Reino dos céus

Cisimo ca vufuko vuakushueka

44 "Vumuene vua muilu vunapu ngue vufuko vuakushueka mu lihia, vuje omo muntu avuuana kaha avushueka naua ambahoni hakuvuahelela cendi aya nakukalandesa vioshe vije alinavio kaha alanda lije lihia.

Cisimo ca vusanga vua seho

45 "Naua Vumuene vua muilu vunapu ngue muntu uje muka kulandesa uje atonda vusanga vuaseho, 46 uje omo auana vusanga vumo vua seho yakama, kaha aya nakukalandesa vioshe vije alinavio kaha akavulanda.

Cisimo ca mbuto ya musalata

31 Kaha Yesu uavatelele cisimo cikuavo naua nguendi, "Vumuene vua muilu vunapu ngue nona ya mbuto ya musalata ije muntu uambatele nakukuna mu lihia liendi. 32 Yapua yaindende cikuma ku vimbuto vioshe, vuno honi omo ikola ikapu ciputa cakama na kukola kupua muti, nankuma tuzila va muilu vakeja nakutungila mashua ha mintango yauo."

Cisimo ca cimbaluila

33 Kaha Yesu uavatelele naua cisimo cikuavo nguendi, "Vumuene vua muilu vuapua ngue cimbaluila cije mpuevo uambatele nakucishingasanena ha lilonga haje hakele vinganja vitatu via vunga vua tiliku kuvanga noho vioshe viafutunukile."

Cisimo ca shaku

24 Kaha Yesu uavatelele cisimo cikuavo naua nguendi, "Vumuene vua muilu tuasa kuvusetekesa ngue yala uje uakuvile mbuto yacili mu lihia liendi, 25 vuno honi tele vantu vanakosa, citozi cendi uezile nakukuva shaku muje mu lihia lia tiliku, kaha uayile. 26 Omo ije tiliku yakolele nakuhaka vinona ambahoni naikeyo ije shaku yasholokele. 27 Kaha vaje vangamba vendi vezile kuli ikeye nakumuleka nguavo, ‘Muene nkuma ku uakunine lika mbuto yacili mu lihia liove ndi? Kaha cineja vati honi linga mukale naua na shaku?’ 28 Kaha uahandekele kuli vakevo nguendi, ‘Kuli citozi uje nalingi eci.’ Kaha vaje vangamba vendi vahandekele kuli ikeye nguavo, ‘Nkuma utonda linga tuye tukaitukulemo ndi?’ 29 Vuno honi uavakumbuluile nguendi, ‘Houe!’ Muomu muje mu mukaitukulamo ije shaku hamo mukatukuila kumo na tiliku. 30 Vieceleni vioshe linga vikole kuvanga noho ha ntsimbu yakuteja, kaha ha ntsimbu yakuteja njikaleka vaka kuteja nguange, ‘Tukulenimo tahi shaku muikute mikuta, kaha itsimikeni, vuno honi kungululeni tiliku nakuihaka mu cishete cange.’"

Yesu alumbununa cisimo ca shaku

36 Ambahoni Yesu uasezele civunga nakuya mu njivo kaha vandongisi vendi vezile kuli ikeye nakuhandeka nguavo, "Tulumbunuine cisimo ca shaku ya mu lihia."

37 Kaha uavakumbuluile nguendi, "Uoshe uje akuna mbuto yacili napu Muna Muntu. 38 Lihia likelio mavu, kaha mbuto ije yacili ilumbununa vana va Vumuene, kaha naije shaku inapu vana va muka vupi, 39 kaha uje citozi uje ua ikuninemo ikeye napu Satana. Kaha kuteja cikeco kuhua ca mavu, kaha vaka kuteja vakevo tungelo. 40 Ngue mujevene muvaka kungungulula shaku nakuitsimika na tuhia, mukemovene mu cikafua naku mamanusuilo a mavu. 41 Muna Muntu akatuma tungelo vendi, kaha vaka kunguluila hamo vije vikanehesa vupi navaje vakalingi vupi mu Vumuene vuendi, 42 nakuvombila mu litende lia tuhia, kuje vantu vaka lila nakulishumanga ku mazo 43 Ambahoni vaka vusunga vaka viakuma ngue litangua mu vumuene vua Ishavo, uoshe uje ali na matuitui ovue.

Cisimo ca vuanda vuakuta vantsi

47 "Naua Vumuene vua muilu vunapu ngue vuanda vua kuta vantsi vuje vuvanate mu cisali kaha vutsiha muyati uoshe ua vantsi, 48 omo vuashulile vamala vavukokelele ha ntunda kaha vatumamene nakuhangulamo vantsi vacili nakuvahaka mu mitonga yavo vuno honi vombilile vaje vakupihia. 49 Nankuma omu mukemo mucikafua naku mamanusuilo a mavu. Tungelo vakeja nakutepesa vaka vupi ku vaka vusunga, 50 nakuvombila mu litende lia tuhia, kuje vantu vakalila nakulishumanga ku mazo

Kuvuahelela ca vusunga

3 "Vakukuisula vaje vanapu vihutu mu cimbembesi,

muomu Vumuene vua Muilu vunapu vuavo."

4 "Vakukuisula vaje valinakulila,

muomu vaka vazembeleka!"

5 "Vakukuisula vaje valikehesa,

muomu vakasuana mavu!"

6 "Vakukuisula vaje vevua njala na mpuila muomu ya vusunga,

muomu vakakuta!"

7 "Vakukuisula vaje vali na cikeketima,

muomu navo vakavevuila cikeketima!"

8 "Vakukuisula vaje vanalele mu mitima,

muomu vakamona Njambi!"

9 "Vakukuisula vaje vaka kulinga ciyulo,

muomu vakavasana vana va Njambi!"

10 "Vakukuisula vaje va valinakupakesa muomu ya vusunga,

muomu Vumuene vua Muilu vunapu vuavo!"

11 "Munapu vakukuisula omo vantu vamishaula nakumipakesa nakuhandeka viuma vioshe via vipi via makuli hali yeni muomu yange." 12 Joleleni nakuvuahelela muomu vuana vueni vukapua vuakama cikuma muilu, muomu omu mukemo vantu vayandesele tunanguizi vaje vakeleko tele kanda yeni.

Iya uakama cikuma?

1 Ha ntsimbu ije vandongisi vezile kuli Yesu nakuhandeka nguavo, "Nkuma iya uakama cikuma mu Vumuene vua muilu?"

2 Kaha Yesu uasanene muanike nakumuhaka hakati kavo, 3 kaha uahandekele nguendi, "Muavusunga njihandeka kuli yeni nguange, kuvanga mutenguluke kupua ngue vanike, keti ngoconi kumukakovela mu vumuene vua muilu. 4 Uoshe uje alikehesa ikeye vavenia ngue ou muanike, ikeye napu uakama mu Vumuene vua muilu.

14 Vuno honi Yesu uahandekele nguendi, "Eceleni vanike vavandende veje kuli yange, keti muvavindike, muomu Vumuene vua muilu vunapu vuavo."

23 Kaha Yesu uahandekele kuli vandongisi vendi nguendi, "Muavusunga njihandeka kuli yeni nguange, cikapua ca cikalu kuli muka kufuka kukovela mu Vumuene vua muilu. 24 Njimileka naua nguange, ca casi kamelu kuhita mu lisho lia nguya, kupulakana muka kufuka kukovela mu Vumuene vua Njambi."

25 Omo vandongisi vovuile eci, valikomokelele cikuma, nakuhandeka nguavo, "Kaha iya honi akovoka?"

26 Vuno honi Yesu uavatalele nakuhandeka kuli vakevo nguendi, "Eci cacikalu ku vantu vuno honi kuli Njambi vioshe viapua viaviasi."

5 Ivuilileni, vamuanetu vanjazanga. Nkuma Njambi kahanguile vaje vakuhutua ha mavu kupua vaka kufuka mu lutsilielo nakusuana vumuene vuje vuakulahesele vaje vamuzanga ndi?

Kunjamizivukile

21 "Keti muntu uoshe uje ahandeka kuli yange nguendi, ‘Muene, Muene,’ akakovela mu Vumuene vua muilu, vuno honi kuvanga lika uje alinga cizango ca Tate uje ali muilu.

19 Nankuma uoshe uje kononoka cipue koma kakandende kaku mashiko aua kaha acilongesa na vakuavo naua linga vacilinge kaha vakamutumbula uamundende mu Vumuene vua Muilu, vuno honi uoshe uje aniunga na kulongesa mashiko aua vakamutumbula uakama mu Vumuene vua Muilu. 20 Nankuma njimileka nguange, nga vusunga vueni kuvupulakana vusunga vua valongisi va mezi a lishiko lia Mosesa na Vafaliseho, kaha kumuka kovela mu Vumuene vua Muilu.

9 Lombeleni ngueni,

‘Tatetu uli muilu,

Valemese lizina liove,

10 Vumuene vuove vuije,

Cizango cove vacilinge hano ha mavu, ngue muje vacilinga muilu.

Kuambulula ca Yiuano muka kumbuitika

1 Mu matangua aje kuezile Yiuano muka kumbuitika, uakele nakuambulula mu mpambo ya Yundeya nguendi, 2 "Tengulukeni, muomu Vumuene vua muilu vuli muyehi."

17 Kuhuma ha ntsimbu ije Yesu uaputukile kuambulula nguendi, "Tengulukeni ku vipi vieni, muomu Vumuene vua muilu vuli muyehi."

7 Kaha oku muli nakuya ambululeni ngueni, ‘Vumuene vua muilu vuli muyehi.’

11 Njimileka nguange vavengi vakeja, vakahuma mu ngangela na mu kangombe kayambi, kaha vakatumama ku ciuano hamo na Avilahama, na Isake, na Yakomba, mu Vumuene vua muilu,

11 Muavusunga njimileka nguange, hakati ka vaje vanasemuka ku mpuevo naumo uahi uakama nahumuho kupulakana Yiuano muka kumbuitika, vuno honi uoshe uje alikehesa mu Vumuene vua muilu napu uakama kupulakana ikeye. 12 Kuhuma ku matangua a Yiuano muka kumbuitika kuheta kulelo lino, Vumuene vua muilu vunayanda cikuma kaha vantu vakukaluua mitima vanavuambata nampindangano.

28 Nankuma tuyeni tutsantsele ha kutambula vumuene vuje kuvue kuninganga, kaha honi tuyeni tulambuile kuli Njambi kulemesa cije casa kutambula na kasingimiko na liova, 29 muomu Njambi yetu uapua tuhia tuakunongesa.

10 Nankuma, vamuenetu, pangeni na nzili yoshe linga mumuese kusana na kuhangula ceni, muomu nga mulinga eci kaha kumukahilukila munima, 11 nankuma vakamitambula muacili mukukovela mu vumuene vua ya yaye vua Muene uetu na Muyoyesi Yesu Kilistu.

18 Muene akanjovola ku via vipi vioshe nakunjohiela muomu ya vumuene vuendi vua muilu. Kuli ikeye kukale vumpau ku miaka yoshe ya yaye. Ameni.

Vufuko vua muilu

32 "Keti muvue liova yeni vutanga vuavundende vua vampanga, muomu Ishueni navuahelela kumihana Vumuene.

5 Munapande kuzivuka ngueni uoshe alinga vupangala, cipue muntu ua mazilo cipue ua lizangamena kakasuana Vumuene vua Kilistu novu vua Njambi. Uoshe alinga lizangamena alemesa tumponia.