1 A̱vu Ruhu va A̱sula̱ cipa̱a̱ Azariya ulobo wa Oded, 2 a̱vu wu uta̱ adama a na wa ga'asan na̱ Mogono Asa a̱yi a̱ ma̱a̱ ka̱mba̱ diga uba̱ta̱ o uvon, reve u damma yi, <<Vu uwwa a̱mu, a̱vu mogono Asa, a̱vu na a ama a Yahuda na̱ Banyami suru! A̱sulazuva a̱ ta̱ oɓolo na̱ a̱vu n na̱ vu ri oɓolo na̱ a̱yi! Mantsa ma na vu zami niyi suru vu ta̱ tsura̱i. Amma ni i lyawai, a̱yi fo u ta lyawa a̱ɗu. 3 Adama a na aza a Isra'ila a jima ta̱ na a̱ tsura̱i A̱sula̱ amayun na̱ ganu na ri lo na wa̱ rito le na̱ wila̱ wa̱ A̱sula̱ waru. 4 Amma suru mantsa ma na a̱ ri pe a̱tsuma̱lima̱, a̱vu a vadala uba̱ta̱ wa̱ A̱sulazuva A̱sula̱ a Isra'ila, a̱vu a zami yi, waru a̱ ta̱ tsura̱i. 5 A mantsa ma na a̱ ri na̱ nden n lafiya shi uba̱ta̱ wa aza a na a̱ ri ya̱ mota̱ na̱ ma uwa, adama a na iɗa'a u ri a̱tsuma̱ addama. 6 Reve a ama a ɓatsa. Iɗa i ta̱ 'ya̱wa̱a̱ iɗa, lyuci waru u ta̱ 'ya̱wa̱a̱ lyuci, adama a na A̱sulazuva a̱ ta̱wa̱a̱ le ta̱ na̱ a̱tsuma̱lima̱ na̱ meleshe icu'un icu'un. 7 Amma a̱ɗu, i yuwan okolo o ugbamu, she yu uta̱a̱ okolo wan, adama a na i ta ushi atsupu o ulinga u ɗu.>>

8 A mantsa ma na Asa uwwai cu'un vu udammu ni idanshi yi ikaka diga uba̱ta̱ wa̱ A̱sulazuva o una̱ u vumava̱sula̱ Azariya ulobo wa Oded, a̱vu u yuwan okolo o ugbamu. A̱vu u kototo musula̱ mi idaba a̱tsuma̱ e iɗa ya Yahuda na̱ Banyami, oɓolo ni ilyuci i na u usai a̱tsuma̱ e iɗa ya agaɗi ya Ifiramu. A̱vu u da̱shi lapula masa'a ma̱ A̱sulazuva za na ri elime o ukobu wa̱ A̱a̱'isamapaɗa a̱ A̱sulazuva.

9 A̱vu Asa ɓoloto ama a Yahuda na aza a Banyami na aza a Ifiramu na aza a Manase na aza a Saminu suru aza a na a̱ ri a̱ nden n tsumoci a̱tsuma̱ ele. Adama a na ama a Isra'ila na̱ a̱bunda̱ a̱ ka̱mba̱ ta̱ na̱ nden a̱tsuma̱ o upasu wa Yahuda a mantsa ma na e revei A̱sulazuva A̱sula̱ a Asa ta̱ oɓolo na̱ a̱yi.

10 A̱vu oɓoloto a̱tsuma̱ a̱ Urishelima a̱tsuma̱ o woto wa ta'atsu wa a'wan kupa na̱ ozo o ton a mantsa mo tsugono tsa Asa. 11 A̱tsuma̱ a rana ndolo a ca ta̱ kucci vi ili i na pura̱i diga uba̱ta̱ wu uvon a̱ tyo uba̱ta̱ wa̱ A̱sulazuva vi inan ukpakucindere (700), ni ikyon na̱ mgbele ukpakukupa ucindere (7,000). 12 A̱vu a yuwan akucunu na a yuwaan A̱sulazuva A̱sula̱ a nkaya nle a̱ga̱nda̱ no okolo ele na̱ wuma u le suru. 13 A̱vu a damma suru za na 'yuwain na wa yuwaan A̱sulazuva A̱sula̱ a Isra'ila a̱ga̱nda̱ oto o unai, ko na̱ shi vuma ke'en ɗa ko vuma gbain ko vali ko ka. 14 A̱vu a yuwan akucunu a̱ tyo wu uba̱ta̱ wa̱ A̱sulazuva nu uɗyo wu ucira, na̱ yisali na̱ wi ivulusa̱ wa abulu na avana. 15 A̱vu ama a Yahuda suru a yuwan ma̱za̱nga̱ na a yuwain akucunu nu ucigu wo okolo e le. A zami ta̱ A̱sulazuva na̱ okolo ele suru a̱vu a̱ tsura̱i. Reve A̱sulazuva a ca le wivuwun uba̱ta̱ suru.

16 Hali na Mogono Asa ma̱ cipa̱to yi akaya a̱yi Ma'aka diga nden ma egbere, adama a na u yuwain ma̱sula̱ mi idaba ma ka Ashera. Asa kototo ta̱ ma̱sula̱, a̱vu wi ira yi, a̱vu ukuloto yi o Uka̱ri wa̱ Kidron. 17 Amma u shi u kototo ba̱ta̱ va̱ a̱ga̱nda̱ ro na ri a̱tsuma̱ e iɗa ya Isra'ila shi. Suru na̱ ne okolo a Asa a̱da̱na̱ ta̱ uba̱ta̱ wa̱ A̱sulazuva a rana wuma wa̱ yi suru. 18 A̱vu u ta̱wa̱a̱ pe a̱tsuma̱ A̱a̱'isamapaɗa A̱sula̱ suru itana i azurufa na̱ zinariya na̱ akapi e itana yu ulinga aza a na a̱yi na̱ Dada va̱ a̱yi a tawai.

19 Agba a̱ da̱shi yuwan uvon shi hali acina a a'wan mata'atsu no ozo o ton o tsugono tsa̱ a̱yi.