1 Ana a̱yi ndolo kotoi, a̱vu Nahash mogono ma a aza a Amon ma̱ kuwa̱, reve ulobo wa̱ a̱ yi mo o mogono o una̱ wa̱ yi. 2 A̱vu Da̱wuda damma, <<N ta roco wi isa'ani aciya a Hanun ulobo wa Nahash, adama a na Dada va̱ yi roco a̱mu ta̱ isa'ani.>> Da̱wuda lyungu ta̱ nlingata ma̱ yi uba̱ta̱ wa Hanun tsura̱ a̱ 'ya̱wa̱ a̱ ca̱sa̱ yi na̱ wiruta̱ wa Dada va̱ yi. Amantsa ma na nlingata ma̱ Da̱wuda n ta̱wa̱i uba̱ta̱ wa Hanun a̱tsuma̱ e iɗa ya Amon a na a̱ ca̱sa̱ yi na̱ wirota̱, 3 a̱vu azagbain a Amon a damma Hanun, <<Vu ta majiyan Da̱wuda ta casu dada va̱ wu tsugbain hali a na u lyungu wa̱ nuwu aza a na a̱ ca̱sa̱ wu na̱ wiruta̱? Ashe ugbozu u ɗa u yuwain nda'a tsura̱ e idana lyuci tsu, waru a tawa yi utyo, na we e reve ucira u tsu adama a lyuwa tsu nu uvon shi?>>

4 Ɗaɗa Hanun remei nlingata ma̱ Da̱wuda'a a̱vu u puna le ntsuka̱ upasu u ta̱ a̱vu wu paɗa le a̱tugu o ugundo. Reve u lyawa le a̱ ka̱ra̱.

5 Ana a dammai Da̱wuda mogono aɗa a nda, reve u lyungu nlingata a cina ama'a, adama a na a zuwa ta̱ ama'a a uwwa wono lon. Mogono ma damma ta̱, <<Yi isawan Jeriko hali ntsuka̱ n ɗu n kungwa, reve i ka̱mba̱ a̱ wa̱ta̱.>>

6 Ana aza a Amon e revei o o'wo ta̱ ili yu upan e ekere a̱ Da̱wuda adama e ili i na a yuwain, reve Hanun na aza a Amon a̱ lyungu na̱ azurufa ukpakukupa kupa (1,000) adama a na o okopo a̱ a̱soja na aza a na a kumbusa ido diga Mesopotamiya nu upasu wa Ma'aka va Suriya na̱ Zoba. 7 O okopo ta̱ ikeke yi ido ukpakukupa mata'atsu na̱ ejere (32,000), oɓolo na̱ mogono ma Ma'aka oɓolo na̱ a̱soja a̱ yi. A̱vu a̱ ta̱wa̱ a̱ va̱la̱ zuzu na̱ Medeba. Reve aza a Amon o oɓoloto diga e ilyuci i le adama a na a yuwan uvon.

8 Ana Da̱wuda uwwai ne a̱vu u lyungu Yowab na̱ a̱soja a na a gurai uvon suru adama a yuwan uvon ne ele. 9 Reve aza a Amon o uta̱ a dara adama o uvon o una̱ntsu u lyuci gbain u le, ngono n na a banuyi gba a dara ta̱ ɗe agalaci adama a na a yuwan uvon.

10 Ana Yowab e enei u ta yuwan uvon elime na̱ a̱ca̱pa̱, reve u ɗangula a̱soja o ro aza a na a la'a gurai uvon diga a̱tsuma̱ a ali a Isra'ila adama a yuwan uvon na aza a Suriya. 11 A̱vu u zuwa akapi a̱soja za̱la̱ tsugbain tsa Abishai mawun ma̱ a̱na̱wun ma̱ yi adama u rono le aaɗanga, avu Abishai dara le adama a na a yuwan uvon na aza a Amon. 12 A̱vu Yowab damma Abishai, <<Na aza a Suriya a la'a ucira u va̱, to, vu ta̱wa̱ vu kamba mu, amma n na a ama a Amon a la'a ucira wa̱ wu, to, n ta̱ ta̱wa̱ n kamba wu. 13 Tsu kaɓa asuvu, tsu yuwan nla̱ngi nu ucira adama a ama a̱ tsu, na̱ lyuci va̱ A̱sula̱ a̱ tsu. Lyawa A̱sulazuva a yuwan ili i na i lobono niyi.>>

14 Ana Yowab na̱ a̱soja a̱yi a̱ zura̱i zuzu adama e teme uvon, reve gba a̱soja a Suriya a suma elime a̱yi. 15 Ana aza a Amon enei aza a Suriya e ilaɗi, reve ele fo a suma a̱ ma̱ka̱ka̱n ma Abishai reve a uwa a̱tsuma̱ a̱ lyuci. Ɗaɗa Yowab ka̱mba̱i Urishelima diga uba̱ta̱ o uvon na aza a Amon.

16 Ana a aza a Suriya e enei a aza a Isra'ila a lyuwa le ta̱ nu uvon reve a̱ lyungu nlingata a na o uta̱a̱ aza a Suriya a na a̱ da̱na̱i upasalai wu Uɗolu wa̱ Yufiriti, na̱ Shoba zagbain va̱ a̱soja a Hadadeza za na o ronuso le aaɗanga.

17 Ana a dammai Da̱wuda aɗa a nda, reve u ɓoloto a̱soja a Isra'ila suru uba̱ta̱ u ta̱, reve a pasalai Uɗolu wa̱ Urudu, a dara adama a yuwan uvon ne ele. Reve aza a Suriya e reme uvon na̱ Da̱wuda. 18 Amma a̱soja a Suriya a sumaa ta̱ a̱soja a Isra'ila. A̱vu Da̱wuda una a̱soja a Suriya akumbi e ikeke yi ido ukpakukupa ucindere (7,000) na̱ a̱soja ana ukpakukupa amunga (40,000). Reve fo wu una Shoba yali ya̱ a̱soja a Suriya.

19 Ana ngono n na n ri za̱la̱ tsugono tsa Hadadeza suru e enei aza a Isra'ila a lyuwa ta̱ aci ele nu uvon, reve a zami nden n lafiya na̱ Da̱wuda, a̱vu o o'wo agbashi a̱ yi. Adama o ndolo aza a Suriya a̱ da̱shi usu a na a kamba aza a Amon waru shi.