2 Ni geni totolo geri Nsuseki, sabuwa Wurishelima, ma sonka dege bisi anya Mirikisi, Mirikisi shiriya yi kankye okeshe de su yi gyaga kyakyawu ma pekye de e gom nja minji yi. 3 Se Ni zi murinya daa yi beta nsori dege kingbolo solota: nkye, <<Kuzukam anya zunwa Mirikisi ma nja ntani yi! yaa zunwa nja su, sua ma ntani yi. Mirikisi nkiya yi yaama nja su, yaa kwa ma Mirikisi asu, 4 Mirikisi yaa shire su anwe a ndani asu. muntu yaa ma kuma gagaba ko beki siki ko kuka ko Genbeki, sobon wuri mbo rigye bise wo.>>

10 Aworo Mirikisi biya nja ni, Meleku Mirikisi la ni ta a kiya totolo dunsi nsu nyisa. E nana ni Wurishelima, totolo Geri Nsuseki, butu dege bisi ma sonka a kisi dege anya Mirikisi 11 ema yi asikye ni dereja Mirikisi. Totolo geri ni mayi asikye kankye dunsi nsu dereja, kankye jesipa, yaa yi asikye sere kankye gilasi. 12 E mani totolo golonwa de gyewe yi ni kopa gom sha bi, nja ni meleku gom sha bi a kowoni kopa. A kowoni kopa su rubuta seni kowoni zuriya gom sha bi ni Izireyila. 13 A kowoni keteri totolo geri mu eman kopa wuku, te ni anse kopa wuku, te ni nyema kopa wuku, te ni kudu kopa wuku, te ni arewa kopa wuku. 14 Golonwa ni totolo geri e mani kutiri laki gom sha bi, a siki kowoni daa su ma nseni yayamanki gom sha bi ni Timshiya Mirikisi.

22 De Ni kone, Ni geni laki Mirikisi a siki totolo geri ni ba, sobon Obagizi Mirikisi nsu yiko nja timshiya. 23 Totolo geri mu yaa bila asikye nana ko ni wonta ba, sobon dereja ni Mirikisi e shiya yaa ba yi asikye, nja Timshiya na ema kankye pitila yi.

1 Se meleku Mirikisi nana ni totolo riki ni leyi, de ma yi asikye kankye gilasi, de ma sonka dege kingbolo solota ni Mirikisi nja ni Yaa Timshiya ni 2 ma yi gudu a sisika turiki totolo geri. A kowoni keteri ni riki mu ema ni ntasi leyi, de ma yapu yaya son gom sha bi a shekera, ntasi ni yapu son daa a kowoni wonta; genya ntasi ni ema sobon worikye guru ntani durinya. 3 Ba mbodaa de ma ni arigbotu a totolo geri ni ba. Sede kingbolo solota ni Mirikisi nja ni Timshiya na yaa ma totolo geri ni, se nsu bunwa yi sua bowuta yi. 4 Sua geni pisika yi nja sua rubuta seni yi a baki gan su. 5 Sua sakye yi dederi ba, nseda yaa bila pitila gagaba ko asikye nana, sobon Obagizi Mirikisi yaa ma asikye su, nja sua yi solota ni gbogbo.

16 De yaama yomu, su yi memeri kesa kyakyawu de sua bila, woto bisi. Sobon yomu Mirikisi yaa zi kumnya de su sukwa yi Mirikisi asu ba, sobon Mirikisi gyala geri totolo sobon nsu.

22 Sede ku zo anya ogbo Siyona, totolo geri Mirikisi nsu leyi, de ma Wurishelima a bisi, nja anya de meleku dupu ni dupu tala yi peri siki. 23 Ku zo anya tala ni peri siki ni yaya Mirikisi ni pari de seni su rubuta a bisi. Ku zo anya ni Mirikisi, nsude yaa yi ntani guru shiriya, nja anya aworo ni ntani gangasi yaa ma dedeta. 24 Ku zo anya Yesu nsude sakisi a sisika mu nja Mirikisi de zo ni sabuwa seda, nja zini de nya de yi anikowori mbo kyakyawu, de pi zini ni Abila.

26 Sede Wurishelima de ma a bisi e ma yaya mase sari de ma ni yenshi, e shiya ma kankye amaa mu.

1 Yesu nkye,<<Kede dishiya ku e basi. Ku beigaskye nja Mirikisi; ku kwa beigaskye nja Ni. 2 A siki gizi Adaa na laki ma nyowa; nde e ma yomu aba, da Ni gye ku. Na te de ni gyala anya sobon ku. 3 A beyi de ni te gyala ku anya, Na zo de ni la ku te anya na, de kuma anya ni nja ni du.

11 Mma zo nseberi. Keyi mbode ki ma nshi nsori, sobon kede nseda e keleba lende ni nasara ke ba. 12 Na sa worede yi nasara de su ma mbo ka gizi ni Mirikisi na. Yaa saka butu bila siki yi ba. Na rubutu seni Mirikisi na nja seni kesa Mirikisi na a nki yi, wato sabuwa Wurishelima, de ma sonka dege bisi anya Mirikisi na; nja Naa rubuta sabuwa seni na nkyasu.

19 Nja nde nseda butu mbodaa dege siki takada mu, Mirikisi yaa la anya ni lobo ni ntasi leyi nja sua zunwa nja totolo Geri Nsuseki mu ba. mbode su rubuta a siki takada mu.