a̱ cindere a̱vu Yehoyida ganu yuwan okolo o ugbamu, a̱vu u yuwan akucunu na̱ nan yali o oɓolo o ukpaku ukpaku: Azariya ulobo wa Yeroham na̱ Isma'ila ulobo wa Yehohana na̱ Azariya ulobo wa Obed na̱ Ma'aseya ulobo wa Adaya na̱ Elishafa ulobo wa Zikiri, 2 o uta̱ a̱ kuru ni iɗa ya Yahuda reve oɓoloto a̱za̱ a̱ Levi na azagbain a 'wa va aza a Isra'ila diga e ilyuci suru. Ana a̱ ta̱wa̱i a̱tsuma̱ a̱ Urishelima, 3 a̱vu oɓolo suru a yuwan nzuwulai na̱ mogono a̱ A̱a̱'isamapaɗa a̱ A̱sula̱.

A̱vu Yehoyida ganu damma le, <<Apa ulobo u mogono, za na a lyuwa tsugono cine A̱sulazuva a yuwain nzuwulai adama o ugundo wa̱ Da̱wuda. 4 Apa ili i na ya yuwan: A mantsa ma na nan ganu na̱ nan Levi a̱ ta̱wa̱i na a yuwan ulinga a̱tsuma̱ o urana wa Ashibi, za ta̱ a̱tsuma̱ aza a ta'atsu a̱ ɗu a ta yuwan ipiri yu una̱ntsu, 5 za ta̱ a̱tsuma̱ aza a ta'atsu a̱ ɗu waru u ta̱ ka̱ra̱ a̱ tyo o u'wa u mogono, za ta̱ a̱tsuma̱ aza a ta'atsu gba u te e isawan uba̱ta̱ wu una̱ntsu wi ikyun wu uwata. Suru akapi ama o to ɓoloto o ukowo wa̱ A̱a̱'isamapaɗa a̱ A̱sulazuva. 6 She i lyawa nanza uwa pe a̱tsuma̱ A̱a̱'isamapaɗa a̱ A̱sulazuva wan, nan ganu ɗa goon na̱ nan Levi aza a na a yuwan a̱ga̱nda̱ pe ɗa a uwa adama a na le aza akiza ɗa. Amma akapi ama suru a yuwan tsutoni ni ili i na A̱sulazuva a damma nle. 7 Nan Levi a̱ ta̱ ka̱nda̱ruwa̱ mogono'o, suru nle a̱ ta̱ guza̱ matsun me pe'eni e ekere ele. Suru za na ta̱wa̱i adama a na wa uwa pe A̱a̱'isamapaɗa'a a̱ ta̱ o unai. Yi isawan zuzu na̱ mogono'o uba̱ta̱ u na u tyo yi biti. >>

8 A̱vu nan Levi na̱ akapi ama a Yahuda suru a yuwan ili i na Yehoyida ganu damma nle suru. A̱vu azagbain a̱ ta̱wa̱ na aza a na a yuwan ulinga'a, na aza a na aa lyawa ulinga o urana wa Ashibi'i, adama a na Yehoyida ganu lyawa nanza na wa̱ ka̱ra̱ a̱ tyo o u'wa shi diga oɓolo'o. 9 A̱vu Yehoyida ganu ca nan yali vu kpaku kpaku ibata na̱ a̱ra̱ga̱ a gbain gbain na̱ a̱za̱ ke'en ke'en a̱za̱ a̱ Mogono Da̱wuda na da̱na̱i A̱a̱'isamapaɗa a̱ A̱sula̱. 10 A̱vu u zuwa ama na a̱da̱na̱ u ka̱nda̱ruwu na̱ mogono, za suru ni itana yu uvon e ekere a̱yi, zuzu na̱ mogono na̱ masa'a na̱ A̱a̱'isamapaɗa, diga upasu wu uyagi acina upasu wu ugana wa̱ A̱a̱'isamapaɗa.

11 A̱vu Yehoyida ganu no o olobo a̱yi o uta̱a̱ ulobo u Mogono, a̱vu o oto yi okokolo, a̱vu a cayi aatagada a nzuwulai, a̱vu o'wo oto yi mogono. A̱vu a̱ tsuwa̱yin mani'in a sala, <<Wuma wa̱ wu u jima, mogono!>>

12 Ana Ataliya uwwai elemu na̱ cine ama a̱ ri e ilaɗi na a yuwusayin ica ya aala o mogono, a̱vu u ka̱ra̱ u cina le pe A̱a̱'isamapaɗa A̱sulazuva. 13 Ana u ka̱lyuwa̱i, a̱vu we ene mogono mishin atsura a̱yi o una̱ntsu. Azagbain na aza a na e ivulusa̱ avana uka̱nda̱ruwu na̱ mogono, waru ama a nɗa'a suru a yuwusan ta̱ ma̱za̱nga̱ na̱ ivulusa̱ wa avana, na ashipi ni itana i malapa a matara me ishipa. Reve Ataliya kakara itana ya̱ yi u sala, <<I paala mu ta̱! I paala mu ta̱!>>

14 A̱vu Yehoyida ganu lyungu nan yali o oɓolo o ukpaku ukpaku, aza a na a̱ ri azagbain o oɓolo, a̱vu u damma le: <<Ta̱wa̱i na̱ yi e memere ma̱ a̱soja, a̱vu yu una za na toni niyi biti na̱ matsun me pe'eni.>> Adama a na ganu damma ta̱, <<She yu unai pa A̱a̱'isamapaɗa a̱ A̱sulazuva wan.>> 15 Reve e reme yi o uta̱ yi a̱ tyo o una̱ntsu u na ido ya usaan o ukobu u mogono, a̱vu o unai ɗe.

16 A̱vu Yehoyida yuwan nzuwulai a̱yi na ama oɓolo na̱ mogono na o to o'wo ama A̱sulazuva. 17 A̱vu suru ama a̱ ka̱ra̱ a̱ tyo a̱a̱'isa̱ a Ba'al, a̱vu o ɓosoi she e iɗa. A̱vu a̱ rukutsa̱ musa'a na̱ musula̱ ma̱ a̱yi a̱vu waru o una Matan ganu va Ba'al e elime a musa'a.

18 A̱vu Yehoyida zuwa aza a na a yuwan ipiri ya̱ A̱a̱'isamapaɗa a̱ A̱sulazuva e ekere a nan ganu, aza a na ele ɗa nan Levi, aza a na Da̱wuda foɓoi a̱da̱na̱ a yuwusan ulinga a̱ A̱a̱'isamapaɗa, a ca kucci vu ukula̱tosu uba̱ta̱ wa̱ A̱sulazuva, cine u ri uɗanu a̱tsuma̱ a̱ wila̱ wa̱ Musa, na̱ ma̱za̱nga̱ ni ishipa ununa Da̱wuda dammai. 19 Waru u zuwa ta̱ a̱za̱ e ipiri o una̱ntsu wa̱ A̱a̱'isamapaɗa a̱ A̱sulazuva, adama za na ri idaba suru uwa wan.

20 U tara ta̱ oɓolo na̱ yi nan yali o ukpaku ukpaku, na azagbain a ama na azagbain a̱ lyuci na̱ suru ama e iɗa, a̱vu a̱ cipa̱to mogono diga A̱a̱'isamapaɗa a̱ A̱sulazuva. A̱vu a uwa nu una̱ntsu wa zuva a̱vu a̱ da̱na̱to mogono ootogu o tsugono. 21 A̱vu ama e iɗa'a suru a yuwan ma̱za̱nga̱. Lyuci'i waru u tsura̱ asuvu nden, adama a na o una ta̱ Ataliya na̱ matsun me pe'eni.