1 Da̱wuda yuwan ta̱ a̱sa̱la̱ na̱ azagbain a̱soja a̱ yi, nan yali o ukpakukupa kupa na̱ nan yali ukpakukupa. 2 A̱vu u damma suru ama a Isra'ila a na o ɓolotoi,<<N na̱ u yuwan ɗu ta̱ ulobonu waru n na̱ a̱yi ɗa ifoɓi ya̱ A̱sulazuva A̱sula̱ a̱ tsu, lyawa tsu lyungu suru ikaka a̱ tyo ya akapi a ama a tsu aza a na a̱ ri pa zuzu na alanga a̱tsuma̱ o upasu wi iɗa ya Isra'ila, hali acina nan ganu na̱ nan Levi aza a na a̱ ri oɓolo na̱ ele a̱tsuma̱ e ilyuci i le nu uba̱ta̱ wa aguɓa, ana a̱ ta̱wa̱ oɓolo ukere na̱ a̱tsu. 3 Reve tsu ka̱mba̱toi Akpati a Nzuwulai A̱sula̱ uba̱ta̱ u tsu, adama a na tsu yuwan aɗa a̱ yi a mantsa mo tsugono tsa mogono Shawulu shi.>> 4 A̱vu suru oɓolo a ama a̱ usu a yuwan ne, adama a na a̱sa̱la̱'a̱ ulobono le ta̱.

5 Reve Da̱wuda ɓoloto ama a Isra'ila suru, diga o Uɗolu wa Shiho a̱tsuma̱ a Masar acina Lebo Hamat, a na a̱ ta̱wa̱a̱ na a Akpati a Nzuwulai A̱sula̱ diga Kiriyat Jeyarim.* 6 A̱vu Da̱wuda oɓolo na a ama a Isra'ila suru a̱ ka̱ra̱ a agawan a̱ tyo ya Ba'ala va Yahuda a̱tsuma̱ Kiriyat Jeyarim a na a̱ ta̱wa̱ na a Akpati a Nzuwulai A̱sula̱, za na a̱ tsu ɗe na a aala A̱sulazuva, za na a̱ shuwa̱i e memere me ikerobobi.*

7 A tara ta̱ Akpati a Nzuwulai A̱sula̱ diga o u'wa wa Abinada zuva vi ikeke i sa'avu vi inan, Uza na̱ Ahiyo ele ɗa aza a na a walai elime. 8 Da̱wuda oɓolo na̱ aza a Isra'ila suru waru a̱ da̱na̱ ta̱ a yuwusan ma̱za̱nga̱ nu ucira le suru elime A̱sula̱, ni ishipa ni igaraya na̱ kumburu na aganga na̱ mupalu m malapa na̱ wivulusa̱ wa avana.

9 A mantsa ma na a rawai o osoroto a Kidon, a̱vu Uza canana ukere wa̱ a̱yi adama a na wee reme Akpati'i adama a na na'an u shi ta̱ uta̱ɗa̱tsa̱. 10 A̱vu A̱sulazuva a yuwan upan na̱ Uza, a̱vu wu unai adama a na u canana ta̱ ukere wa̱ a̱yi uba̱ta̱ wa Akpati'i. Reve u kuwa̱ lo elime A̱sula̱. 11 Reve Da̱wuda yuwan upan adama a na upan wa̱ A̱sulazuva a̱cipa̱ yi Uza, hali acina ana'an nda uba̱ta̱'a̱ a̱ tsu ɗe yi ta̱ Pere Uza.

12 Da̱wuda da̱na̱ ta̱ a uwwusa wovon wa̱ A̱sula̱ o uranu u ndolo reve we ece, <<Cine ma a gura yuwan a̱vu n ta̱wa̱ na̱ Akpati a Nzuwulai A̱sula̱ uba̱ta̱ u va̱?>> 13 Adama o ndolo u gura tara Akpati a Nzuwulai a na wa̱ da̱na̱ oɓolo na̱ a̱yi a̱tsuma̱ lyuci va̱ Da̱wuda shi. Adama o ndolo, a̱vu tewetoyi o u'wa wa Obed Edom vuma va Gat. 14 Akpati a Nzuwulai a̱ da̱nu ta̱ pe o u'wa wa Obed Edom hali woto ta'atsu, reve A̱sulazuva a zuwaa u'wa wa̱ yi aba'un na̱ suru ili i na u ri na̱ a̱yi. *