1 A̱vu ama a Isra'ila suru o ɓoloto uba̱ta̱ wa̱ Da̱wuda a Heburon a̱vu a damma, <<A̱tsu lipu va̱ wu ɗa na̱ mpasa ma̱ wu. 2 Ɗe a̱ca̱pa̱, ko a mantsa ma na Shawulu shi mogono a̱vu ɗa za na shi ronoi Isra'ila aaɗanga a̱tsuma̱ a agara o uvon u le. Reve A̱sulazuva A̱sula̱ a̱ wu a damma wu, <Vu to o'wo za va aguɓa va ama a̱ va̱ Isra'ila, waru vu ta yuwan tsugbain tsa̱ le.> >>

3 Ana mbara ma Isra'ila suru n ta̱wa̱i uba̱ta̱ u Mogono Da̱wuda a Heburon, u yuwan ta̱ nzuwulai ne ele a Heburon a̱ ma̱ka̱ka̱n ma̱ A̱sulazuva. A̱vu a̱ tsuwa̱a̱n Da̱wuda mani'in a katala yi mogono ma Isra'ila cine a adanshi A̱sulazuva a dammai o una̱ wa Sama'ila.

4 Da̱wuda na aza a Isra'ila suru a̱ ka̱ra̱ ta̱ a̱ 'ya̱wa̱ Urishelima za na a̱yi ɗa Jebusiya, uba̱ta̱ u na aza a Jebusiya a̱ ri aza a na a̱ ri ni iɗa'a.* 5 Reve aza a Jebusiya a na a̱ ri nden ɗe a damma Da̱wuda, <<Vaa uwa pa shi.>> Suru na̱ ne Da̱wuda gba lyuwa ta̱ lyuci vu uɓaɓu vu ucira wa̱ Sihiyona, Lyuci Gbain va̱ Da̱wuda. 6 Da̱wuda damma ta̱ ɗe, <<Za na suru ronoi aaɗanga a̱ 'ya̱wa̱ uvon na aza a Jebusiya u to o'wo yali ya̱ a̱soja suru suru.>> Reve Yowab za na mma va̱ yi ɗa Zeruya fara uta̱, a̱vu gba u ushi tsugbai'in.

7 Reve Da̱wuda ka̱mba̱ na̱ nden a̱ lyuci'i, ɗaɗa e ɗe niyi Lyuci Gbain va̱ Da̱wuda. 8 A̱vu u ka̱mba̱to lyuci'i lyuci gbain na̱ yisuwishi a̱ ka̱nda̱ruwa̱, diga Milo a̱ tyo o uɓaɓu u na u ka̱nda̱ruwa̱ niyi. Reve Yowab koso lapula lyuci'i. 9 A̱vu Da̱wuda reme a yuwusan ucira adama a na A̱sulazuva o oɓolo a̱ a̱soja a zuva a̱ ri oɓolo na̱ a̱yi.

10 Ele nda ele ɗa azagbain ali o uvon a̱ Da̱wuda, aza a na a kamba niyi tsugono tsa yi tsa yuwain ucira lon, oɓolo na aza a Isra'ila suru, adama a na wo o'wo mogono, cine A̱sulazuva a yuwain adanshi adama a aza a Isra'ila.

11 Apa ugeru wa ala a ali o uvon a̱ Da̱wuda:

Yashobeyam za va Hakimoni, a̱yi ɗa u shi zagbain vi iɓolo i na a̱ tsu damma <<Aza a ta'atsu o ndolo.>> U 'ya̱sa̱n ta̱ ibata ya̱ yi u yuwan uvon na ama ukpaku uta'atsu (300), reve wu una le wutu u ta̱.

12 Za na ri o tono yi a̱yi ɗa Eliyaza ulobo wa Dodo vuma va Ahohi, vuma ta̱ a̱tsuma̱ a ama ta'atsu a na a gurai uvon o ndolo. 13 U shi ta̱ oɓolo na̱ Da̱wuda a Pas Damim a mantsa ma na aza a Filistiya o ɓolotoi adama a yuwan uvon o uɗuma̱ u yitabo, a mantsa ma na a̱za̱ o uvon a Isra'ila a sumayi aza a Filistiya. 14 Amma a̱vu e isawan e memere mo uɗuma̱'a̱. A̱vu e geshe uɗuma̱'a̱ reve gba a̱ dukwa̱ aza a Filistiya, reve gba A̱sulazuva a ca le ulyuwu wa aci lon.

15 Reve ama a ta'atsu a̱tsuma̱ a azagbain mata'atsu'u a̱ zura̱ a̱ cipa̱ ya̱ Da̱wuda a aatali a Adulam a mantsa ma na oɓolo a̱ a̱soja a aza a Filistiya a̱ va̱la̱i o Uka̱ri wa Refaya. 16 A mantsa mo ndolo Da̱wuda da̱na̱ ta̱ pe o upa'atan wu ucira. A̱soja a Filistiya gba a̱ da̱na̱ ta̱ Batalami. 17 A̱vu Da̱wuda uwwa akuli a̱ mini, reve u damma, <<A damma nanza shi ta̱ a̱ ta̱wa̱a̱ mu na̱ mini mo oso diga o ooko'o a na a̱ ri zuzu nu una̱ntsu wa Batalami!>> 18 Ɗaɗa a̱soja a ta'atsu'u a uwulai o uva̱la̱ta̱ wa aza a Filistiya, a̱vu o rono mini o ooko'o a na a̱ ri zuzu nu una̱ntsu wa Batalami, reve a tanu e tewe Da̱wuda. Agba reve u 'yuwan o sowo, a̱vu wo oco yi e iɗa a̱ ma̱ka̱ka̱n ma̱ A̱sulazuva. 19 A̱vu u damma, <<A̱sula̱ a paraa mu a na moo sowo mini ma nda! To, u to wo o'wo mu she damma mpasa ma ama o ndolo n ɗa mo sowuso, adama a na a zuwai wuma u le e meleshe ɗaɗa a̱ ta̱wa̱i na̱ a̱yi.>> Adama o ndolo Da̱wuda sowo mini'i shi.

A̱yi ɗa ili ya̱ a̱ɓula̱ i na a̱soja a ta'atsu o ucira a nda a yuwain.

20 Abishai mawun ma̱ a̱na̱wun ma̱ Yowab a̱yi ɗa u shi zagbain va aza a ta'atsu'u*. U 'ya̱sa̱n ta̱ ibata ya̱ yi u yuwan uvon na ama ukpaku uta'atsu (300) a̱vu wu una le, ɗaɗa gba e revei na̱ a̱yi tsa ama a Ta'atsu o ndolo. 21 A da̱shi yi ta̱ tsugbain ure nu uta̱ ula'awu na aza a Ta'atsu o ndolo reve gba wo o'wo zagbain le, ko na wo o'woi o ɓolo yi a̱tsuma̱ e le shi.

22 Benaya ulobo wa Yehoyida vuma ɗa na gurai uvon lon diga a̱ lyuci va Kabuzeye, u yuwan ta̱ linga gbagbain. Wu una ta̱ ama a Mowa ejere aza a na a gurai uvon lon. Urana u ro a mantsa mo uta̱nu a̱vu u cipa̱ a̱ a̱a̱ka̱ri o ro wu una kamu. 23 A̱vu waru u ga̱la̱ vuma va Masar za na shi uga'an ana e cindere na akapi. Ko na za va Masar u shi ni ibata tsa aaɗanga o uɗava o ukere wa̱ yi, Benaya zura̱ yi ta̱ na̱ a̱a̱kpa̱mkpa̱la̱. A̱vu usa yi ibata'a, reve wu una yi ni ibata ya̱ yi. 24 A̱yi ɗa linga gbagbain na Benaya ulobo wa Yehoyida yuwain, a̱yi fo u shi ta̱ u yuwan ala tsa ama o ucira a Ta'atsu o ndolo. 25 U yuwan ta̱ ala ula'awu na̱ koyan ɗa a̱tsuma̱ a ama Mata'atsu o ndolo, amma u ri a̱tsuma̱ a ama a Ta'atsu o ndolo shi. Reve Da̱wuda zuwa yi wo o'wo zagbain va̱ a̱za̱ e ipiri ya̱ yi.

26 Apa ala ali a na a la'a gurai uvon lon,

Asahe mawun ma̱ a̱na̱wun ma̱ Yowab

na̱ Elhanan ulobo wo Dodo vuma va Batalami

27 na̱ Shamo vuma va Haro

na̱ Helez vuma va Pelon,

28 na̱ Ira ulobo wa Ikesh vuma va Tekowa

na̱ Abiyeza vuma va Anato

29 na̱ Sibekai vuma va Husha

na̱ Ilai vuma va Ahohi

30 na̱ Maharai vuma va Netofa na̱ Hele ulobo wa Ba'ana vuma va Netofa

31 na̱ Itai ulobo wa Ribai vuma va Gibiya a̱tsuma̱ e iɗa ya Banyami

na̱ Benaya vuma va Piraton

32 na̱ Hurai diga o ɗolu va Ga'ash,

na̱ Abiye vuma va Arba.

33 na̱ Azimawe vuma va Bahurim,

na̱ Eliyabu vuma va Sha'albon.

34 Olobo a Hashem vuma va Gizon ele ɗa:

Jonata ulobo wa Shageye vuma va Harari 35 na̱ Ahiyam ulobo wa Saka vuma va Harari na̱

Elifa ulobo wa̱ Ur

36 na̱ Hefa vuma va Mekera

na̱ Ahiya vuma va Pelon

37 na̱ Hezro vuma va Kame

na̱ Na'arai ulobo wa Ezibai

38 na̱ Juwe mawun ma̱ a̱na̱wun ma Natan

na̱ Mibha ulobo wa Hagiri

39 na̱ Zele vuma va Amon

na̱ Naharai vuma va Berot, za na ɓanasayi Yowab za na mma va̱ yi ɗa Zeruya itana yu uvon,

40 na̱ Ira vuma va Itiri

na̱ Gare vuma va Itiri

41 na̱ Uriya vuma va Hitiya

na̱ Zabad ulobo wa Alai

42 na̱ Adina ulobo wa Shiza vuma va̱ Roben, za na shi zagbain vu ugundo wa̱ Roben oɓolo na ama mataꞌatsu ma na ma̱ shi oɓolo na̱ yi,

43 na̱ Hanan ulobo wa Ma'aka

na̱ Yoshafa vuma va Mitna

44 na̱ Uziya vuma va Ashitore

na̱ Shama na̱ Yeyiyel olobo a Hotam vuma va Arowa,

45 na̱ Yediyayel ulobo wa Shimri

na̱ mawun ma̱ a̱na̱wun ma̱ yi Yoha vuma va Tiz

46 na̱ Eliyel vuma va Mahawa

na̱ Yeribai na̱ Yoshaviya olobo wa̱ Elna'am

na̱ Itma vuma va̱ Mowa

47 oɓolo na̱ Eliyel na̱ Obe na̱ Ya'asiyel vuma va Mezoba.