1 Reve aza a Filistiya a yuwan uvon na̱ Isra'ila, a̱vu aza a Isra'ila a sumaa le. A̱vu o una a̱soja a Isra'ila na̱ a̱bunda̱ a Masasan ma Gilbowa. 2 Reve aza a Filistiya a gbagba Shawulu no olobo a̱ yi Jonata na̱ Abinada na̱ Malkishuwa. 3 Uvo'on u suɗuwa ta̱ Shawulu, reve ana a̱za̱ a̱ tewin a cina niyi a amaton yi. 4 A̱vu u damma soja na a̱a̱ guzusa̱a̱ yi itana yu uvon, <<Tala matsun me pe'eni ma̱ wu a̱vu vu sapa mu, adama a̱za̱ o ufoɗyo a nda a̱ ta̱wa̱ a yuwaan mu ulamu wan.>>Agba za na a̱a̱ guzusa̱a̱ yi itana yu uvo'on wu uwwa ta̱ wovon u gura yuwan yi shi, ɗaɗa gba Shawulu tarai matsun me pe'eni ma̱ yi a̱vu u riya̱a̱ yi. 5 Ana za na a̱a̱ guzusa̱a̱ yi itana yu uvo'on we enei Shawulu kuwa̱i, a̱vu a̱yi fo u riya̱a̱ matsun me pe'eni ma̱ yi reve u kuwa̱. 6 Ne tsundolo tsa ɗa Shawulu no olobo a ta'atsu a̱ yi a̱ kuwa̱i nu u'wa wa̱ yi suru ne ɗa a̱ kuwa̱i oɓolo.

7 Ana aza a Isra'ila suru a na a̱ ri a̱tsuma̱ o uka̱ri e enei a na a̱soja a sumai waru Shawulu oɓolo no olobo a̱ yi a̱ kuwa̱ ta̱, reve a lyawa ilyuci i le a̱vu a suma. Reve gba aza a Filistiya a̱ ta̱wa̱ a̱ da̱nu pe.

8 Ana usana u tawai, a na aza a Filistiya a̱ ta̱wa̱i a̱ pura̱ itana ya̱ a̱kwa̱kwa̱'a̱, a̱vu a cina Shawulu no olobo a̱ yi nven ukwa̱ zuva Masasan ma Gilbowa. 9 A̱vu o foɗo yi itana a̱vu a tara aaci a̱ yi ni itana yu uvon ya̱ yi. Reve a̱ lyungu ni ikaka a̱tsuma̱ e iɗa ya aza a Filistiya suru a baza alabari'i a̱tsuma̱ a̱ a̱ma̱li e le na ama e le. 10 A̱vu a zuwa itana yu uvon ya̱ yi a̱tsuma̱ a̱ a̱a̱'isa̱ a̱ musula̱ n le, reve a̱ sa̱ga̱do aaci a̱ yi a̱tsuma̱ a̱ a̱a̱'isa̱ a Dagon. 11 Mantsa ma na ama a Jabe Giliyadu suru a uwwai ili na aza a Filistiya a yuwain na̱ Shawulu suru, 12 a̱vu ali e le o ucira suru a̱ 'ya̱wa̱ a tara lipu va Shawulu na̱ za vo olobo a̱ yi a̱ ta̱wa̱ ne ele Jabe. A̱vu a̱ ciɗo etele e le o ululu wu uɗanga wo oku a̱tsuma̱ a Jabesh, reve a yuwan akuli hali rana cindere.

13 Shawulu kuwa̱ ta̱ adama a na u yuwain ulambu wa̱ a̱ɓula̱ e ekere a̱ A̱sulazuva, u kuru adanshi a̱ A̱sulazuva shi, hali gba waru u zami a̱sa̱la̱ uba̱ta̱ wa̱ a̱za̱ a̱ yindi.* 14 U zami a̱sa̱la̱ e ekere a̱ A̱sulazuva shi. Adama o ndolo a ɗa gba A̱sulazuva o una niyi, a̱vu u vadala tsugono tsa̱ yi u ca Da̱wuda ulobo wa̱ Yese.