1 Mekerenkesu ma̱ 'yon ta̱ nla̱ngi na a aza a Isra'ila, a̱vu u zuwa Da̱wuda kece ama a Isra'ila. 2 A̱vu Da̱wuda damma Yowab na̱ nan yali ya̱ a̱soja,<<Walai i 'ya̱wa̱ i kece a aza a Isra'ila diga Biyasheba a̱ tyo Dan. A̱vu i ta̱wa̱ i ka̱mbuwa̱ mu adama a na me reve a̱bunda̱ e le.>>

3 Amma a̱vu Yowab usu, <<Lyawa a̱ A̱sulazuva a̱ da̱shi doɓonu ama a̱ yi a̱bunda̱ hali ukpaku u la'a cine a̱ ri gogo. Zagbain va̱ mogono, suru nle a̱ a̱za̱ a̱ wu ɗa shi? Adama a̱ nye a ɗa zagbain va̱ cigai a na wa yuwan ili i nda? Adama a̱ nye a ɗa voo ronoo ama a Isra'ila unusu u nda?>>

4 Amma suru na̱ ne adanshi o mogono a la'a ta̱ za va Yowab ucira, a̱vu Yowab 'yon u ka̱ra̱ uka̱nda̱ruwa̱ Isra'ila suru a̱vu u ka̱mba̱ Urishelima. 5 A̱vu Yowab ka̱mbuwa̱ Da̱wuda a̱bunda̱ a̱soja a na u kecei: A̱tsuma̱ a Isra'ila suru a̱ da̱na̱ ta̱ na̱ a̱soja ukpakukupa udoɓonuwu nu ukpakukupa ukpaku (1,100,000) aza a na a rawai a̱ guza̱ matsun me pe'eni, oɓolo nu ukpakukupa amunga nu ukpakukupa ucindere (470,000) a̱tsuma̱ a Yahuda.

6 Amma Yowab zuwa pe nan Levi na̱ Banyami a̱tsuma̱ e mekece shi, adama a na u dammu u mogono u yo'ono yi shi. 7 A̱sulazuva a uwwa uyo'o wi ili ya ndolo shi, a̱vu u ge'eto aza a Isra'ila.

8 A̱vu Da̱wuda damma A̱sula̱, <<N yuwan ta̱ unusu lon a na n yuwain ili i nda. Amma gogo, n ta patishi wu vu yuwaan aagbashi a̱ wu gafura vu unusu wa̱ yi. N yuwan ta̱ a̱ba̱jini a̱ tsulo.>>

9 A̱vu A̱sulazuva a damma Gadu za na a yuwusaan Da̱wuda yindi, 10 <<'Ya̱wa̱ vu damma Da̱wuda,<Mpa ili i na A̱sulazuva a dammai, n cawu ta̱ aɗangulu a ta'atsu. Ɗangula za ta̱ a̱tsuma̱ e le a na ma yuwan aciya a̱ wu.> >>

11 A̱vu Gadu ka̱ra̱ a̱ 'ya̱wa̱ ya̱ Da̱wuda u damma yi, <<Mpa ili i na A̱sulazuva a dammai, <Ɗangwa za na yuwan nuwu. 12 Ko vu ɗangula a'wan a ta'atsu ambulu, ko woto ta'atsu na n'yuwatan ma̱ wu mo kototo wu na̱ matsun me pe'eni me e le, ko rana ta'atsu ma matsun me pe'eni ma̱ A̱sulazuva, na̱ mɓa̱la̱ a̱tsuma̱ e iɗa, oɓolo na̱ malingata ma̱ A̱sulazuva o kototosu suru pasu va Isra'ila.> To, gogo vu yuwan majiyan vu damma mu adama a na ma̱ tsura̱ u usuwu wi ili i na ma ka̱mbuwa̱ za na lyungu numu.>>

13 A̱vu Da̱wuda damma Gadu, <<N uwa ta̱ uta'atsu. Lyawa mu n riya̱ e ekere A̱sulazuva, adama a na iliyali ya̱ yi i ta̱ a̱bunda̱, amma she vu lyawa mu a na ma̱ riya̱ e ekere a ama wan.>>

14 A̱vu A̱sulazuva a lyungu na̱ mɓa̱la̱ a̱ a̱tsuma̱ e iɗa ya Isra'ila, A̱vu ama ukpakukupa kupocindere (70,000) a̱ riya̱ a̱vu a̱ kuwa̱. 15 A̱vu A̱sula̱ a̱ lyungu malingata a na wo o kototo Urishelima. Amma a mantsa ma na malingata'a ma̱ a̱ ri a yuwusan tsu ndolo, a̱vu A̱sulazuva e ene, reve u ɓa̱li yi adama e meleshe a̱vu u damma malingata za na da̱na̱i o kototosu wa ama'a, <<Urawa ta̱ ne! Vu tawa e ekere a̱ wu.>> Malingata ma̱ A̱sulazuva u da̱na̱ ta̱ lo mishin o osoroto a Aruna vuma va Jebusiya.

16 Ana Da̱wuda 'ya̱sa̱in e esu a̱ yi zuva a̱vu we ene malingata ma̱ A̱sulazuva mishin e memere ma zuva ni iɗa, na̱ matsun me pe'eni ma̱ yi utalu o ukere wa̱ yi ucananu a̱ tyo Urishelima. Avu Dawuda oɓolo na̱ mbara, wotowu ni itana ya̱ a̱tsuma̱la̱ngu, a̱ riya̱ nu urewesu u le uka̱ɗa̱ta̱wu e iɗa. 17 Avu Da̱wuda damma A̱sula̱, <<Ashe a̱mu ɗa n dammai e kece a̱soja o uvon shi? A̱mu ɗa za vu unusu waru za na yuwain iwuya. Ele nda ili i ro i ɗa shi amma ikyon. Nye i ɗa a yuwain? A̱sulazuva a̱ A̱sula̱ a̱ va̱, lyawa ukere wa̱ wu u cipa̱ a̱mu nu u'wa wa dada va̱, amma she vu lyawa mɓa̱la̱ nda a̱tsuma̱ a ama a̱ wu wan.>>

18 A̱vu malingata ma̱ A̱sulazuva ma damma Gadu, u damma Da̱wuda u ka̱ra̱ a gawan a na wa suwaa A̱sulazuva masa'a o osoroto a Aruna vuma va Jebusiya. 19 Avu Da̱wuda ka̱ra̱ a gawan nu udammu u na Gadu dammai na aala a̱ A̱sulazuva. 20 A mantsa ma na Aruna da̱na̱i a fabusa oroci a yitabo, reve u vadala we ene malingata, olobo a̱ na̱shi a̱ yi na a̱ da̱na̱i oɓolo na̱ yi reve a suma a pa'an. 21 Ana Da̱wuda rawai uba̱ta̱'a, ɗaɗa Aruna ka̱lyuwa̱i a̱vu we ene yi, a̱vu u lyawa o osoroto'o reve u kingyo elime a̱ Da̱wuda nu urewesu wa̱ yi a̱ tyo e iɗa.

22 A̱vu Da̱wuda damma yi, <<Vu wina mu upasu wo o osoroto a̱ wu adama a na ma suwaa A̱sulazuva masa'a, adama a na a tawa mɓa̱la̱ a̱tsuma̱ a ama. N ciga ta̱ vu wina ma̱ yi o una̱ wi ikebe ya̱ yi.>>

23 A̱vu Aruna damma Da̱wuda, <<Tara yi! Lyawa zagbain va̱ mogono ma yuwan suru ili i na i lobono niyi. Ka̱lyuwa̱, n ta ca inan adama a̱ kucci vu ukula̱tosu, na aɗanga a faba adama aɗanga no oroci a yitabo adama kucci vi ishina. Nda suru n ca wu ele ta̱.>>

24 Amma mogono Da̱wuda usu ta̱ Aruna, <<Ne ɗa shi, n ta tsula uba̱ta̱'a̱ o una̱ wi ikebe ya̱ yi. Ma̱a̱ 'ya̱wa̱a̱ A̱sulazuva ni ili i na i ri za va̱ wu shi, ko waru na ma ca kucci vu ukula̱tosu vi ili i na i tara numu ili shi.>>

25 Da̱wuda tsupa ta̱ Aruna zinariya na rawai ukunzuwu ukpakuta̱li (600) adama o uba̱ta̱'a̱. 26 Da̱wuda suwaa ta̱ A̱sulazuva masa'a lo, a̱vu u ca kucci vu ukula̱tosu na̱ kucci muwwulai. A̱vu u yuwan avasa a̱ tyo uba̱ta̱ wa̱ A̱sulazuva, a̱vu A̱sulazuva a̱ usu yi na akina diga zuva a̱ tyo masa'a ma̱ kucci vu ukula̱tosu.

27 A̱vu A̱sulazuva a yuwan adanshi na̱ malingata'a, a̱vu u ka̱mbuwa̱ matsun me pe'eni ma̱ yi a̱tsuma̱ e ibici ya̱ yi. 28 A mantsa mo ndolo, ana Da̱wuda enei A̱sulazuva a̱ usu ta̱ avasa a̱ yi o osoroto a Aruna za va Jebusiya, reve u ca kucci lo uba̱ta̱'a̱. 29 A mantsa'a Oogodo a agalaci a̱ A̱sulazuva za na Musa yuwain a̱tsumona, waru na̱ masa'a ma̱ kucci vu ukula̱tosu ma̱ da̱na̱ ta̱ uba̱ta̱ wa̱ a̱ga̱nda̱ a Gibiyon. 30 Amma Da̱wuda uwwa ta̱ wovon u na wa̱ 'ya̱wa̱ ɗe a na we ece A̱sula̱, adama a na u da̱na̱ ta̱ a uwwusa wovon u matsun me pe'eni ma malingata ma̱ A̱sulazuva.