1 U tara ta̱ Sulemanu a'wan ushin na u suwai A̱a̱'isamapaɗa a̱ A̱sulazuva oɓolo nu ukobu wa̱ yi, 2 Sulemanu da̱shi ta̱ suwisa ilyuci i na Huram ca niyi. A̱vu u zuwa pe ama a Isra'ila a̱ da̱nu pe. 3 A mantsa mo ndolo ma ɗa Sulemanu yuwain uvon na̱ lyuci va Hamat Zoba a̱vu u usai. 4 A̱vu u da̱shi suwa lyuci va Tadmo za na ri a̱tsumona, na̱ suru ilyuci yi izuwa yu upasu wa Hamat. 5 A̱vu u da̱shi suwa ilyuci ya Bet Horon vo Gon na̱ Bet Horon va̱ Za̱la̱ reve wo o'woto le ilyuci yu ukari vu ucira. A̱vu u suwaa le na̱ntsu gbain na a̱ tsu katsu ni irumu. 6 Sulemanu suwa ta̱ lyuci va Ba'ala ni ilyuci yi izuwa na̱ za na a yuwan aguɓa e ido ya̱ yi oɓolo na̱ za vi izuwa yi ikeke yi ido yu uvon ya̱ yi. Waru Sulemanu suwa ta̱ suru ili i na u foɓoi na wa suwa a̱tsuma̱ a̱ Urishelima na̱ Lebanon nu ukosu wu upasu u tsugono tsa̱ yi.

7 Ama a na a buwai suru aza a Hitiya na̱ Amoriya na̱ Periziya na̱ Hiviya na̱ a̱za̱ a̱ Jebusiya aza a Isra'ila ɗa shi, 8 ele gundo u na u buwai a̱tsuma̱ e iɗa'a aza na aza a Isra'ila o kototoi shi, ele ɗa aza a na Sulemanu zuwai ulinga wu usa̱n cine u ri ana'an. 9 Amma Sulemanu zuwa aza a Isra'ila ulinga wu usa̱n shi, ele ɗa a̱soja a̱yi na̱ nan yali ya̱ a̱soja na̱ nan yali yi ikeke yi ido na akumbi e ido ya̱ a̱yi. 10 Waru ele ɗa azagbain o ulinga o Mogono Sulemanu, azagbain ukpaku ure na̱ kupoton (250) na̱ da̱na̱ e idanasa ama.

11 A̱vu Sulemanu ta̱wa̱ nu usheli wa Firi'awuna diga a̱ Lyuci va̱ Da̱wuda a̱ tyo o ukobu u na u suwaa niyi. Adama a na u damma ta̱ <<Ka va̱ a̱ da̱nu a̱tsuma̱ o ukobu wa̱ Da̱wuda mogono ma Isra'ila shi, adama a na suru uba̱ta̱ u na Akpati a̱ A̱sulazuva a̱ ri, uba̱ta̱ u ɗa wa akiza.>>

12 A̱vu Sulemanu ca kucci vu ukula̱tosu a̱ tyo uba̱ta̱ wa̱ A̱sulazuva a Masa'a ma na u suwai elime o ukobu wa̱ A̱a̱'isamapaɗa A̱sulazuva'a. 13 U ca ta̱ ununa a zuwai a yuwan wu urana suru cine Musa zuwai: Ukula̱tosu adama a rana va Ashibi, na̱ A̱buki o Woto u Sa'avu na̱ suru mantsa ma̱ a̱buki a ta'atsu a'wan na̱ A̱buki Opopofu a na a̱ ri na̱ Wolilo shi na̱ A̱buki a Ajuma Ajuma na̱ A̱buki o Ogodo. 14 Ununa dada va̱ yi Da̱wuda foɓoi, Sulemanu foɓo ta̱ nan ganu oɓolo oɓolo adama a na o foɓo le na a yuwan a̱ga̱nda̱. A̱vu u ca nan Levi ulinga u na a yuwan ica nu ulinga wa̱ a̱ga̱nda̱ na aa kamba nan ganu cine wuntsayi o urana suru. A̱vu waru u zuwa aza a na a yuwan ipiri yu U'wa wa̱ A̱sulazuva oɓolo oɓolo o una̱ wa̱ a̱bunda̱ a̱ na̱ntsu'u. Adama a na ne ɗa Da̱wuda vuma va̱ A̱sula̱ dammai a yuwan. 15 Nan ganu na̱ nan Levi avadala e ili i na mogono ma damma nle na a yuwan shi, ko ekere asula e izuwa ya̱ A̱a̱'isamapaɗa shi.

16 Ne ɗa Sulemanu kotoi ulinga wa̱ yi suru, diga urana u na u varai ikyun yu usaa hali a̱ tyo o ukosu u na u kotoi usaa wa̱ A̱a̱'isamapaɗa a̱ A̱sulazuva. Na̱ ne ɗa o kotoi ulinga wu usaa wa̱ A̱a̱'isamapaɗa a̱ A̱sulazuva.

17 Reve Sulemanu ka̱ra̱ a̱ tyo Eziyon Geba na̱ Ela ilyuci i na ri ege'en m mala me iɗa ya̱ Edom. 18 Huram lyunguwa̱a̱ ta̱ Sulemanu na antsun a̱ mini na aza a na o ronuso le, aza a na a gurai mala lon. A̱za̱ o ulinga wa Huram na̱ a̱za̱ a̱ Sulemanu a̱ ka̱ra̱ ta̱ a̱ tyo Ofi a̱ ta̱wa̱a̱ Mogono Sulemanu na̱ zinariya za na ri nu ume u kilo ukpakukupa kupa nu ukpakukupa uton (15,000).