1 Ana a yuwain tsundolo, a̱vu Da̱wuda lyuwa aza a Filistiya nu uvon a̱vu u ka̱mba̱to le agbashi a̱ yi, reve u usa lyuci va Gat na̱ mulyuci n na n ri uka̱nda̱ruwu na̱ a̱yi e ekere a tsugbain tsa aza a Filistiya.

2 Da̱wuda lyuwa ta̱ waru a̱za̱ a̱ Mowa, reve o o'wo agbashi a̱ yi, a̱vu a̱ ta̱wusa̱a̱ yi nu utafa.

3 Da̱wuda waru lyuwa ta̱ Mogono Hadadeza va̱ Zoba nu uvon hali a rawa Hamat, a mantsa ma na u 'ya̱wa̱i u shuwa̱i tsugono tsa̱ yi a̱tsuma̱ o upasu wu Uɗolu wa̱ Yufiriti. 4 Da̱wuda pura̱ ta̱ ikeke yi ido ya̱ yi ukpakukupa (1,000) na̱ a̱soja ukpakukupa ucindere (7,000) aza a na a tsu kumbusa ido, na̱ a̱soja ukpakukupa ushin (20,000) aza a na a̱ ri a mmalu e iɗa. U kutsuma̱to ta̱ ido i na i tsu ronuso ikeke yi ido amma u lyawa ta̱ ukpaku.

5 A mantsa ma na ama a Suriya a Dimaska a̱ ta̱wa̱i a na a kamba Mogono Hadadeza va Zoba, Da̱wuda una ta̱ a̱soja e le ukpakukupa ushin nu ukpakukupa ure (22,000). 6 A̱vu u zuwa uba̱ta̱ wu nda̱na̱ta̱ wa̱ a̱soja a̱ yi a̱tsuma̱ a Dimaska va Suriya. A̱vu aza a Suriya o o'wo agbashi a̱ yi a̱vu a̱ ta̱wusa̱ yi nu utafa. A̱sulazuva a ca ta̱ Da̱wuda ulyuwu wa a aci suru uba̱ta̱ u na u 'ya̱wa̱i biti.

7 Da̱wuda pura̱ ta̱ a̱ra̱ga̱ a zinariya aza a na azagbain a̱ a̱soja a Hadadeza a̱ ta̱wa̱yi, a̱vu u ta̱wa̱to le a̱tsuma̱ a̱ Urishelima. 8 Diga Teba na̱ Kun, ilyuci ya Hadadeza, Da̱wuda pura̱ ta̱ irumushili ya̱ a̱bunda̱. Aza a na Sulemanu yuwayin ulinga a na yuwain ara'atsu a̱ rumushili, na atsura na̱ cu'un vu ntaɗa vu rumushili suru.*

9 A mantsa ma na Mogono Toyi va Hamat ma uwwai a na Da̱wuda lyuwa ta̱ a̱soja o Mogono Hadadeza va̱ Zoba nu uvon, 10 a̱vu u lyungu ulobo wa̱ yi Hadoram uba̱ta̱ u Mogono Da̱wuda na wa̱ ca̱sa̱ yi adama o ulyuwu wa a aci a na u tsura̱i e ekere a Hadadeza uba̱ta̱ wu uvon, za na da̱na̱i a yuwusan uvon na̱ Toyi. Hadoram ta̱wa̱ ta̱ na̱ cu'un vu ntaɗa n zinariya na̱ azurufa na̱ rumushili. 11 A̱vu mogono Da̱wuda tawaa A̱sulazuva itana i nda, ununa u yuwain na̱ zinariya na̱ azurufa aza a na u pura̱i e ekere a nɗa nda suru: Edom na̱ Mowa na̱ Amon na̱ Filistiya na̱ Amaleka.

12 Abishai za na mma va̱ yi ɗa Zeruya una ta̱ a̱za̱ a̱ Edom ukpakukupa kupa nu ukpakukupa kunla̱ (18,000) uba̱ta̱ wu Uka̱ri wa Akpaɗi.* 13 Da̱wuda suwa ta̱ uba̱ta̱ wa̱ a̱soja a̱tsuma̱ a Edom, a̱vu a̱za̱ a̱ Edom o o'wo agbashi a̱ yi suru. A̱sulazuva a ca ta̱ Da̱wuda ulyuwu wa a aci suru uba̱ta̱ u na u 'ya̱wa̱i biti.

14 Da̱wuda yuwan ta̱ tsugono tsa aza a Isra'ila suru, agba u yuwusan ta̱ ili i na i ri mejege na̱ a̱ɓula̱ a̱ tyo e ekere a ama a̱ yi suru. 15 Yowab za na mma va̱ yi ɗa Zeruya ɗa da̱na̱i zagbain va̱ a̱soja, Jehoshafa ulobo wa Ahilu za maɗana ma alabari, 16 Saduku ulobo wa Ahitu na̱ Abimele ulobo wa Abiyata ele ɗa nan ganu na̱ Shavisha za vi iɗana. 17 Benaya ulobo wa Yehoyida a̱yi ɗa zagbain va̱ a̱soja aza a Keretiya na̱ aza a Feletiya. Olobo a̱ Da̱wuda ele ɗa azagbain a na a̱ ri zuzu na̱ mogono.