1 Apa ama a na a̱ ta̱wa̱i uba̱ta̱ wa̱ Da̱wuda a̱tsuma̱ a Ziklag, a mantsa ma na u pa'ayin Mogono Shawulu ulobo wa̱ Kish. A̱ ta̱ pe a̱tsuma̱ a aza a na a gurai uvon a na a kambai Da̱wuda uvon. 2 Ama a ɗa a na gurai uvon ni ibata lon waru a gura ta̱ utewishin va aya na̱ a̱bitsutsu nu ukere wu usa'ani ko ugula̱. Ele ama a Banyami a ɗa o ugundo wa Shawulu, waru ele ɗa:

3 Ahiyeza zagbain le na̱ Yowash olobo a Shema vuma va Gibiya,

na̱ Yeziyel na̱ Pele olobo a Azimave

na̱ Beraka na̱ Yehu va Anato

4 na̱ Ishimaya vuma va Gibiyon vuma vu ucira a̱tsuma̱ a Mata'atsu, za na da̱na̱i zagbain va Mata'atsu'u,

Irimiya na̱ Yahaziyel na̱ Yohanan na̱ Yozaba vuma va Gedera

5 na̱ Eluzai na̱ Yerimo na̱ Beyaliya na̱ Shemariya na̱ Shefatiya vuma va Hari

6 na̱ Elikana na̱ Ishiya na̱ Azare na̱ Yoweze na̱ Yashobeyam za va Kora

7 na̱ Yowela na̱ Zebadiya ulobo wa Yeroham vuma va Gedo.

8 Apa a nda aza a Gadu a na a̱ ka̱mba̱i ya̱ Da̱wuda a̱tsuma̱ o uba̱ta̱ wu upa'atan wu ucira a̱tsumona. Ele aza a na a gurai uvon lon ɗa, waru a̱ da̱na̱ ta̱ ufoɓu adama o uvon a̱ tu fo nu uguru wu u ɓana̱sa wa̱ a̱ra̱ga̱ ni ibata. Urewesu u le u rotso ta̱ urewesu wi ikamu, agba a̱ tsu da̱na̱ ta̱ a sumusa tsu na vu revei mere'on a̱tsuma̱ a masasan.

9 Eze ɗa da̱na̱i zagbain

na̱ Obadiya za na da̱na̱i zagbain va̱ ire na̱ Eliyabu za va ta'atsu

10 na̱ Mishmana za va̱ na̱shi na̱ Irimiya za va tawun

11 na̱ Atayi za va̱ ta̱li na̱ Eliyel za va̱ cindere

12 na̱ Yohanan za va̱ kunla̱ na̱ Elzaba za va̱ kuci

13 na̱ Irimiya za va kupa na̱ Makbanai za va kupa na̱ za ta̱.

14 Aza a Gadu a nda ele ɗa nan yali ya̱ a̱soja, za na ka̱la̱ma̱ n le ucira urawa ta̱ ucira wa̱ a̱soja ukpaku (100), waru ucira wu za na la'a n le ucira u rawa ta̱ ucira wa̱ a̱soja ukpakukupa (1,000). 15 Ele ɗa aza a na a pasai Uɗolu wa̱ Urudu a̱tsuma̱ o woto wu ufaru a mantsa ma na a̱ da̱na̱i a yuwusan mini mo ucira, a̱vu a̱ gba̱ra̱ ama a na a̱ ri na̱ nden o uka̱ri, diga o upasu wa asana a̱ tyo wa̱ a̱livu.

16 Ozo oro a̱tsuma̱ o ugundo wa Banyami na akapi a ama a Yahuda a̱ ta̱wa̱ ta̱ uba̱ta̱ wa Da̱wuda a̱tsuma̱ o uba̱ta̱ wu upa'atan wa̱ yi. 17 A̱vu Da̱wuda uta̱ adama u ga'aton le a̱vu u damma le, <<N na̱ i ta̱wa̱ ta̱ uba̱ta̱ u va̱ na̱ nden ma asuvu na adama a na ya kamba mu, n tu ufoɓu u na maa lyawa ɗu i ɓolo aci na̱ a̱mu. Amma n na̱ i ta̱wa̱ ta̱ adama a na ya̱ luluma̱ mu reve i ca mu e ekere a n'yuwatan n va̱ agba a̱mu waru n yuwan ɗu unusu shi, lyawa A̱sula̱ a nkaya n tsu ee ene a̱vu u ge'eto ɗu.>>

18 A̱vu Ruhu va̱ A̱sula̱ cipa̱a̱ Amasa, zagbain va mata'atsu, a̱vu u damma,

<< A̱tsu a̱za̱ a̱ wu ɗa Da̱wuda!

Tsu to oɓolo na̱ a̱vu, ulobo wa̱ Yese!

Asuvu nden, asuvu nden n da̱na̱ oɓolo na̱ a̱ vu,

waru asuvu nden n da̱na̱ oɓolo na aza a na a kambusa wu!

Adama a na A̱sula̱ a̱ wu a ta kambusa wu.>>

A̱vu Da̱wuda ushi le reve u zuwa le o o'wo azagbain a̱ a̱soja o uvon a̱ yi.

19 A̱soja o ro a Manase a̱ ka̱mba̱ ta̱ ya̱ Da̱wuda adama a na aa kamba yi a mantsa ma na wu uta̱i na aza a Filistiya a na a yuwan uvon na̱ Shawulu. A̱yi na ama a̱ yi a 'yuwan ta̱ a na a kamba aza a Filistiya adama a na, ana o kotoi a̱sa̱la̱, azagbain a Filistiya a̱ gba̱ra̱ yi ta̱. A̱vu a damma, <<U ta̱ da̱na̱ o una̱ u wuma u tsu n na̱ tsu lyawa Da̱wuda yuwan uvon na̱ a̱tsu u ta̱ ta̱wa̱ u gura ka̱mba̱ tsu o ucina̱ a̱vu u kamba zagbain va̱ yi Shawulu.>> 20 A mantsa ma na Da̱wuda ka̱ra̱i a̱ tyo Ziklag, ele nda ele ɗa a̱soja a Manase aza a na a̱ ka̱mba̱i uba̱ta̱ wa̱ yi: Adna na̱ Yozaba na̱ Yediyayel na̱ Mikayel na̱ Yozaba na̱ Elihu na̱ Ziletai, azagbain a̱ a̱soja o ukpakukupa kupa ɗa ozo o ugundo wa Manase. 21 A kamba ta̱ Da̱wuda adama a na wa̱a̱ gba̱ra̱ aza a na a̱ ta̱wusa̱ yi nu uvon, adama a na suru nle aza a na a gurai uvon lon ɗa, agba ele azagbain a ɗa a̱tsuma̱ a̱ a̱soja o uvon a̱ yi. 22 A̱tsuma̱ a rana suru a̱soja a̱ tsu ta̱wusa̱ ta̱ adama a na aa kamba Da̱wuda, hali acina mantsa ma na u ɓolotoi a̱soja a̱bunda̱, ununa a̱soja a̱ A̱sula̱ a̱ ri.

23 Apa nda ala a̱soja a na o foɓoi adama o uvon aza a na a̱ ta̱wa̱i uba̱ta̱ wa̱ Da̱wuda a̱tsuma̱ a̱ Heburon a na avadala tsugono tsa Shawulu a̱ tyo e ekere a̱yi, ununa adanshi A̱sulazuva a dammai.

24 A̱soja a Yahuda a̱ da̱na̱ ta̱ na ali o uvon a na a̱ ri uɓa̱nu na̱ a̱ra̱ga̱ ni ibata ukpakukupa uta̱li nu ukpakukunla̱ (6,800) adama o uvon.

25 A̱soja a Saminu, aza a na o foɓoi adama o uvon ukpakukupa ucindere nu ukpaku (7,100) u ɗa.

26 A̱soja a̱ Levi ele ɗa ukpakukupa una̱shi na̱ ukpakuta̱li (4,600). 27 oɓolo na̱ Yehoyida, zagbain vu u'wa wa Haruna, za na ri na̱ a̱soja ukpakukupa uta'atsu na̱ ukpakucindere (3,700). 28 oɓolo na̱ Saduku, za na gurai uvon lon, oɓolo na azagbain a̱soja diga o u'wa wa̱ a̱yi.

29 A̱soja a Banyami ama a Shawulu, a̱soja ukpakukupa uta'atsu (3,000), aza a na a raɓatoi a̱tsuma̱ o u'wa wa Shawulu hali mantsa ma nda.

30 A̱soja a Ifiramu, aza a na a gurai uvon lon ɗa, aza a na revei lon, diga a̱tsuma̱ a 'wa le ukpakukupa ushin na̱ ukpakukunla̱ (20,800).

31 Uɓatsulai wa a ama o ugundo wa Manase, a na a ca yi aala ele adama a na a̱ ta̱wa̱ a na a katala Da̱wuda mogono okokolo, a̱bunda̱ le ɗa ukpakukupa na̱ kunla̱ (18,000).

32 A̱soja a Isaka, aza a na e revei mantsa ni ili i na i lobonoi aza a Isra'ila a yuwan azagbain ukpakukupa ure (200) u ɗa, oɓolo na̱ mmaci ma̱ yi na a yuwusan tsutoni na̱ a̱yi.

33 A̱soja a̱ Zebulun, a̱soja o urevu o ufoɓu adama o uvon na̱ cu'un vi itana yu uvon suru, a na a kamba Da̱wuda no okolo a̱ ta̱ ukpakukupa kupa uton (50,000).

34 A̱soja a Nafutali azagbain ukpakukupa (1,000) ɗa, oɓolo na̱ a̱soja ukpakukupa mataꞌatsu na̱ a̱za̱ a̱ cindere (37,000) a̱soja a na a̱ ɓa̱na̱sa̱ a̱ra̱ga̱ ni ibata.

35 A̱soja a Dan, aza a na a̱ ri ufoɓu adama o uvon ukpakukupa ushin na̱ kula̱ nu ukpaku uta̱li (28,600) ɗa.

36 A̱soja a Asha ukpakukupa amunga (40,000) ɗa, waru a̱ tu ufoɓu adama o uvon.

37 Diga o upasu wa asana o Uɗolu wa̱ Urudu, a̱soja a̱ Roben na̱ Gadu nu uɓatsulai wu ugundo wa Manase, ufoɓu na̱ cu'un vi itana yu uvon suru ukpakukupa ukpaku nu ushin (120,000).

38 Suru nle a̱soja a ɗa aza a na a̱ ri ufoɓu a na a ca yi aciyele adama o uvon. A̱ ta̱wa̱ ta̱ a̱tsuma̱ a̱ Heburon na̱ okolo a̱ ta̱ adama a na a katala mogono Da̱wuda okokolo a̱tsuma̱ a Isra'ila. Suru fo akapi aza a Isra'ila a̱ da̱na̱ ta̱ na̱ majiyan ma̱ a̱ ta̱ a na a katala Da̱wuda mogono. 39 Ama'a a yuwan ta̱ rana ta'atsu na̱ Da̱wuda ɗe, a lyuwusa no osowi, adama a na aza a 'wa le oɓoloto ta̱ ilyalya adama e le. 40 Mmaci n le diga a̱tsuma̱ e iɗa ya alanga ele ɗa Isaka na̱ Zebulun na̱ Nafutali. A̱vu a̱ ta̱wa̱a̱ le ni ilyalya zuva vu nloli na arakumi na̱ nloli mi ido no ogono e inan. A̱ da̱na̱ ta̱ na̱ yira ya̱ a̱bunda̱, nu ubiri wu ɗewu, na emeshen o ukangalu, na̱ masayan na̱ mani'in, ni inan ni ikyon, adama a na a̱ da̱na̱ ta̱ na̱ ma̱za̱nga̱ a̱tsuma̱ a Isra'ila.