1 A mantsa ma na Da̱wuda kutsai u da̱na̱ ta̱ na a'wan a̱bunda̱, a̱vu u katala ulobo wa̱ yi Sulemanu mogono ma Isra'ila.*

2 A̱vu Da̱wuda ɓoloto azagbain a Isra'ila suru, na̱ nan ganu oɓolo na̱ nan Levi. 3 A̱vu e kece nan Levi aza a na a rawai a'wan mata'atsu a̱ 'ya̱wa̱ zuva, a̱vu a̱ tsura̱ ama a na a rawai ukpakukupa mata'atsu nu ukpakukupa kunla̱ (38,000). 4 A̱vu Da̱wuda damma, <<Ama ukpakukupa ushin nu ukpakukupa una̱shi (24,000) a̱ɗu ɗa ya̱a̱ ka̱lyuwa̱ ulinga wa̱ A̱a̱'isamapaɗa a̱ A̱sulazuva, ukpakukupa uta̱li (6,000) ele ɗa azagbain na̱ a̱za̱ o uge'etosu. 5 Ukpakukupa una̱shi (4,000) ele ɗa a̱za̱ e ipiri yu una̱ntsu, a̱vu ukpakukupa una̱shi (4,000) waru a yuwan ica a̱ tyo uba̱ta̱ wa̱ A̱sulazuva ni itana yi ishipa aza a na n foɓoi adama a yuwan ulinga u ndolo ne ele.>> 6 A̱vu Da̱wuda ne'eshen nan Levi oɓolo oɓolo ununa olobo a̱ Levi a̱ ri, Gashon na̱ Koha na̱ Merari.

7 Olobo a Gashon ele ɗa:

Ladan na̱ Shimeyi.

8 Olobo a Ladan ele ɗa:

Yehiyel ulobo wu ufaru na̱ Zetam na̱ Juwe ele ɗa olobo a ta'atsu suru suru.

9 Olobo a Shimeyi ele ɗa:

Shelomi na̱ Haziyel na̱ Haran, ele ɗa olobo a ta'atsu suru suru.

Ele ɗa waru azagbain a 'wa va Ladan.

10 Olobo a Shimeyi ele ɗa:

Yaha na̱ Zina na̱ Yewush na̱ Beriya.

Olobo a Shimai ele ɗa olobo a̱ na̱shi suru suru.

11 Yaha ɗa ulobo wu ufaru na̱ Ziza o tono ire. Amma Yewush na̱ Beriya a̱ ri na̱ muwun mo olobo lon shi, adama o ndolo ɗa e kece nle a̱tsuma̱ o ugundo u ta̱.

12 Olobo a Koha ele ɗa:

Amuram na̱ Izaha na̱ Heburon na̱ Uziye, ele ɗa olobo a̱ na̱shi suru suru.

13 Olobo a Amuram ele ɗa:

Haruna na̱ Musa.

A̱vu a tawa Haruna na̱ limatan va̱ yi, adama a tawa ili i na i la'ai akiza hali hali, na aa ca kucci a̱ ma̱ka̱ka̱n ma̱ A̱sulazuva, na aa yuwaan yi a̱ga̱nda̱ a̱vu waru a zuwusa aba'un na aala a̱ yi hali hali.*

14 A̱vu e kece olobo a Musa vuma va̱ A̱sula̱ a̱tsuma̱ o ugundo wa̱ Levi.

15 Olobo a Musa ele ɗa:

Gashon na̱ Eliyaza.

16 Olobo a Gashon ele ɗa:

Shebuwe ulobo wu ufaru.

17 Olobo wa Eliyaza ele ɗa:

Rehabiya ɗa ulobo wu ufaru.

Eliyaza da̱na̱ no olobo o ro shi, amma Rehabiya da̱na̱ ta̱ no olobo a̱bunda̱ lon.

18 Olobo a Izaha ele ɗa:

Shelomi ɗa ulobo wu ufaru.

19 Olobo a Heburon ele ɗa:

Yeriya ulobo wu ufaru na̱ Amariya za va ire na̱ Yahaziyel za va ta'atsu na̱ Yokimeyam za va̱ na̱shi.

20 Olobo a Uziye ele ɗa:

Mika ulobo wu ufaru na̱ Ishiya za va̱ ire.

21 Olobo a Merari ele ɗa:

Mali na̱ Mushi.

Olobo a Mali ele ɗa:

Eliyaza na̱ Kish.

22 Eliyaza kuwa̱ ta̱ babu muwun mo olobo, muwun me esheli n ɗa goon u da̱na̱i ne ele. A̱za̱ a̱ le olobo a̱ Kish, ele ɗa a zuwa nle.

23 Olobo a̱ Mushi ele ɗa:

Mali na̱ Eda na̱ Yeremo, ele ɗa olobo a ta'atsu suru suru.

24 Ele nda ele ɗa olobo a̱ Levi na̱ limatan le, azagbain a na a ɗanai ala e le na̱ cine e kece nle koko'o. Aza a na a rawai a'wan ushin a gawan a na aa yuwan a̱ga̱nda̱ a̱ A̱a̱'isa̱mapaɗa a̱ A̱sulazuva.

25 Adama a na Da̱wuda damma ta̱, <<A̱sulazuva A̱sula̱ a Isra'ila, a̱ ta̱wa̱a̱ ta̱ na̱ wivuwun e ekere a ama a̱ yi, a̱vu u ta̱wa̱ a na wa̱a̱ da̱nu Urishelima hali hali. 26 Adama o ndolo nan Levi a̱a̱ da̱shi tanu Oogodo a agalaci a̱ A̱sulazuva shi, ko itana i na a tsu yuwan ulinga ne ele a mantsa ma̱ a̱ga̱nda̱ shi.>>* 27 E ekere o udammu wu ukosu wa̱ Da̱wuda, e kece ta̱ nan Levi fo aza a na a̱ ri na a'wan ushin a gawan.

28 Ulinga u nan Levi a̱yi ɗa a kamba limatan va Haruna ulinga wa̱ A̱a̱'isa̱mapaɗa a̱ A̱sulazuva, a̱ ka̱lyuwusa̱ a̱tsuma̱ o u'wa na asula a̱ nge'en a̱ yi, a̱vu a̱ ka̱mba̱to itana ya akiza suru cece, na aa yuwusain linga ro suru o u'wa wa̱ A̱sula̱.* 29 Ele ɗa aza a na a tsu zuwusa opopofu a akiza a apada, ni yira i lashi adama a̱ kucci vi ishina, ne emeshen a aza a na a̱ ri na̱ wolilo shi, na̱ waru uzusun nu uja̱mba̱ru u yira na̱ suru nkundatsu nna a̱a̱ kunzusu ume na̱ mgbain. 30 Usana suru a tsi isawan ta̱ o godyo, a̱vu a yuwan ica e ekere a̱ A̱sulazuva. Ne ɗa waru a tsu yuwan nu ulivu, 31 na̱ mantsa ma na suru a ca kucci vu ukula̱tosu va ashibi e ekere a̱ A̱sulazuva, na̱ A̱buki o Woto u sa'avu na̱ a̱buki a na a zuwai. A ta yuwan a̱ga̱nda̱ a̱ ma̱ka̱ka̱n ma̱ A̱sulazuva mantsa suru cine a̱ ri a̱bunda̱ e le na̱ cine a damma nle a yuwan.

32 A̱vu nan Levi aa yuwan linga le wo Oogodo o Uga'asusan, na̱ a̱a̱'isa̱, waru aa kamba a̱za̱ e le olobo a Haruna, adama a̱ a̱ga̱nda̱ o u'wa wa̱ A̱sulazuva.