1 A̱vu a̱ ta̱wa̱ na Akpati a Nzuwulai a̱ A̱sula̱ reve a zuwa yi a̱tsuma̱ o oogodo uba̱ta̱ u na Da̱wuda foɓoo niyi, a̱vu a ca kucci vu ukula̱tosu na̱ kucci muwwulai elime a̱ A̱sula̱. 2 A mantsa ma na Da̱wuda kotoi kucci vu ukula̱tosu na̱ kucci muwwulai'i, a̱vu u zuwaa ama aba'un a̱tsuma̱ a ala a̱ A̱sulazuva. 3 A̱vu u ne'eshen ama a Isra'ila ali na̱ a̱ma̱ci za suru akpatali o oopopofu na apaɗi a nama ne emeshen.

4 Da̱wuda ɗangula ta̱ a̱tsuma̱ a nan Levi aza a na a yuwan a̱ga̱nda̱ elime a Akpati a Nzuwulai a̱ A̱sulazuva, a̱vu a yuwusan ipati, nu ugodyusho, na a casuyi ala A̱sulazuva A̱sula̱ a Isra'ila ica. 5 Asaf ɗa da̱na̱i zagbain le na̱ Zakariya o tono na̱ Yeyiyel na̱ Shemiramo na̱ Yehiyel na̱ Matitiya na̱ Eliyabu na̱ Benaya na̱ Obed Edom na̱ Yeyiyel. Ele ɗa aza a na a taɗa kumburu ni igaraya. Asaf ɗa za na a̱ da̱na̱ a lapusa mupalu m malapa. 6 Benaya na̱ Yahaziyel nan ganu ele ɗa a̱a̱ da̱na̱ e ivulusa̱ avana kuci elime a Akpati a Nzuwulai a̱ A̱sula̱.

7 O urana u ndolo ɗa Da̱wuda fara zuwai Asaf oɓolo na̱ a̱za̱ a̱ yi a na a̱a̱ da̱na̱ a yuwusan ishipa yu ugodyusho a̱ tyo uba̱ta̱ wa̱ A̱sulazuva.

8 I godyushoo A̱sulazuva,

i ɗe a̱tsuma̱ a ala a̱ yi,

i damma ulinga wa̱ yi a̱tsuma̱ a nɗa.

9 Canaa niyi ishipa,

i canaa yi ica!

waru i yuwan adanshi a linga va̱ yi,

linga va asalama a na u yuwain suru.

10 Tsugbain a̱tsuma̱ a ala akiza a̱ yi,

lyawa okolo a aza a na a zamiyi A̱sulazuva,

a yuwan ma̱za̱nga̱.

11 I zami A̱sulazuva nu ucira wa̱ yi,

waru i zami urewesu wa̱ yi fo mantsa suru.

12 I cuwan na̱ linga va̱ yi va asalama,

ni ili ya asalama,

nu uge'etosu u na u cayi nu una̱ wa̱ yi,

13 A̱ɗu limatan va Isra'ila agbashi a̱ yi,

a̱ɗu muwun ma Yakubu, aza a na u ɗangulai.

14 A̱yi ɗa A̱sulazuva a̱ A̱sula̱ a̱ tsu,

uge'etosu wa̱ yi u ta̱ pe a̱tsuma̱ o uvaɗi suru.

15 Waru i cuwan na̱ Nzuwulai ma̱ yi hali hali,

na adanshi a na u dammai,

a̱ tyo mantsa ukpakukupa kupa,

16 nzuwulai n na u yuwain na̱ Ibrahim,

na akucunu a na u yuwayin Ishiyaku,*

17 za na u shitoyin e ekere a Yakubu ununa u dammai,

e ekere a Isra'ila nzuwulai n na n ri nu ukosu shi,*

18 adansa,<<E ekere a̱ wu a ɗa maa ca iɗa ya Ka'ana,

wo o'wo akunda a agadu a̱ wu.>>

19 A mantsa ma na i da̱na̱i meketeci,

uka̱la̱mu waru, waru omocin e iɗa'a,

20 a̱ da̱na̱ ta̱ agara diga e iɗa a̱ tyo e iɗa,

diga o tsugono a̱ tyo tsugono tso ro.

21 U lyawa nanza goro le shi,

waru u ɓara ta̱ ngono adama e le,*

22 adansa,

<<She i ju'wa̱n aza a na n ɗangulai wan,

ko i yuwaan ama̱sula̱ a̱ va̱ iwuya wan!>>

23 I canaa A̱sulazuva ishipa,

a̱ɗu ama o uvaɗi suru!

a̱vu i yuwan adanshi e iwawi i na u tsu yuwusan urana suru.

24 A̱vu i yuwan adanshi a tsugbain tsa̱ yi a̱tsuma̱ a nɗa,

na̱ linga va asalama a̱ yi,

a̱tsuma̱ a ama suru!

25 Adama a na A̱sulazuva zagbain ɗa,

agba u rawa ta̱ a na a ca yi ica lon.

A 'yuwan a ciga a la'a uwwa wovon wa̱ yi,

ula'awu na̱ musula̱ suru.

26 Adama a na suru musula̱ mu nɗa a̱ma̱li a ɗa,

amma A̱sulazuva a ɗa a yuwain zuva.

27 Tsugbain nu ulobonu,

a̱ ta̱ utusa̱ diga ya̱'a̱ yi,

ucira na̱ ma̱za̱nga̱,

a̱ ta̱ pe uba̱ta̱ wu nden ma̱ yi.

28 Yuwain ica ya̱ A̱sulazuva,

a̱ɗu limatan vu nɗa,

cayi A̱sulazuva ica,

na̱ tsugbain tsa̱ yi!

29 Cayi A̱sulazuva ica,

i tsugbain tsa aala a̱ yi!

I ta̱wa̱ na̱ kucci elime a̱ yi,

waru i kingyo elime a̱ yi,

i yuwaan A̱sulazuva a̱ga̱nda̱

a̱tsuma̱ a tsugbain tsa akiza a̱ yi.

30 I je'en lipu elime a̱ yi,

a̱ɗu ama o uvaɗi suru!

Uvaɗi u shuwa̱ ta̱ ulobonu,

agba wa̱a̱ jinga̱ɗa̱ shi.

31 Lyawa zuva yuwan ma̱za̱nga̱,

uvaɗi waru i yuwan ma̱za̱nga̱ mo okolo.

Lyawa a damma nɗa suru,

<< A̱sulazuva ɗa mogono!>>

32 Lyawa uɗolu yuwan ilama,

ni ili i na suru i ri pe a̱tsuma̱ a̱ yi!

Lyawa agalaci a yuwan tsu'yan na̱ ma̱za̱nga̱,

ni ili i na suru i ri pe a̱tsuma̱ e le!

33 Lyawa ɗanga va̱ a̱rumbu,

a̱ 'ya̱sa̱n uɗyo wi ishipa i ma̱za̱nga̱!

A ta yuwan ishipa i ma̱za̱nga̱ e ekere a̱ A̱sulazuva,

adama a na u ta̱ lo a̱ ta̱wa̱,

a na wee ge'eto o uvaɗi.

34 Godyoyi A̱sulazuva,

adama a na a̱yi za vi isa'ani ɗa,

icigi ya̱ yi waru u tsu vadala shi,

hali hali!*

35 A̱vu i damma yi,

<< Wawa tsu, A̱sula̱ a̱ tsu,

Za vi iwawi i tsu!

vu ɓoloto tsu, reve vu wawa tsu,

e ekere a nɗa,

adama tsu godyo aala a akiza a̱ wu,

a̱vu waru tsu yuwan afalu a̱tsuma̱ e ica ya̱ wu.

36 Ica za va wu ɗa A̱sulazuva,

A̱sula̱ a Isra'ila,

za na ri nu ufaru ko ukosu shi.>>

A̱vu ama a̱ usu, <<Lyawa wo o'wo ne>> A̱vu a cuwa a̱ A̱sulazuva.

37 A̱vu Da̱wuda lyawa lo Asaf na̱ a̱za̱ a̱ yi uba̱ta̱ wa Akpati a Nzuwulai a̱ A̱sula̱, adama a na a̱ da̱na̱ a yuwusan a̱ga̱nda̱ lo kuci, ununa a zuwai a̱ da̱na̱ a yuwusan urana suru. 38 Waru u lyawa ta̱ lo Obed Edom na̱ a̱za̱ a̱ yi kupota̱li na̱ kula̱ a na a̱ da̱na̱ a yuwusan a̱ga̱nda̱ oɓolo ne ele. Obed Edom ulobo wa Yedutun na̱ Hosa ele ɗa aza a na a yuwusan ipiri yu una̱ntsu.

39 Da̱wuda lyawa ta̱ lo Saduku ganu, oɓolo na̱ a̱za̱ a̱ yi nan ganu uba̱ta̱ wa Akpati a Nzuwulai a̱ A̱sulazuva uba̱ta̱ u na a casu kucci a̱tsuma̱ a Gibiyon. 40 Ele ɗa a̱ da̱na̱ a casu kucci vu ukula̱tosu uba̱ta̱ wa̱ A̱sulazuva zuva masa'a kuci, usana nu ulivu ununa wila̱ wa̱ A̱sulazuva a dammai, aza a na u cayi aza a Isra'ila suru. 41 Oɓolo ne ele a̱ da̱na̱ ta̱ na̱ Heman na̱ Yedutun na akapi aza a na a ɗangulai ko'o na a aala adama a̱ da̱na̱ a yuwusan ishipa nu ugodyusho uba̱ta̱ wa̱ A̱sulazuva, adama e icigi ya̱ yi i na i tsu vadala shi mantsa suru. 42 Heman na̱ Yedutun ele ɗa aza a na a̱a̱ da̱na̱ e ivulusa̱ avana na̱ malapa ma mupalu m malapa na̱ malapa ma akapi e itana yu ugodyusho ya̱ A̱sula̱ adama e ishipa ya Akiza. Olobo Yedutun ɗa a zuwai a̱ da̱na̱ o una̱ntsu.

43 A̱vu akapi a ama suru a̱ ka̱ra̱, za suru tyo ta̱ o u'wa wa̱ yi, reve Da̱wuda fo ka̱mba̱ o u'wa adama a na waa a zuwaa u'wa yi aba'un.