A volta de Jesus

2 मेरे बाजेरे घरे मां बड़े कमरेन, अगर न भोथी त अवं तुसन सेइं ज़ोथो, किजोकि अवं तुश्शे लेई ठार तियार केरने च़लोरोईं। 3 अगर गेइतां तुश्शे लेई ठार तियार केरि त वापस एइतां तुसन एप्पू सेइं साथी नेलो, ताके ज़ैड़ी अवं भोल्हो तुस भी तैड़ी भोथ।

9 एना गल्‍लां ज़ोनेरां पत्ती यीशु तैन केरे सामने हेरते-हेरते परमेशरे तै सुर्गे जो नियो, ते बिदलारां तै तैन केरे एछ़्छ़न करां छ़ुपाव। 10 ज़ैखन तैना यीशुए अम्बरे मांजो गांतो तकने लगोरे थिये, त अचानक, दूई मड़द ज़ैन छ़ित्तां लिगड़ां लग्गोरां थियां तैन कां एइतां खड़े भोए। 11 ते ज़ोने लगे, "हे गलीली मड़दव तुस खड़खड़े अम्बरेरे पासे कुन तकने लगोरेथ? एहे यीशु ज़ेन्च़रे तुश्शे सामने परमेशरे, सुर्गे मांजो नियो, ज़ेन्च़रे तुसेईं सुर्गे मांजो गांतो लाहोरोए तेन्च़रे फिरी एइतो लाहेले।"

20 ज़ै इन गल्‍लां केरि गवाही देते, तै इन ज़ोते, "हाँ, अवं जल्दी एजने बालोईं।" आमीन। हे प्रभु यीशु एई!

यीशु मसीहेरी कलीसियारे लेई गवाही

12 फिरी प्रभु यीशुए ज़ोवं, "अवं जल्दी एज्जेलो। अवं एज्जी राहोरोईं ज़ैन लोकेईं कियूं तैसेरे मुताबिक इनाम देनेरे लेई या सज़ाह देनेरे लेई।

बींझ़े राथ

36 "मेरे वापस एजनेरे दिहाड़ेरे बारे मां, या तैस वक्तेरे बारे मां कोई भी न ज़ाने कि तै कताली भोल्हो, सुर्गेरे स्वर्गदूते भी न ज़ानन त कने परमेशरेरू मट्ठू यानी अवं भी न ज़ैनी, पन सिर्फ मेरो बाजी परमेशर ज़ानते। 37 ज़ेन्च़रे नूहेरे ज़माने मां भोरू थियूं, तेन्च़रे मैन्हेरे मट्ठेरे एजनेरे वक्ते भोनूए। 38 किजोकि हड़ाई एजने करां पेइले भी लोक खाते पीते थिये, ते ड्लाह भी बनाते थिये, ते नूहेरे किश्ती मां गाने तगर एन सब किछ भोतू रावं। 39 तैन पतो भी न थियो कि कुन भोनेबालूए, इड़ी तगर कि हड़ाई अव ते तैनी सब किछ रुड़ेइतां नेव, ते मैन्हेरे मट्ठेरू यानी मेरू एजनू भी एरू भोनूए।

यीशुएरे वापस एजनेरे लेई तियार भोइ गाथ।

32 तैल्‍ला पत्ती, यीशुए तैन सेइं ज़ोवं, "मेरे वापस एजनेरे दिहाड़ेरे बारे मां, या तैस वक्तेरे बारे मां कोई भी न ज़ाने कि तै कताली भोल्हो, सुर्गेरे स्वर्गदूते भी न ज़ानन त परमेशरेरू मट्ठू यानी अवं भी न ज़ैनी, पन सिर्फ मेरो बाजी परमेशर ज़ानते।

यीशु दुबारां एजनोए तियार भोथ

1 हे ढ्लाव ते बेइनव, इसेरी ज़रूरत नईं, कि वक्तन ते कालां केरे बारे ज़ेइस प्रभु यीशु वापस एज्जेलो तुसन किछ लिखू गाए। 2 किजोकि तुस एप्पू रोड़े च़ारे ज़ानतथ, ते ज़ेन्च़रे च़ोर राती एइते, तेन्च़रे प्रभुएरू दुबारां एजनू भोल्हु। 3 ज़ैखन लोक ज़ोले, "कि शान्तिए, ते कोई डर नईं," त तैन पुड़ अकदम विनाश एजनोए, ज़ेन्च़रे दोज़ींती पुड़ तकलीफ; ते तैना तैस मुसीबती करां न बच़ेले।

42 तुस बींझ़े राथ किजोकि तुस न ज़ानथ कि तुश्शो प्रभु केइस एजनोए। 43 पन याद रखा, अगर घरेरे मालिके पतो भोए कि च़ोर कताली एजनो, त तै बींझ़े बिशेथो ते अपने घरे च़ोरी न भोने देथो। 44 एल्हेरेलेइ तुस भी तियार राथ, किजोकि ज़ैखन तुसन शक भी नईं भोनी त मैन्हेरू मट्ठू यानी अवं एज्जी गानोईं।"

पापेरो मड़द मतलब विनाशेरू मट्ठू

1 हे ढ्लाव ते बेइनव, असन कां प्रभु यीशु मसीहेरे वापस एजनेरे बारे मां ज़ोनेरे लेई किछ आहे। तै वक्त एज्जेलो ज़ेइस अस तैस सेइं साथी मिलमेले। 2 इन सोचतां तुस परेशान न भोथ या तुश्शो दिल न घबराए कि प्रभुएरी दिहाड़ी पेइली एवरीए। किछ ज़ोई बटतन कि इन भविष्यिवाणी मां या सन्देशे मां या चिट्ठी मां तैन कां एवरू थियूं। 3 लोक ज़ैना इस बारे मां झूठी गल्‍लां ज़ोतन तैन पुड़ विश्वास न केरा। किजोकि यीशु मसीहेरे वापस एजनेरे पेइले, तै वक्त एज्जेलो ज़ेइस बड़े लोक परमेशरेरे खलाफ भोल्हे, ते फिरी अधर्मी मैन्हु बांदो भोल्हो। तै, तै आए ज़ै नाश भोनेरे लेई ठहरावरोए। 4 तै अधर्मी मैन्हु परमेशरेरी खलाफत केरेलो, ते तैन सब किछ ज़ैन लोक देबते सेमझ़तां आराधना केरतन, तै इन ज़ोलो ई अवं इन सेब्भन करां महान आईं। इड़ी तगर कि तै परमेशरेरे मन्दरे मां बिशतां अपनो आपे जो परमेशर ज़ोलो।

16 किजोकि प्रभु यीशु एप्पू सुर्गेरां एज्जेलो; ते ज़ोरे सेइं हुक्म देलो, तैस वक्ते प्रधान दूतेरी आवाज़ शुनोली, ते परमेशरेरी महिमारो नरशिंगो बज़ाव गालो, ते ज़ैना मसीह पुड़ विश्वास केरनेबाले मां मर्रन, तैना पेइले ज़ींते भोनेन। 17 तैखन अस ज़ैना ज़ींते बच़ोरे रहमेले, ते तैन सेइं साथी बिदलारी पुड़ निये गानेम, कि अम्बरे मां प्रभु सेइं मिलमेले, ते तैखन करां बाद अस सदा प्रभु सेइं साथी रानेम।

यीशुएरू दुबारां एजनू

24 तैल्‍ला पत्ती, यीशुए तैन सेइं ज़ोवं, "तैन दिहाड़न मां, तैस मुसीबतरे वक्तेरे पत्ती,

‘दिहाड़ो कालो भोइ गालो,

त चाँदनी लौ न देली,

25 त अम्बरेरां तारे बिछ़ड़ने लग्गेले,

त अम्बरेरी सैरी शेक्ति* हिल्‍लेली।’"

26 "तैखन लोक मैन्हेरे मट्ठे (यानी मीं) बड़ी शेक्ति त कने बड़ी महिमा सेइं साथी धेरती पुड़ जो बिदलारी मां एजते हेरेले। 27 तैखन अवं अपने स्वर्गदूतन सारी दुनियाई मां भेज़तां धेरतरे हर पासेरां अपने च़ुनोरे लोकन अकोट्ठे केरेलो।"

यीशु दुनियारो न्याय केरेलो

31 ज़ैखन मैन्हेरू मट्ठू यानी अवं, अपने महिमा मां अपने स्वर्गदूतन सेइं साथी एज्जेलो त अपने महिमारे तखते पुड़ बिशतां लोकन पुड़ राज़ केरेलो। 32 सैरी कौमां मीं कां अकोट्ठी भोल्ही, ते धर्मी लोक बुरे लोकन करां अलग किये गानेन, ज़ेन्च़रे पुहाल भैड्डन, छ़ेल्‍लन मरां अलग केरते। 33 ते अवं धर्मी लोकन सेइं ज़ैना मेरे देइने पासे भोल्हे, ते बुरे लोकन ज़ैना मेरे बांए पासे भोल्हे।

छ़ित्ते घोड़ेरो सुवार

11 फिरी मीं सुर्ग खुल्‍लू लाव; तैड़ी मेरे सामने छ़ितो घोड़ो थियो; ते तैस पुड़ अक सुवार थियो, ज़ै वफादार, ते झूठ न ज़ोए; ते ज़ैन परमेशरेरी नज़री मां सही आहे तैसेरे मुताबिक न्याय ते परमेशरेरे दुश्मन्न सेइं लड़ाई केरते। 12 तैसेरे एछ़्छ़ी अग्गरे लपरी ज़ेरि थी, ते तैने बड़ां ताजां लेवरां थियां; ते तैसेरू नवं तैस पुड़ लिखेरूए, तैसेरो मतलब सिर्फ तैए ज़ानतो थियो। 13 तैनी खूने मां डुबोरू लिगड़ लेवरू थियूं, तैसेरू नवं परमेशरेरू वचने। 14 ते सुर्गेरी सेना छ़ित्ते घोड़न पुड़ सुवारे; ते तैना छ़ित्ते ते साफ मलमल लेइतां तैस पत्ती पत्तीन। 15 ते कौमी-कौमी मारनेरे लेई तैसेरे ऐशी मरां अक तिख्खी तलवार निसतीए, ते तै लोंहेरे सोटे सेइं तैन पुड़ राज़ केरेलो, ते तै सर्वशक्तिमान परमेशरेरे बड़े परकोपेरी खालिस शराबी सेइं दाछ़ ढ्लेन्च़ेलो। 16 ते तैसेरां लिगड़न ते ज़ंघी पुड़ इन नवं लिखेरूए, "राज़ां केरो राज़ो ते प्रभुं केरो प्रभु।"

26 किजोकि अगर कोई मैन्हु मीं करां त कने मेरी गल्‍लन करां शरमाते, त मैन्हेरू मट्ठू यानी अवं भी तैस करां शरमालो। ज़ेइस अवं अपने बाजी केरि महिमा सेइं साथी त कने पवित्र स्वर्गदूतन सेइं साथी वापस एज्जेलो, त तेइस अवं तैस करां भी शरमालो।"

8 हे ट्लारव, ज़ैना गल्‍लां अवं हुन्ना ज़ोने लगोरोईं तैन नज़रानदाज़ न केरा, कि प्रभुएरी नज़री मां अक दिहाड़ी हज़ार सालन बराबरे ते हज़ार साल एक्‍की दिहैड़रे बराबर आन (तैना तैसेरेलेइ अक्‍कां ज़ेरे आन)। 9 किछ लोक सोचतन कि प्रभु अपनो वापस एजनेरो वाधे पूरे केरने मां च़िर लगोरो लाने। पन परमेशर एन्च़रे च़िर नईं लाने लगोरो, बल्के इसेरे बदले तै तुसन सेइं सबर लगोरो केरने। किजोकि तै न चाए कोई भी नाश भोए। पन तै चाते कि हर कोई अपनो मन बदले त कने गलत केरनू शारे ते तैस कां एज्जे। 10 पन मसीह पक्‍को वापस एज्जेलो, तै अचानक एज्जेलो ज़ेन्च़रे च़ोर अचानक एइते। तैस वक्त अम्बरे मां गरज़नेरी ज़ेरि शोर भोल्ही, ते अम्बर गाईब भोइ गालू। सब किछ ज़ैन अम्बरे मां आए, दिहाड़ो, चाँदनी, तारे सब अग्गी सेइं बिलकुल नाश भोल्हु, तैस दिहाड़े परमेशर न्याय केरनेरे लेई तैन सब किछ बांदू केरेलो ज़ैन लोकेईं इस दुनियाई मां कियोरूए।

11 एल्हेरेलेइ कि परमेशर इना सैरी चीज़ां पेक्‍की नाश केरेलो ज़ेन्च़रे मीं ज़ोवं, एल्हेरेलेइ तुसेईं पवित्र ज़िन्दगी ज़ीयोरी लोड़े ते अपनो आप परमेशरे सौंफोरो लोड़े। 12 ज़ेन्च़रे तुस तैस दिहैड़ी बलगने लगोरेथ ज़ेइस परमेशर दुनियारो न्याय केरने एज्जेलो, ते बड़ी कोशिश केरा कि तै दिहाड़ी जल्दी एजनेरे लेई। तैस दिहाड़े परमेशर अम्बरे अग्गी सेइं फुकेलो ते नाश केरेलो त कने अम्बरेरी सैरी चीज़ां अग्गरे गेर्मी सेइं गेलेली। 13 पन अस विश्वासी नंव्वे अम्बरे ते नंव्वे धेरती बलगने लगोरेम ज़ेसेरो वाधो परमेशरे कियोरो, ज़ैड़ी लोक परमेशरेरे इच्छाई सेइं ज़ीयेले।

27 ते ज़ेन्च़रे सेइं मैन्हेरू मरनू ते एक्‍की बार न्यायेरू भोनू पक्‍कुए। 28 तेन्च़रे सेइं मसीहे भी बड़े लोकां केरे पाप सैल्तां गानेरे लेई एक्‍की बार बलिदान भोव, ते दुबारां पापां केरू बलिदान देनेरे लेई नईं, बल्के तैन मुक्ति देनेरे लेई एज्जेलो, ज़ैना तैसेरे इंतज़ारे मां आन।