1 Ana a'wan a̱ ka̱nda̱ruwa̱i a mantsa ma na ngono n tsu 'ya̱wa̱ uba̱ta̱ o uvon, a̱vu Da̱wuda lyungu Yowab oɓolo na a azagbain a̱ yi na̱ a̱soja a Isra'ila suru a̱ 'ya̱wa̱ uvon. O kototo ta̱ aza a Amon, a̱vu a̱ ka̱nda̱ruwa̱ lyuci va Raba nu uvon. Amma Da̱wuda gba da̱na̱ ta̱ a̱tsuma̱ a̱ Urishelima. 2 A̱vu u foɗo okokolo o tsugono a aaci o mogono me ele. Waru ume wa̱ yi u rawa ta̱ makundatsu ma zinariya mata'atsu na̱ za ta̱, waru u ta̱ pe na atali e ikebe a̱tsuma̱ a̱ yi. Reve o oto Da̱wuda okokolo'o a aaci a̱ yi. A̱vu u pura̱ itana ya̱ a̱bunda̱ i lyuci'i. 3 A̱vu Da̱wuda uta̱a̱ ama a̱ lyuci'i, reve u zuwa le a yuwan ulinga na̱ n'inutsu nu ucira, na̱ nshe'en m ma̱ka̱pa̱, na aɓau. Ne ɗa Da̱wuda yuwain ni ilyuci ya aza a Amon suru. Reve Da̱wuda na̱ a̱soja a̱yi suru a̱ ka̱mba̱ Urishelima.

4 Ana a̱yi ndolo kotoi, reve uvon u ro u 'yowisa̱n e ekere a aza a Filistiya na a aza a Isra'ila a̱tsuma̱ a Geza, a̱vu Sibekai vuma va Husha una Sifa umatsun wa Refaya. A̱vu o kototo aza a Filistiya.

5 A̱vu uvon u ro u 'yowisa̱n e ekere a Isra'ila na aza Filistiya, a̱vu Elhanan ulobo wa Jayi una Lami mawun ma̱ a̱na̱wun ma̱ Goliya vuma va Gat, za na aaci e ibata ya̱ yi a rawai aaɗanga o uɗava.*

6 A̱vu a̱ da̱shi yuwisan uvon u ro waru a Gat. Vuma gbain ro shi ta̱ lo na akatsu a̱ ta̱li a̱ ta̱li o ukere na akatsu a̱ ta̱li a̱ ta̱li a ana, akatsu ushin na̱ a̱za̱ a̱ na̱shi suru suru. A̱yi fo limatan va Rafa ɗa. 7 A mantsa ma na u yuwayin aza a Isra'ila ulamu, a̱vu Jonata za na a̱yi ɗa ulobo wa Shimeya mawun ma̱ a̱na̱wun ma̱ Da̱wuda mo una yi.

8 Ama a ta'atsu a nda a na Da̱wuda unai na ama a̱ yi, umatsun wa Rafa a ɗa diga a̱tsuma̱ a Gat.