1 A̱vu Mogono Da̱wuda yuwan adanshi no oɓolo a ama suru u damma, <<Ulobo u va̱ Sulemanu, za na A̱sula̱ a ɗangulai, mawun ma ɗa, u ri nu urevu ne'e shi. Agba ulinga'a u ta̱ a̱bunda̱ lon, adama a na A̱a̱'isamapaɗa ma nda uba̱ta̱ u na vuma a̱a̱ da̱nu ɗa shi, amma uba̱ta̱ u ɗa a na A̱sulazuva A̱sula̱ a̱ da̱na̱ kuci.* 2 Na̱ a̱tyo o ucira u va̱ suru m ɓoloto ta̱ itana adama a̱ A̱a̱'isamapaɗa a̱ A̱sula̱ a̱ va̱. N ɓoloto ta̱ zinariya adama o ulinga u zinariya na̱ azurufa waru adama o ulinga u azurufa, na̱ rumushili adama o ulinga wu rumushili, ni irumu adama o ulinga wi irumu, na akpata adama o ulinga wa akpata. Na atali e ikebe fo, na atali onis na̱ a̱za̱ o ufoɓu na aza a na a̱ ri ni ika̱rika̱ri icu'un icu'un, waru itana i nda'a a̱ da̱na̱ ta̱ a̱bunda̱ lon. 3 Babu ni ili i na n foɓoi ɗe adama o ulinga wa̱ A̱a̱'isamapaɗa a̱ A̱sula̱ a̱ va̱, n ta ca zinariya na̱ azurufa na n ri ne ele, adama a na n te e icigi ya̱ A̱a̱'isamapaɗa a̱ A̱sula̱ a̱ va̱ lon. 4 N ca ta̱ zinariya va̱ aza na a la'ai ukunzuwu ukpakukupa uta'atsu (3,000) u Ofi, na̱ azurufa can ukpakukupa ucindere (7,000), adama a na a yuwan iroci i sa'ani o uɓaɓu wu u'wa, 5 na adama o ulinga u zinariya na̱ azurufa adama a na a̱za̱ o ulinga wu ukere a yuwan ulinga u le suru. To, gogo za ne ɗa ri ufoɓu u na waa a ca no okolo a̱ ta̱ adama o ulinga wa̱ A̱sulazuva ana'an?>>

6 A̱vu azagbain a 'wa, na azagbain o gundo va aza a Isra'ila, na̱ nan yali ya̱ a̱soja o ukpakukupa kupa na̱ ozo o ukpaku ukpaku, na azagbain a na e idanasa ulinga u mogono reve a ca no okolo a̱ ta̱. 7 Reve a ca adama a na a yuwan ulinga wa̱ A̱a̱'isamapaɗa a̱ A̱sula̱ zinariya ukpakukupa uton (5,000) na̱ dariki ukpakukupa kupa (10,000) na̱ azurufa ukpakukupa kupa (10,000) na̱ rumushili ukpakukupa kupa nu ukpakukupa kunla̱ (18,000) ni irumu ukpakukupa ukpaku (100,000). 8 Suru aza a na a̱ ri na atali e ikebe a ca le ta̱ a̱ tyo wu uba̱ta̱ wi izuwa yi itana ya̱ A̱a̱'isamapaɗa a̱ A̱sulazuva o ukere wa Yehiyel za va Gashon diga o ugundo wa̱ Levi. 9 Ama'a a yuwan ta̱ ma̱za̱nga̱ ana e enei ili i na azagbain e le a cayi nu ucawu wo okolo a̱ ta̱ e ekere a̱ A̱sulazuva, Da̱wuda mogono fo yuwan ta̱ ma̱za̱nga̱ lon.

10 Da̱wuda yuwaan ta̱ A̱sulazuva ica e elime oɓolo a ama suru u damma,

<<Ica za va wu ɗa A̱sulazuva, A̱sula̱ a akaya a̱ tsu Isra'ila,

a̱vu za va aba'un ɗa A̱sulazuva,

diga o ufaru a̱ tyo o ukosu!

11 A̱vu A̱sulazuva,

tsugbain nu ucira za va wu ɗa!

waru tsugbain ni isa'ani nu ulyuwu wa a aci za va wu ɗa,

adama a na suru ili na i ri zuva ni iɗa za va wu ɗa suru.

Waru tsugono za vu ɗa A̱sulazuva, a̱vu A̱sulazuva,

a̱vu ɗa za na a ca tsugbain suru a̱tsuma̱ e ili biti.*

12 Utsuru na̱ tsugbain diga ya̱'a̱ wu ɗa a̱ tsu uta̱,

a̱vu ɗa za na a yuwusan tsugono tse ili biti.

O ukere wa̱ wu u ɗa ucira na̱ tsugbain tsa̱ ri,

a na va̱ 'ya̱sa̱n vuma vu ca yi ucira suru.

13 Gogo A̱sula̱ a̱ tsu,

tsu godyowo wu ta̱,

waru tsu cuwa ta̱ a̱ba̱jini a ala a̱ wu.

14 <<Amma gogo a̱mu zane ɗa n ri, waru nan zane ɗa ama a̱ va̱, a na tsa gura ucasu no okolo a̱ ta̱ tsu nda? Adama a na suru ili biti ya̱'a̱ wu ɗa u tsu uta̱, waru diga a̱tsuma̱ o une'e u na tsu ushiyi ya̱'a̱ wu ɗa tsu ca nuwu. 15 A̱tsu aza a agara a ɗa no omocin e esu a̱ wu, tsa a nkaya n tsu fo. Rana tsu a̱tsuma̱ o uvaɗi u nda tsu ululu u ɗa u ri, agba a tsa zuwa okolo ya̱'a̱ le shi. 16 A̱sulazuva A̱sula̱ a̱ tsu, na̱ suru itana i na tsu ɓolotoi nda adama a na tsa suwaa wu A̱a̱'isamapaɗa adama a Aala Akiza a̱ wu, diga o ukere wa̱ wu u ɗa o uta̱i, waru suru nle a̱za̱ a̱ wu a ɗa. 17 Ana wo o'woi n reve ta̱ A̱sula̱ a̱ va̱, za na tsu rito okolo a ama ɗa, agba waru vu tsu uwwa ta̱ uyo'o wi ili i na i ri mejege. Suru itana i nda n ca le ta̱ no okolo a̱ ta̱ na amayun waru fo. Agba waru gogo me ene ta̱ cine ama a casu no okolo a̱ ta̱ na̱ ma̱za̱nga̱ ununa a cayi a̱ tyo ya̱'a̱ wu. 18 A̱sulazuva A̱sula̱ a nkaya n tsu Ibrahim na̱ Ishiyaku na̱ Isra'ila, lyawa vu zuwa icigi i nda a̱tsuma̱ o okolo a ama a̱ wu babu ukotu, a̱vu vu zuwa okolo e le a yuwan tsutoni na̱ a̱vu. 19 Vu ca ulobo u va̱ Sulemanu uzuwu wo okolo a na wa yuwan suru ili i na vu damma niyi, a na wa yuwan tsutoni na̱ a̱vu na̱ wila̱ wa̱ wu na̱ cine wa yuwan suru biti a na wa suwa A̱a̱'isamapaɗa ni itana i na n foɓoi ɗe nda.>>

20 A̱vu Da̱wuda damma oɓolo ama'a suru, <<I cuwan A̱sulazuva A̱sula̱ a̱ɗu.>>Reve ama suru a cuwa A̱sulazuva a̱ A̱sula̱ a nkaya n le. A̱vu a̱ kingyo o von e iɗa ma̱kpa̱ɓa̱ elime a̱ A̱sulazuva na̱ mogono.

21 Ana usana u tawai a̱vu a ca kucci na̱ kucci vu ukula̱tosu a̱ tyo uba̱ta̱ wa̱ A̱sulazuva vo ogono e inan ukpakukupa (1,000), ni ikyon ukpakukupa (1,000), na̱ mukyokyon ukpakukupa (1,000), oɓolo na̱ kucci vu ukula̱tosu vi ili yo oso e le, na akapi a̱ kucci va̱ a̱bunda̱ vu ukula̱tosu wa̱ a̱bunda̱ aza a na a yuwain adama ama a Isra'ila suru. 22 Reve a lyuwa o osowo na̱ ma̱za̱nga̱ ma̱ a̱bunda̱ uba̱ta̱ wa̱ A̱sulazuva o urana u ndolo.

A̱vu a̱ da̱shi zuwa Sulemanu ulobo wa̱ Da̱wuda da̱shi wo o'wo mogono me e le wa̱ ire, a̱vu a̱ tsuwa̱a̱n yi mani'in wo o'wo zagbain elime a̱ A̱sulazuva a na wa yuwan tsugono, na̱ Saduku waru wo o'wo ganu. 23 A̱vu Sulemanu da̱nu ootogu o tsugono tsa̱ A̱sulazuva tsa̱ mogono o una̱ wa dada va̱ yi Da̱wuda. U tsura̱ ta̱ ulyuwu we elime waru aza a Isra'ila aa yuwaan yi ta̱ tsutoni suru.* 24 Suru azagbain na̱ a̱soja o ucira na akapi o olobo o mogono Da̱wuda suru, a yuwan ta̱ akucunu a na a yuwan tsutoni na̱ mogono Sulemanu. 25 A̱sulazuva a̱ 'ya̱sa̱n ta̱ Sulemanu a̱vu u ca yi ulyuwu we elime e esu aza a Isra'ila suru, reve u ca tsugono tsa̱ yi tsugbain za na la'ai suru akapi o ngono ma aza a Isra'ila a na a̱ ka̱ra̱i ɗe.

26 Da̱wuda ulobo wa̱ Yese yuwan ta̱ tsugono aciya aza a Isra'ila suru. 27 U yuwan ta̱ a'wan amunga a yuwusan tsugono tsa aza a Isra'ila. A̱vu pe a̱tsuma̱ a̱ yi u yuwan tsugono tsa Heburon a'wan e cindere, reve waru u yuwan a'wan mata'atsu na aza a ta'atsu a̱tsuma̱ a̱ Urishelima.* 28 Agba u kuwa̱ ta̱ a̱tsuma̱ a tsu kutsa ulobonu, waru wu uwwa ta̱ uyo'o u wuma wa̱ a̱yi, nu utsuru na̱ tsugbain. Ulobo wa̱ yi Sulemanu wo o'wo ta̱ mogono o una̱ wa̱ yi.

29 Akapi o ulinga u tsugono tsa̱ mogono Da̱wuda, diga o ufaru a̱ tyo o ukosu, a̱ da̱na̱ ta̱ uɗanu a̱tsuma̱ aatagada o ucuwusan wa Sama'ila za yindi na̱ Natan vumava̱sula̱ na̱ Gadu za yindi. 30 Ucuɗuwu wa alabari'i u roco ta̱ cu'un tsugono tsa na u yuwain, nu ucira wa̱ yi, na̱ suru ili i na icina niyi na̱ Isra'ila waru, na akapi o tsugono tsa akapi e iɗa i na a̱ ri uka̱nda̱ruwu ne le suru.