1 Da̱wuda zuwa ta̱ azagbain a Isra'ila suru o ɓoloto a̱tsuma̱ a̱ Urishelima. A̱tsuma̱ e le a̱ da̱na̱ ta̱ na azagbain o gundo na̱ nan yali vo oɓolo a̱ a̱soja a na a yuwusaan mogono a̱ga̱nda̱ na̱ nan yali vu ukpakukupa kupa na̱ nan yali vu ukpaku ukpaku na azagbain a na a̱ tsu ka̱lyuwusa̱ itana ni iliyamunga i Mogono no olobo a̱ yi suru, na̱ mbara mu ukobu u mogono na ama o ukadu e iɗa'a na̱ a̱soja a na a gurai uvon suru.

2 A̱vu Da̱wuda Mogono 'yon mishin e elime e le a̱vu u damma, <<Uwwai nda, a̱ɗu a̱za̱ a̱ va̱ na ama a̱ va̱! N tara ta̱ o okolo a̱ va̱ na masuwa u'wa u wivuwun adama a akpati a nzuwulai a̱ A̱sulazuva, waru uba̱ta̱ u na A̱sula̱ a̱ tsu a zuwa anana a̱ yi, agba n yuwan ta̱ ifoɓi i na maa suwa yi.* 3 Amma a̱vu A̱sula̱ a damma mu, a̱vu ɗa za na aa suwaa mu u'wa'a shi, adama a na a̱vu za vu uvon ɗa, agba vo oco ta̱ mpasa ma̱ a̱bunda̱.

4 <<Amma suru na̱ ne, A̱sulazuva a̱ A̱sula̱ a Isra'ila, u ɗangwa mu ta̱ a̱tsuma̱ o umatsun u tsu a na mo o'wo mogono ma Isra'ila hali hali. Waru u ɗangula ta̱ ugundo wa Yahuda u yuwan tsugono, a̱tsuma̱ o u'wa wa Yahuda u ɗangula ta̱ umatsun wa dada va̱. Waru diga a̱tsuma̱ o olobo a dada va̱ u yo'ono ta̱ A̱sulazuva a na mo o'wo mogono e ekere a aza a Isra'ila suru. 5 A̱tsuma̱ o olobo a̱ va̱ suru waru, adama a na A̱sulazuva a ca mu ta̱ o olobo a̱bunda̱, reve u ɗangula Sulemanu a na wa kumba o ootogu o tsugono tsa̱ A̱sulazuva aciya aza a Isra'ila. 6 A̱vu u damma mu, <Ulobo wa̱ wu Sulemanu ɗa a suwaa mu u'wa nu ukowo wa̱ a̱yi, n ɗangula yi ta̱ a na wo o'wo ulobo u va̱, a̱mu waru mo o'wo dada va̱ yi. 7 N nu u lyuwa e eleme a yuwusan tsutoni nu udammu u va̱ na̱ wila̱ u va̱ cine wa yuwusan gogo, n ta zuwa tsugono tsa̱ yi tsa̱ shuwa̱ hali hali.>

8 <<Adama o ndolo gogo, elime a ama a Isra'ila a nda suru no oɓolo a ama a̱ A̱sulazuva, na̱ waru e elime a̱ A̱sula̱ a̱ tsu, i toni udammu na̱ wila̱ wa̱ A̱sulazuva a̱ A̱sula̱ a̱ ɗu, adama a na ya gura usa iɗa i sa'ani i nda hali i lyawaa limatan va̱ a̱ca̱pa̱ wo o'wo le agadu hali hali.

9 <<A̱vu waru ulobo u va̱ Sulemanu, vu reve A̱sula̱ a nkaya ma̱ wu vu yuwan yi a̱ga̱nda̱ no okolo a̱ ta̱ oɓolo nu ucigu wo okolo. Adama a na A̱sulazuva e tse ene ta̱ okolo suru, waru u reve ta̱ ifoɓi na̱ majiyan mo okolo. Amma n na̱ vu vadalaa yi ucina̱, u ta̱ gba a 'yuwan wu hali hali. 10 Vu reve vu tara ta̱ ili ya nda ekere e re. A̱sulazuva a ɗangula wu ta̱ a na vaa suwaa yi A̱a̱'isamapaɗa u'wa wa̱ yi. Vu kaɓa asuvu vu yuwan ulinga'a.>>

11 A̱vu Da̱wuda ca Sulemanu ifoɓi yu ukobu wu u'uwata wa̱ A̱a̱'isamapaɗa'a na̱ saa va̱ yi, na aza a asula e izuwa ya̱ yi na asula a zuva na asula a̱ a̱tsuma̱ nu uba̱ta̱ wa akiza u matara mo ume mo unusu. 12 A̱vu u ca yi ifoɓi suru yi ili i na i ri niyi o okolo, adama o ukowo wa̱ A̱a̱'isamapaɗa a̱ A̱sulazuva na̱ suru asula a na a̱ ri uka̱nda̱ruwu na̱ yi, na adama e izuwa ya̱ A̱a̱'isamapaɗa a̱ A̱sulazuva na asula e izuwa yi itana yu une'e i na a tawayi A̱sulazuva. 13 A̱vu u ca yi udammu wi ili i na waa yuwan adama a wuɓatsu u nan ganu na̱ nan Levi. Waru u damma ta̱ Sulemanu suru linga na a yuwan a̱tsuma̱ a̱ A̱a̱'isamapaɗa a̱ A̱sulazuva, oɓolo ni itana i na aa yuwan ulinga ne ele pe. 14 A̱vu Da̱wuda ca a̱bunda̱ o ume u zinariya u na aa yuwan ulinga ne ele uba̱ta̱ u na a yuwan na̱ zinariya. Nu ume u azurufa vu uba̱ta̱ u na a yuwan ulinga na̱ azurufa adama a yuwan cu'un vi itana suru adama a̱ a̱ga̱nda̱. 15 Nu ume u zinariya u na a yuwan ulinga na̱ a̱yi a wisawatan u zinariya vi ifitila, ni ifitila'a, nu ume u zinariya u wisawatan suru ni ifitila i le, nu ume u azurufa u wisawatan u fitila u azurufa suru ni ifitila'a, o una̱ wu ulinga u wisawatan suru. 16 Nu ume wa apada a zinariya za mazuwa mo o opopofu a na a tawai, nu ume u azurufa u na a yuwan apada a azurufa. 17 Nu ume u zinariya can na a yuwaan ikune ya akatsu, na akwanu na ara'atsu, nu ume u zinariya u na a yuwan aakwanu a zinariya, nu ume u azurufa u na a yuwan aakwanu a azurufa suru, 18 nu ume u zinariya u na a yuwan masa'a mo ukula̱tosu wi ili i ma̱guru. Avu waru u ca Sulemanu ifoɓi i zinariya na wa yuwan ikerobobi i zinariya i na i tsu ba̱ruwa̱ evelu na a palaa Akpati a Nzuwulai a̱ A̱sulazuva. 19 A̱vu Da̱wuda damma Sulemanu, <<Ili i nda suru n ta̱ ne ele uɗanu a na a ca numu diga e kere A̱sulazuva, waru u ca mu ta̱ urevu wi ifoɓi wi ili i nda suru.>>

20 A̱vu Da̱wuda damma ulobo wa̱ yi Sulemanu, <<A̱vu de vu kapanu vi isawan nu ucira, a̱vu vu yuwan ulinga'a. She vu uwwa wovon wan gba vu kuɗa okolo wan, adama a na A̱sulazuva A̱sula̱, A̱sula̱ a̱ va̱, u to oɓolo na̱ a̱vu. Waa vari wu shi, ko u 'yuwain wu shi, hali she nu ulinga wa̱ a̱ga̱nda̱ wa̱ A̱a̱'isamapaɗa a̱ A̱sulazuva o koto. 21 Wuɓatsu u nan ganu na̱ nan Levi u ta̱ lo ufoɓu adama o ulinga wa̱ A̱a̱'isamapaɗa A̱sula̱, waru za na cigai na gurai ulinga wu ukere u ta kamba wu a̱tsuma̱ o ulinga'a suru. Azagbain na akapi a ama a ta yuwan tsutoni nu udammu wa̱ wu suru.>>