1 A̱vu Da̱wuda damma, <<Mpa nda uba̱ta̱ u na u'wa wa̱ A̱sulazuva A̱sula̱ wuntsa yi u da̱na̱, oɓolo na̱ masa'a mo ucasu u kucci vu ukula̱tosu adama a aza a Isra'ila,>>

2 A̱vu Da̱wuda ca udammu adama a na o ɓoloto suru omocin a na a̱ ri na̱ nden a̱tsuma̱ a Isra'ila, waru a̱tsuma̱ e le u ɗangula ta̱ aza a na a̱a̱ da̱na̱ o ɓuɓosuso atali e she'en atali adama o usaa wu u'wa wa̱ A̱sula̱. 3 U ca le ta̱ irumu ya̱ a̱bunda̱ adama a na a yuwan ikusa yi na̱ntsu gbain uba̱ta̱ u ma'uwa ni ili i ma̱nla̱, ni irumushili aza a na a la'ai ucira u na a̱ kunzu le. 4 Agba u ta̱wa̱ ta̱ na akpata a sida aza na a la'ai ucira u na e kece le, adama a na aza a Sidon na̱ Taya a̱ ta̱wa̱ ta̱ ne ele a̱bunda̱ uba̱ta̱ wa̱ Da̱wuda.

5 A̱vu Da̱wuda damma,<<Ulobo u va̱ Sulemanu molobo ma ɗa, ugbozu wa̱ yi koto u rawa ne'e shi, agba u'wa u na a cigai aa suwaa A̱sulazuva u ta̱ da̱na̱ mgbain lon, na ala nu ulobonu e esu nɗa suru. Adama o ndolo n ta yuwan ifoɓi adama o usa'a.>> Adama o ndolo a̱vu Da̱wuda yuwan ifoɓi ya̱ a̱bunda̱ kafu ukwisa̱ wa̱ yi.

6 Reve u ɗe ulobo wa̱ yi Sulemanu a̱vu u damma yi u suwaa A̱sulazuva A̱sula̱ a aza a Isra'ila u'wa. 7 Reve Da̱wuda damma Sulemanu, <<Ulobo u va̱, n da̱na̱ ta̱ na̱ a̱yi o okolo na ma suwa u'wa adama a ala a̱ A̱sulazuva A̱sula̱ a̱ va̱.>>* 8 Amma a̱vu adanshi A̱sulazuva a nda a̱ ta̱wa̱ ya̱'a̱ va̱, <<Vo oco ta̱ mpasa ma̱ a̱bunda̱, waru vu yuwan ta̱ uvon kpara. A̱vu ɗa za na aa suwaa mu u'wa adama a ala a̱ va̱ shi, adama a na vo oco ta̱ mpasa ma̱ a̱bunda̱ a̱ ma̱ka̱ka̱n ma̱ va̱ a̱tsuma̱ o uvaɗi. 9 Amma vu ta matsan ulobo za na wo o'wo vuma va asuvu nden na̱ wivuwun, waru n ta ca yi wivuwun e ekere a n'yuwatan ma̱ yi uba̱ta̱ suru. Aala a̱ yi a ɗa Sulemanu, waru n ta ca aza a Isra'ila asuvu nden na̱ nden n lafiya a mantsa ma̱ yi. 10 A̱yi ɗa za na aa suwaa mu u'wa adama Aala a̱ va̱. <U to o'wo ulobo u va̱, a̱mu waru n to o'wo dada va̱ yi. Waru n ta̱ shuwa̱ ootogu o tsugono tsa yi a aci a aza a Isra'ila babu ukotu.>

11 <<Gogo ulobo u va̱, lyawa A̱sulazuva a̱ da̱na̱ oɓolo na̱ a̱vu, u zuwa vu tsura̱ ulyuwu we elime, lyawa vu suwa u'wa wa̱ A̱sulazuva A̱sula̱ a̱ wu, cine u dammai adama a̱ wu. 12 Lyawa A̱sulazuva a ca wu ugbozu nu urevu a mantsa ma na u zuwa nuwu zagbain e ekere aza a Isra'ila, waru vu yuwan tsutoni na̱ Wila̱ wa̱ A̱sulazuva A̱sula̱ a̱ wu. 13 Na̱ vu yuwan tsutoni nu udammu na̱ Wila̱ u na A̱sulazuva a cayi Musa adama a aza a Isra'ila, vu ta̱ tsura̱ ulyuwu we elime. Waru vu kapanu vi isawan nu ucira. She vu uwwa wovon ko okolo a kuɗa wu wan.*

14 <<A̱tsuma̱ o usa̱n m ɓolotowo ta̱ A̱a̱'isamapaɗa a̱ A̱sulazuva ili i na i rawai ukunzuwu u zinariya ukpakukupa ukpaku (100,000), nu ukpakukupa udoɓonuwu u azurufa (1,000,000), ni irumushili ni irumu ya̱ a̱bunda̱ a aza a na a la'ai ucira u na e kece, na akpata na atali. Amma vu da̱shi ɗe a aci e le. 15 Vu ta̱ na aza a na aa yuwaan wu ulinga na̱ a̱bunda̱. Aza a na oo ɓoso wu aatali, na̱ a̱za̱ o usaa na aza a mavara, na aza a na a gurai cu'un vu ulinga vu ukere biti. 16 Vu ta̱ na̱ nruma n na maa gura ruma zinariya na̱ azurufa, ni irumushili ni irumu aza a na aa gura kece le shi. 'Yon vu reme ulinga, lyawa A̱sulazuva a̱ da̱na̱ oɓolo na̱ a̱vu.>>

17 A̱vu Da̱wuda yuwan adanshi na azagbain a Isra'ila a kamba ulobo wa̱ yi Sulemanu. 18 A̱vu u damma le, <<A̱yi A̱sulazuva A̱sula̱ a̱ ɗu u ri oɓolo na̱ a̱ɗu shi? Ashe u ca ɗu wivuwun uba̱ta̱ suru shi? Adama a na u ca ta̱ aza a na a̱ ri nden e iɗa'a e ekere a̱ va̱, waru iɗa'a A̱sulazuva na ama a̱ yi a la'a ta̱ ucira wa̱ yi. 19 Gogo i zuwa okolo a̱ ɗu na asuvu a̱ ɗu uba̱ta̱ wi izami yu ure wa̱ A̱sulazuva A̱sula̱ a̱ ɗu. A̱vu i teme usaa wa̱ a̱a̱'isa̱ adama a̱ A̱sulazuva A̱sula̱, adama i ta̱wa̱a̱ na Akpati a Nzuwulai a̱ A̱sulazuva na akwanu a Akiza a̱ tyo o u'wa u na aa suwa adama a aala a̱ A̱sulazuva.>>