1 A̱vu mogono Hiram va Taya lyungu nlingata a̱ tyo ya̱ Da̱wuda, oɓolo na akpata a Sida na aza na a yuwusan usa na aatali na̱ ozo o ushe'en wa akpata adama a na a suwaa yi ukobu. 2 Da̱wuda gura ta̱ reve a na A̱sulazuva a ɗa a̱ shuwa̱ niyi wo o'wo mogono a aci a aza a Isra'ila waru tsugono tsa yi tsa̱ tsura̱ ta̱ ulyuwu we elime lon adama a ama a̱ yi aza a Isra'ila.

3 Da̱wuda tara ta̱ a̱ma̱ci a̱bunda̱ diga a̱tsuma̱ a̱ Urishelima reve o o'wo dada vo olobo ne esheli a̱ a̱bunda̱. 4 Apa nda ala a̱ muwun n na a matsaan niyi ɗe: Shamuwa na̱ Shoba na̱ Natan na̱ Sulemanu 5 na̱ Ibha na̱ Elishuwa na̱ ElPele 6 na̱ Noga na̱ Nefe na̱ Yafiya 7 na̱ Elishama na̱ Beyeliyada na̱ Elifele.

8 A mantsa ma na aza a Filistiya a uwwai a na a̱ tsuwa̱a̱n ta̱ Da̱wuda mani'in a na wo o'wo mogono ma aza a Isra'ila, reve o uta̱ nu ucira izami ya̱ yi, amma Da̱wuda uwwa ta̱ adama aɗa e le, a̱vu wu uta̱ adama a na waa ga'an ne ele. 9 Agba aza a Filistiya a̱ ta̱wa̱ ta̱ nu uvon, a̱vu a̱ pura̱ itana yu Uka̱ri wa aza a Refaya. 10 A̱vu Da̱wuda pati ya̱ A̱sula̱: <<N 'ya̱wa̱ n yuwan uvon na aza a Filistiya? Vu ta ca le e ekere a̱ va̱?>>

Reve A̱sulazuva a̱ usu yi, <<Wala, n ta ca wu ele e ekere a̱ wu.>>

11 A̱vu Da̱wuda oɓolo na̱ a̱soja a̱yi a̱ ka̱ra̱ a̱ tyo Ba'al Perazim, ɗe ɗa u tsura̱i ulyuwu wa aci e ekere ele. A̱vu u damma, << Ununa mini ma̱ tsu ɓoso, A̱sula̱ oɓoso ta̱ n'yuwatan n va̱ e ekere a̱ va̱.>> Adama o ndolo reve e ɗe ala o uba̱ta̱'a̱ Ba'al Perazim, adansa A̱sulazuva a ɗa o ɓosoi. 12 Aza a Filistiya a lyawa ta̱ musula̱ n le lo uba̱ta̱'a̱, a̱vu Da̱wuda ca u dammu na a̱ kula̱to e le a̱tsuma̱ a akina.

13 A̱vu waru aza a Filistiya a̱da̱shi ta̱wa̱ nu uvon a̱tsuma̱ o uka̱ri, 14 a̱vu Da̱wuda patiyisa A̱sula̱ waru, a̱vu A̱sula̱ a̱ usu yi, <<She vu 'ya̱wa̱ mejege wan, amma vu ka̱nda̱ruwa̱ le a̱vu vu riya̱ le nu uvon elime aɗanga vu ujan. 15 A mantsa ma na vu uwwai ilama ya a̱soja a̱ mota̱ uba̱ta̱ wu ɗanga vu ujan, vu uta̱ adama o uvon, adama a na u rotso ta̱ a na A̱sula̱ a wala ta̱ elime a na wo kototo a̱soja a Filistiya.>> 16 Da̱wuda yuwan ta̱ ununa A̱sula̱ a damma niyi, a̱vu o kototo a̱soja a Filistiya, diga a̱tsuma̱ a Gibiyon a̱ tyo Geza.

17 Da̱wuda yuwan ta̱ ala a̱tsuma̱ a nɗa suru, a̱vu A̱sulazuva a zuwa suru nɗa mu uwwa wovon wa̱ yi.