1 A mantsa ma na Da̱wuda suwaa yi aciya̱yi 'wa a̱tsuma̱ a̱ lyuci va̱ Da̱wuda, a̱vu u foɓo uba̱ta̱ adama a Akpati a Nzuwulai a̱ A̱sula̱ na̱ masa'a adama a̱yi. 2 A̱vu Da̱wuda damma, <<She nanza tanu Akpati a Nzuwulai wan she nan Levi goon, adama a na A̱sulazuva a ɗangula le ta̱ ɗe adama a tanu Akpati a̱ A̱sulazuva, na̱ waru a yuwaan yi a̱ga̱nda̱ hali hali.>>*

3 A̱vu Da̱wuda ɓoloto ama a Isra'ila a̱tsuma̱ a̱ Urishelima suru adama a na a̱ ta̱wa̱ na Akpati a Nzuwulai A̱sulazuva uba̱ta̱ u na o foɓo niyi. 4 A̱vu u ɓoloto ugundo wa Haruna nan Levi uba̱ta̱ uta̱.

5 Diga o ugundo wa Koha,

ama ukpaku nu ushin (120), Uriya ɗa da̱na̱i zagbain le.

6 Diga o ugundo wa Merari,

ama ukpakure nu ushin (220), Asaya ɗa da̱na̱i zagbain le.

7 Diga o ugundo wa Gashon,

ama ukpaku na̱ mata'atsu (130), Juwe ɗa da̱na̱i zagbain le.

8 Diga o ugundo wa Elizafan,

ama ukpakure (200), Shemaya ɗa da̱na̱i zagbain le.

9 Diga o ugundo wa Heburon,

ama Kupa kula̱, Eliyel ɗa da̱na̱i zagbain le.

10 Diga o ugundo wa Uziye,

ama ukpaku na̱ kupa ne ejere (112), Aminada ɗa da̱na̱i zagbain le.

11 A̱vu Da̱wuda ɗe Saduku na̱ Abiyata nan ganu, oɓolo na̱ Uriyel na̱ Asaya na̱ Juwe na̱ Shemaya na̱ Eliyel na̱ Aminada nan Levi. 12 A̱vu u damma le, <<A̱ɗu ɗa azagbain va aza 'wa va nan Levi, a̱ɗu oɓolo na̱ a̱za̱ a̱ɗu nan Levi i ta tawa aciya̱ a̱ɗu yo'o cece adama a na ya̱ ta̱wa̱a̱ na Akpati a nzuwulai a̱ A̱sulazuva A̱sula̱ a Isra'ila, a̱ tyo wu uba̱ta̱ u na n foɓo niyi. 13 Adama a na a̱ɗu nan Levi a̱ɗu ɗa i kuɗa̱i a na ya tara yi ɗe nu ufaru a na i zuwai upan wa̱ A̱sulazuva A̱sula̱ a̱ tsu a̱ riya̱a̱ n tsu. Adama a na tse ecei ununa tsa yuwan na̱ yi shi ununa u zuwai.>> 14 A̱vu nan ganu na̱ nan Levi a tawa aciyele adama a na a̱ ta̱wa̱ na Akpati a nzuwulai A̱sulazuva, A̱sula̱ a Isra'ila. 15 A̱vu nan Levi a tara Akpati a Nzuwulai A̱sula̱'a̱ na aɗanga e le nlyungu, ununa Musa dammai a̱tsuma̱ adanshi A̱sulazuva.*

16 A̱vu Da̱wuda damma azagbain a nan Levi a ɗangula diga a̱tsuma̱ e imaci i le ashipi a na a cana ishipa i ma̱za̱nga̱, oɓolo ni itana yi ishipa: Igaraya na̱ ikumburu ni igoge. 17 A̱vu nan Levi a ɗangula Heman ulobo wa Juwe a̱tsuma̱ a̱za̱ a̱ yi na̱ Asaf ulobo wa Berekiya, a̱tsuma̱ a̱za̱ a Merari a ɗangula ta̱ Etan ulobo wa Kushaya. 18 Oɓolo ne ele a̱vu a ɗangula aza a na a kamba ele, Zakariya na̱ Ya'aziyel na̱ Shemiramo na̱ Yehiyel na̱ Uni na̱ Eliyabu na̱ Benaya na̱ Ma'aseya na̱ Matitiya na̱ Elifele na̱ Mikneya na̱ Obed Edom na̱ Jeyiyel aza a na a yuwusan ipiri yu una̱ntsu.

19 A̱za̱ e ishipa ele ɗa Heman na̱ Asaf na̱ Etan. Ele ɗa aza a na a ɗangulai a na a yuwusan mataɗa ma kumburu na̱ maganga ma̱ rumushili. 20 Zakariya na̱ Aziyel na̱ Shemiramo na̱ Yehiyel na̱ Uni na̱ Eliyabu na̱ Ma'aseya na̱ Benaya ele ɗa aza a na a wa'a ikumburu na̱ mesun zuva, 21 na̱ Matitiya na̱ Elifele na̱ Mikneya na̱ Obed Edom na̱ Yehiyel na̱ Azaziya ele ɗa a taɗa igaraya na̱ mesun wa'a wa'a. 22 Kenaniya zagbain va nan a Levi ɗa da̱na̱i zagbain va̱ a̱za̱ e ishipa, a̱yi ɗa u da̱na̱i ulinga wa̱ a̱yi adama a na a̱yi ma̱dobiya ma ɗa.

23 Berekiya na̱ Elikana ele ɗa a̱za̱ e ipiri yu una̱ntsu wu uba̱ta̱ u na a zuwusa Akpati a Nzuwulai. 24 Shebaniya na̱ Yehoshafa na̱ Nataniya na̱ Amasai na̱ Zakariya na̱ Benaya na̱ Eliyaza ganu ele ɗa aza na a̱ da̱na̱ ivulusa̱ avana elime Akpati a Nzuwulai A̱sula̱. Obed Edom na̱ Yehiya ele ɗa a̱za̱ e ipiri yu una̱ntsu wu uba̱ta̱ u na a zuwusa Akpati a Nzuwulai.

25 A̱vu Da̱wuda na̱ mbara ma aza a Isra'ila na̱ nan yali a̱soja o ukpakukupa kupa a̱ ka̱ra̱ adama a na a̱ ta̱wa̱ na Akpati a Nzuwulai A̱sulazuva diga a̱tsuma̱ o u'wa wa Obed Edom. Reve a̱ ta̱wa̱ na̱ yi na̱ ma̱za̱nga̱ ma̱ a̱bunda̱ lon. 26 A na wo o'woi A̱sula̱ a kamba ta̱ nan Levi ozo o utanusu wa Akpati a Nzuwulai A̱sulazuva, reve a ca kucci vo ogono e inan e cindere na̱ a̱giri'i e cindere. 27 Da̱wuda da̱na̱ ta̱ wotowu nu utugu wo okoro, ununa nan Levi aza a na a̱ da̱na̱i utanuwu na Akpati a Nzuwulai a̱ da̱na̱i, na ashipi na̱ Kenaniya za na da̱na̱i zagbain va aza a na a yuwusan ishipa. Waru Da̱wuda oto ta̱ epo vo okoro. 28 A̱vu aza a Isra'ila suru a̱ ta̱wa̱ na Akpati a Nzuwulai A̱sulazuva ni yisali, e ivulusa̱ avana na abulu, ni igoge na̱ mataɗa ma̱ kumburu ni igaraya.

29 A mantsa ma na Akpati a Nzuwulai A̱sulazuva a̱ ri a ma uwwa ma lyuci va Da̱wuda, a̱vu Mikal usheli wa Shawulu u ka̱lyuwa̱ nu uba̱ta̱ wu usowoto wu upepu. A na we enei mogono Da̱wuda o uje'en nu u yuwusain ma̱za̱nga̱ ma̱ a̱bunda̱, a̱vu u goro yi ookolo.