1 Roben ɗa mawun mo ufaru ma Isra'ila, amma a mantsa ma na uvon yi a̱a̱ga̱da̱ na̱ ka va Dada va̱ a̱ yi a na u zuwai, a̱vu u lamba agadu a̱yi a̱ nden n mawun mo ufaru a̱vu a ca Isuhu mawun ma Isra'ila, adama o ndolo e kecei a̱tsuma̱ a̱ muwun mo o ufaru shi,* 2 Ko na wo o'woi Yahuda la'a ta̱ a̱za̱ yi ucira suru, agba za na a yuwan tsugono tsu uta̱ ta̱ diga ya̱'a̱ yi, suru na̱ ne agadu a mawun mo ufaru ma̱ da̱na̱ ta̱ za va Isuhu.*

3 Olobo a̱ Roben ulobo wu ufaru wa Isra'ila ele ɗa:

Hano na̱ Palu na̱ Hezeron na̱ Karmi.

4 Olobo a̱ Juwe ele ɗa:

Shemaya na̱ Gog na̱ Shimai 5 na̱ Mika na̱ Reyaya na̱ Ba'al 6 na̱ Bera za na mogono Tiglat Filesa ma Asuriya ma tarai a̱ tyo tsugbashi. Bera zagbain ɗa da̱na̱i a̱tsuma̱ o ugundo wa̱ a̱za̱ a̱ Roben.

7 Mpa nda ala a mmaci le nu gundo le, na̱ limatan le a mantsa me le.

Yeyiyel ɗa da̱na̱i zagbain, waru a̱ da̱na̱ ta̱ fo na̱ Zakariya 8 na̱ Bela ulobo wa Aza na̱ Shema ulobo wa Juwe. A̱ da̱nu ta̱ upasu wa Arowa a̱ tyo Nebo na̱ Ba'al Meyo. 9 U da̱nu ta̱ upasu wa asana acina ukosu wa̱ a̱tsumona za na da̱na̱i upasu wu Uɗolu wi iɗa ya Yufiriti, adama a na iliyamunga i le i da̱shishi ta̱ a̱bunda̱ a̱tsuma̱ Giliyadu. 10 A mantsa mo mogono Shawulu a̱za̱ a̱ Roben a yuwan ta̱ uvon na aza a Hagara, a̱vu o kototo le, a̱vu a̱ da̱nu pe a̱tsuma̱ e iɗa i le acina suru nda̱na̱ta̱ ma asana wa aza a Giliyadu.

11 Ugundo wa Gadu a̱ da̱nu ta̱ upasu wu ugana wa̱ a̱za̱ a̱ Roben a̱tsuma̱ e iɗa ya Bashan, hali acina Saleka.

12 Juwe ɗa da̱na̱i zagbain na̱ Shafam za va ire na̱ Yanai na̱ Shafa a̱tsuma̱ a Bashan.

13 Mmaci n le na̱ limatan le ɗa: Mika na̱ Meshulam na̱ Sheba na̱ Yorai na̱ Yakan na̱ Ziya na̱ Eba ele ɗa aza a cindere goon.

14 Ele nda e le ɗa Olobo Abihayi ulobo wa Huri ulobo wa Yarowa ulobo wa̱ Giliyadu ulobo wa Mika ulobo wa̱ Yeshishai ulobo wa Yado za na a̱yi ɗa ulobo wa̱ Buz.

15 Ahi ulobo wa Abidiye, mawun ma tsukaya ma Guni za na da̱na̱i zagbain vu gundo le.

16 Aza a Gadu a̱ da̱nu ta̱ Giliyadu a̱tsuma̱ o upasu wa Bashan na̱ mulyuci n na n ri uka̱nda̱ruwu ne ele, na̱ suru iɗa ya aguɓa ya Sharon hali acina ukosu wa̱ yi.

17 A ɗana ta̱ suru ili i ndolo a̱tsuma̱ a adanshi o ucuwusan a mantsa mo tsugono tsa̱ Yotam mogono ma Yahuda na̱ mogono Yerobowam ma Isra'ila.

18 Ugundo u nan Roben, na aza a Gadu, nu uɓatsulai wu ugundo wa Manase a̱ da̱na̱ ta̱ na̱ a̱soja ukpaku kupa amunga na̱ a̱za̱ a̱ na̱shi nu ukpakucindere na̱ kupota̱li (44,760) aza a na a̱ da̱na̱i ufoɓu adama o uvon, ali a ɗa a na a̱ da̱na̱i nu ucira lon, aza a na a gura ɓana a̱ra̱ga̱ na̱ matsun me pe'eni, aza a na a gura waru a yuwan ulinga ni ibata, aza a na a gurai uvon lon. 19 A̱vu a yuwan uvon na̱ Hagara na̱ Yetu na̱ Nafi na̱ Noda. 20 A zuwa ta̱ ucira u le uba̱ta̱ wa̱ A̱sula̱ reve a yuwan avasa uba̱ta̱ wa̱ yi adama u kamba le, a̱vu A̱sula̱ a uwwa avasa e le a̱vu u ca le ulyuwu wa aci e ekere a aza a Hagara na aza a na a̱ ri oɓolo ne ele suru. 21 A̱ pura̱ ta̱ iliyamunga ya Hagara arakumi ukpakukupa uton (50,000) ni ikyon ukpakukupa ure na̱ kupa uton (250,000) na̱ nloli ukpaku ure (2,000). A̱vu a̱ pura̱ ama ukpakukupa ukpaku (100,000) a̱ tyo tsugbashi. 22 Ama na̱ a̱bunda̱ a̱ kuwa̱ ta̱ adama a na uvo'on za va̱ A̱sula̱ ɗa. A̱vu a̱ da̱nu pe a̱tsuma̱ e iɗa i le acina mantsa ma na a̱ pura̱ nle a̱ tyo tsugbashi.

23 Uɓatsulai wu ugundo wa Manase wa asana a̱ da̱na̱ ta̱ a̱bunda̱ lon. A̱ da̱nu ta̱ a̱tsuma̱ e iɗa ya Bashan a̱ tyo Ba'al Hamon, hali a̱ tyo Seni masasan ma Hamon. 24 Mpa nda a ala a zagbain vu mmaci n le: Efe na̱ Ishi na̱ Eliyel na̱ Aziriye na̱ Irimiya na̱ Hodaviya na̱ Yadiyel. Aza a na a gurai uvon lon ɗa, a̱soja a na e revei ɗa azagbain a 'wa le. 25 Amma a̱vu a yuwan ulambu wa̱ a̱ɓula̱ a̱ tyo uba̱ta̱ wa̱ A̱sula̱ a nkaya n le, a̱vu e reme tsushakala uba̱ta̱ u musula̱ wa ama e iɗa'a, aza a na A̱sula̱ o kototo yi elime e le. 26 A̱vu A̱sula̱ a Isra'ila a zuwa mogono Pul va Asuriya Tiglat Filesa, u tara a̱za̱ a̱ Roben na̱ Gadu nu uɓatsulai wu ugundo wa Manase wa asana a̱ tyo tsugbashi. Reve u tara le a̱ tyo a̱ lyuci va Hala na̱ Habo na̱ Hara nu Uɗolu wa Goza, uba̱ta̱ u na a̱ ri acina ana'an nda.