1 Ana Egbere va Sheba uwwai alabari o ugbozu wa̱ Sulemanu, reve u ka̱ra̱ a̱ tyo Urishelima adama u lyungwa̱ yi na̱ yeci yu usa̱n. U da̱na̱ ta̱ oɓolo na̱ a̱za̱ o ushewusun a̱bunda̱, reve u ru'wa̱ arakumi a̱yi na̱ ne'e icu'un icu'un, ne'e vi ili i ma̱guru na atali e ikebe na̱ zinariya. Ana a ga'ain na̱ mogono'o, reve u yuwan yi yeci i na u ri ne ele o okolo suru. 2 Reve gba u usu yeci'i suru, adanshi o ro a̱da̱na̱ lo usa̱n u na waa ca urevu wa̱ yi shi. 3 Ana Egbere va Sheba e enei cu'un vu ugbozu u na Sulemanu ri na̱ yi, na̱ cu'un vu ukobu u na u suwai, 4 na̱ cu'un vi ilyalya zuva va apada a̱yi, na̱ nda̱na̱ta̱ ma azagbain a̱yi na agbashi a̱yi ni itana i sa'ani i na o otoyi, na̱ agbashi a̱yi na a casu yi ili yoso ni itana i sa'ani i na o otoyi, waru na̱ kucci vu ukula̱tosu u na u yuwain a̱ A̱a̱'isamapaɗa a̱ A̱sulazuva. Reve u lamba ili i na wa damma.

5 Reve u damma mogono'o, <<Alabari a na mu uwwai a̱ lyuci va̱ adama a ɗa a̱ wu nu ugbozu wa̱ wu amayun a ɗa. 6 N shi n usu ili i na mu uwwai shi, she na n ta̱wa̱i me enei ne esu a̱ va̱. Ashe! Ko uɓatsulai a damma mu shi! Amayun ugbozu wa̱ wu nu utsuru wa̱ wu u la'a ta̱ ucira wi ili i na mu uwwai. 7 Amayun ama a̱ wu na aza a na a yuwusan wu a̱ga̱nda̱ a̱tsura̱ ta̱, adama o ulinga u na a yuwusan pa kuci a ta uwwusa ugbozu wa wu! 8 Ica za va̱ A̱sulazuva A̱sula̱ a̱ wu a ɗa, za na a uwwusa uyo'o wa̱ wu, na u ɗangula nuwu mogono vu da̱nu o ootogu o tsugono tsa̱ a̱yi. Adama a na A̱sula̱ a cigai Isra'ila waru u cigai tsugono tsa̱ a̱yi tsa lyuwa elime hali hali, u zuwa wu ta̱ vo o'wo mogono e ekere ele, adama a na va yuwan tsugono tsa amayun na̱ a̱ɓula̱.>>

9 Reve u ca mogono'o uritowu u zinariya u kilo ukpakukupa una̱shi (4,000) na atali e ikebe ni itana yu ucita ya̱ a̱bunda̱. Koto she e ene cu'un vi itana yu ucita tsundolo shi tsa aza a na Egbere va Sheba ta̱wa̱yi Mogono Sulemanu shi.

10 Reve ama a Huram oɓolo na̱ a̱za̱ a̱ Sulemanu a̱ ta̱wa̱ na̱ zinariya diga Ofi, a̱ ta̱wa̱ ta̱ waru na̱ ɗanga va algumu na atali e ikebe. 11 Mogono ma yuwan ta̱ ulinga na̱ ɗanga va algumu u yuwan ndasata ma̱ A̱a̱'isamapaɗa ma̱ A̱sulazuva no ozo o ukobu u mogono, ni igaraya ni ikumburu adama a̱za̱ e ishipa. Ko to ene cu'un vi ili tsundolo a̱tsuma̱ e iɗa ya Yahuda shi.

12 Reve mogono Sulemanu ca Egbere va Sheba ili i na u cigai suru ni ili i na u patiyi biti, u ca yi ta̱ u la'a wu ni ili i na u ta̱wa̱a̱ niyi. Reve u ka̱mba̱ e iɗa ya̱ yi oɓolo na aza a na a̱ shewun niyi.

13 Suru a'wan Mogono Sulemanu tsu ushi ta̱ zinariya va̱ a̱bunda̱ na rawai kilo ukpakukupa ushin nu ukpakukupa uta'atsu (23,000), 14 babu nu utafa u na a̱za̱ eden a tsu tsupa, na aza a atsulu na awina. Waru ngono ma Arabiya suru na̱ nan gwamna e iɗa'a a̱ ta̱wa̱a̱ ta̱ Sulemanu na̱ azurufa na̱ zinariya.

15 Mogono Sulemanu yuwan ta̱ a̱ba̱jini a̱ra̱ga̱ ukpakure (200), za ta̱ suru a yuwain ta̱ na̱ zinariya na rawai kilo cindere. 16 A̱vu waru u yuwan a̱ra̱ga̱ ke'en ke'en a zinariya na rawai kilo re, mogono mazuwa ta̱ a̱ra̱ga̱'a̱ o ukobu wa̱ a̱a̱rumbu a Lebanon.

17 Waru Mogono ma yuwan ta̱ a̱ba̱jini ootogu o tsugono na aanga agiwa, a̱vu a surai na̱ zinariya can. 18 Ootogu o tsugono'o u ta̱ nu udasata uta̱li, nu uba̱ta̱ u mazuwa ma ana ma zinariya, za na ri uɓolu no Ootogu'u. Eɓele o Ootogu'u suru u ta̱ na̱ uba̱ta̱ u mazuwa mo ukere, za na ri ni iroci yi kamu za na ri lo mishin. 19 Sulemanu yuwan ta̱ iroci yi kamu kupa na̱ ejere. A̱vu a zuwa iroci yi kamu ta̱ mishin upasu suru wu udasata ta̱li. Babu nɗa n na a yuwain cu'un vo Ootogu o tsugono tsundolo. 20 Suru ili yoso a̱ mini ma Sulemanu a yuwan le ta̱ na̱ zinariya. Na̱ suru itana yu ulinga yu ukobu a̱tsuma̱ a̱a̱rumbu a Lebanon, a yuwan le ta̱ na̱ zinariya can. A yuwan le na̱ azurufa shi, adama a na a mantsa ma Sulemanu azurufa da̱na̱ ili i ro shi. 21 Mogono ma̱ shi ta̱ na antsun a̱bunda̱ a mala adama a atsulu na awina oɓolo na agbashi a Huram. A̱tsuma̱ a'wan a ta'atsu a̱ tsu ka̱mba̱ ta̱ diga Tarshishi uta̱ utanuwu na̱ zinariya na̱ azurufa na aanga a agiwa ni iyomo oɓolo na̱ a̱gba̱da̱gi.

22 Mogono Sulemanu ma̱ shi ta̱ ma la'a ngono mu uvaɗi suru utsuru nu ugbozu. 23 Suru ozo o tsugono tsu uvaɗi a̱ 'ya̱wusa̱ ta̱ uba̱ta̱ u Mogono Sulemanu adama a na a uwwa ugbozu u na A̱sula̱ a ca niyi. 24 Suru nle a̱ ta̱wa̱a̱ yi ta̱ nu une'e u azurufa na̱ zinariya na̱ a̱tugu, ni itana yu uvon ni itana yu ucita ni ido na̱ nloli mi ido. A̱vu a yuwusan ne a'wan suru.

25 Sulemanu da̱na̱ ta̱ no ogodo ukpakukupa una̱shi (4,000) adama e ido ya̱ yi ni ikeke yi ido yu uvon ya̱ yi. U da̱na̱ ta̱ ni ido ukpakukupa kupa nu ukpakukupa ure (12,000) aza a na u zuwai e ilyuci yi ikeke yi ido, ozo o ro waru ɗe Urishelima oɓolo na̱ yi. 26 Sulemanu yuwan ta̱ tsugono tsun ngono diga o Uɗolu wa̱ Yufireti a̱ tyo e iɗa ya Filistiya hali a̱ tyo o ukosu wi iɗa ya Masar. 27 A̱vu mogono ma zuwa azurufa mo o'wo ili ya̱ pere she damma atali a̱tsuma̱ a̱ Urishelima na̱ ɗanga sida tsu ɗanga vu ubiri e iɗa i mugaɗi ma Yahuda. 28 Sulemanu tsula ta̱ ido diga e iɗa ya Masar na̱ akapi e iɗa yu uvaɗi.

29 Suru akapi o ulinga wa Sulemanu diga o ufaru a̱ tyo o ukosu a̱da̱na̱ ta̱ pe uɗanu a̱tsuma̱ aatagada a Natan vumava̱sula̱ na adanshi e ikaka ya Ahija vuma va Shilo na̱ Iddo za yindi e enei adama Yerobowam ulobo wa Neba. 30 Diga Urishelima Sulemanu yuwan ta̱ tsugono tsa aza a Isra'ila suru a'wan amunga. 31 Reve u kuwa̱ ucina nkaya ma̱ yi reve a̱ciɗyo yi a̱tsuma̱ a̱ Lyuci va̱ Da̱wuda, za na a̱yi ɗa Urishelima. Reve Rehobowam ulobo wa̱ yi wo o'wo mogono o una̱ wa̱ yi.