1 Rehobowam 'ya̱wa̱ ta̱ a̱ lyuci va Shekem, adama a na ama a Isra'ila suru oɓoloto ta̱ a katalai okokolo o tsugono ɗe. 2 A mantsa ma na Yerobowam ulobo wa Neba uwwai a labari a na a katala ta̱ Rehobowam mogono, a̱vu Yerobowam ka̱mba̱ diga Masar uba̱ta̱ u na u ri na̱ nden adama a na u shi ta̱ u suma adama o Mogono Sulemanu. 3 A̱vu a̱ lyungu na e ɗe Yerobowam u ta̱wa̱. A̱vu a̱yi na̱ ama a Isra'ila suru a̱ ka̱ra̱ uba̱ta̱ wa Rehobowam a damma yi, 4 <<Dada va wu zuwaa tsu ta̱ a̱a̱gba̱la̱ a̱ a̱tsuma̱lima̱ lon. Gogo na̱ vu ta a jiba tsu ulinga wu usa̱n u nda, na̱ ili yu usa̱n i na i ri zuva va aciya̱tsu, tsu ta yuwaan wu a̱ga̱nda̱.>>

5 A̱vu mogono Rehobowam damma le, <<I ka̱mba̱ ya̱'a̱ va̱ nda na̱ rana ta'atsu.>> Reve a ama'a a̱ ka̱ra̱.

6 Adama o ndolo a̱vu mogono Rehobowam zami ucuɗuwu e ekere a mbara n na a yuwayin dada va̱ yi Sulemanu a̱ga̱nda̱ a mantsa ma na u da̱na̱i wuma. A̱vu u damma le, <<Cu'un va̱ a̱sa̱la̱ a̱ ne ɗa ya ca a̱mu adama a na ma̱ usu ama a nda?>>

7 A̱vu a̱ usu yi, <<N na̱ vu ta̱ ene iliyali ya ama a nda, a̱vu waru vu yuwan le isa'ani, vu yuwan le adanshi a sa'ani, oto o'wo agbashi a̱ wu aza a amayun kuci.>>

8 Amma a̱vu Rehobowam 'yuwan na wa̱ usu wa̱ a̱sa̱la̱ a na mbara n ca niyi, a̱vu u 'ya̱wa̱ u zami ya̱ a̱sa̱la̱ uba̱ta̱ wo o olobo a na u kungwai oɓolo ne ele. Aza a na a yuwusan yi a̱ga̱nda̱. 9 A̱vu we ece ele, <<Nye ɗa a̱sa̱la̱ a̱ ɗu? Cine ma̱ ka̱mbuwa̱ ama a nda aza a na a dammu, <Vu ta jiba tsu usa̱n wa̱ a̱a̱gba̱la̱ a na dada va wu zuwaa n tsu>?>>

10 A̱vu olobo'o a damma yi, <<Apa usuwu u na vaa damma aza a na a damma nuwu ana, <Dada va̱ wu zuwaa tsu ta̱ a̱a̱gba̱la̱ o ume, amma lyawa vu jiba tsu usa̱n u nda.> A̱vu vu damma le, <Akatsu e ke'en o ukere u va̱ u la'a ta̱ ikyun ya dada va̱ ugba̱mu. 11 Dada va̱ zuwaa ɗu ta̱ a̱a̱gba̱la̱ o ume, amma n ta̱ da̱shi ɗu ulinga wu usa̱n. Dada va̱ faba ɗu ta̱ na asuɗu, amma a̱mu n ta fufaba ɗu na agashi.> >>

12 Ana a yuwain rana ta'atsu, a̱vu Yerobowam na ama'a suru a̱ ta̱wa̱ uba̱ta̱ wa Rehobowam cine mogono ma damma nle, <<I ka̱mba̱ ya̱'a̱ va̱ nda na̱ rana ta'atsu.>> 13 Reve mogono ma̱ usu le nu upan, u 'yuwan a̱sa̱la̱ a mbara, 14 a̱vu u usu a̱sa̱la̱ o olobo u damma le, <<Dada va̱ zuwaa ɗu ta̱ a̱a̱gba̱la̱ o ume, amma a̱mu n ta̱ da̱shi ɗu ulinga wu usa̱n. Dada va fufaba ɗu ta̱ na asuɗu, amma a̱mu n ta fufaba a̱ ɗu na agashi.>> 15 Mogono ma zuwaa ama'a atsuvu shi, adama a na ne ɗa A̱sulazuva A̱sula̱ a cigai. U yuwan ta̱ ne adama a na wa̱ shiton adanshi a na u yuwain na̱ Yerobowam ulobo wa Neba o una̱ wa Ahija vuma va Shilo.

16 Amma a mantsa ma na aza a Isra'ila suru a gura revei na wu uwwa le shi, a̱vu ama'a a̱ usu mogono'o a damma,

<<N nye i bura ntsu na̱ Da̱wuda,

tsu ri na agadu e ekere o ulobo wa̱ Yese shi.

A̱ɗu Isra'ila, ka̱mba̱i ogodo a̱ɗu!

Lyawa Da̱wuda idana u'wa wa̱ a̱yi.>> Adama o ndolo a̱vu ama Isra'ila e bete'we, a̱vu a̱ ka̱mba̱ a'wan le suru. 17 Amma a̱vu Rehobowam lyuwa elime na̱ tsugono tsa a ama Isra'ila aza a na a̱ ri na̱ nden e ilyuci ya Yahuda goon.

18 Adama o ndolo a̱vu Mogono Rehobowam lyunguwa̱a̱ Adoniram za na ee idanasa a̱za̱ o ulinga wu usa̱n a̱ tyo uba̱ta̱ wa aza a Isra'ila, amma a̱vu a vuvara yi na̱ atali hali ukwa̱. Ana Mogono Rehobowam enei ne a̱vu u jika̱ u tara keke vi ido ya̱ yi a̱vu u suma a̱ tyo Urishelima. 19 Diga a mantsa mo ndolo, reve aza a Isra'ila e reme a̱ 'ya̱susa̱a̱n u'wa wa̱ Da̱wuda a aci hali na ana'an.