1 फिरी तैने मीं बिल्‍लौरेरे ज़ेरो अक चमकतो ज़िन्दगरे पैनेरो दरिया हिराव, ज़ै परमेशरेरे ते गबड़ेरे तखते करां निस्तां तैस नगरेरी सड़की तगर मझ़ामेई निस्तो थियो। 2 ते दरियारे इस पासे ते उस पासे, ज़िन्दगरो बुट थियो, तैस मां 12 किसमां केरे फल लगते थिये, ते तै हर महीने फलतो थियो; ते तैस बुट्टेरे पट्लन सेइं कौमां-कौमां केरे लोक बेज़्झ़ोते थी। 3 फिरी तैड़ी लानत न भोल्ही ते परमेशर ते गबड़ेरो तखत तैस नगरे मां भोल्हो, ते तैसेरे दास तैसेरी सेवा केरेले। 4 ते तैना परमेशरेरे आमने सामने लाहेले, ते परमेशरेरू नवं तैन केरे कुपाए पुड़ लिखोरू भोल्हु। 5 ते फिरी रात न भोल्ही, ते तैन दीयो ते दिहाड़ेरी ज़रूरत न भोल्ही, किजोकि प्रभु-परमेशर तैन लौ देलो, ते तैना हमेशा राज़ केरेले।

6 फिरी स्वर्गदूते मीं सेइं ज़ोवं, "इना गल्‍लां विश्वासेरे काबल ते सच़ आन, ते प्रभु ज़ै नेबी केरे आत्मा केरो परमेशरे, तैने अपने स्वर्गदूत एल्हेरेलेइ भेज़े, कि अपने दासन तैना गल्‍लां ज़ैन केरू जल्दी भोनू ज़रूरीए हिराए।"

7 प्रभु ज़ोते, "हेर, अवं जल्दी एजने बालोई, परमेशर तैन सेब्भन बरकत देते ज़ैना इस किताबरे सन्देशे पुड़ ध्यान देतन।"

8 अवं तैए यूहन्ना आईं, ज़ै इना गल्‍लां शुन्तो, ते लहतो थियो, ते ज़ैखन मीं शुनू, ते लाऊं, त ज़ै स्वर्गदूत मीं इना गल्‍लां हिरातो थियो, अवं तैस कां मथ्थो टेकने लाव। 9 ते तैने मीं सेइं ज़ोवं, "हेर, एरू न केर; किजोकि अवं तेरो, ते तेरे विश्वासी सैथी नेबी ते इस किताबरी गल्‍लां केरे मन्नेबालां केरो साथी दास आईं; परमेशरे कां मथ्थो टेक।"

10 फिरी तैने मीं सेइं ज़ोवं, "इस किताबरे भविष्यिवैनरे गल्‍लां केरो भेद छ़ुपेइतां न रख, किजोकि वक्त नेड़ोए। 11 ज़ै बुरू केरते, तै बुरू केरतो राए; ते ज़ै भिट्टो, तै भिट्टो बनोरो राए; ते ज़ै धर्मी, तै धर्मी बनोरो राए; ते ज़ै पवित्रे तै पवित्र बनोरो राए।"

12 फिरी प्रभु यीशुए ज़ोवं, "अवं जल्दी एज्जेलो। अवं एज्जी राहोरोईं ज़ैन लोकेईं कियूं तैसेरे मुताबिक इनाम देनेरे लेई या सज़ाह देनेरे लेई। 13 ‘अवं अलफा ते ओमेगाई, पेइलो ते आखरी, शुरुआत ते अन्त आई।’

14 "धने तै, ज़ै अपना लिगड़ां धोते, किजोकि तैस ज़िन्दगरे बुट्टे कां एजनेरो अधिकार मैलनोए, ते तै दारां केरे बत्तां गेइतां नगरे मां दाखल भोल्हो। 15 पन कुतरां, जैदू केरनेबाले, बदमाशी केरनेबाले, खून केरनेबाले, मूरती केरि पूज़ा केरनेबाले, हर कोई झूठेरो चाने बालो, ते कने झूठ बनानेबालो बेइर राले।

16 "मीं यीशुए अपने स्वर्गदूत एल्हेरेलेइ भेज़ो, कि तुसन अगर कलीसिया मां इन गल्‍लां केरे बारे मां गवाही दे, अवं दाऊदेरू ज़ील, वंश, ते झ़ेझ़रो चमकतो तारोई।"

17 परमेशरेरो आत्मा ते गबड़ेरी लाड़ी यीशु सेइं ज़ोतीए, "तू ज़रूर एई!" ते शुने बाले भी ज़ोन, "एई!" ज़ै ट्लिशोरो भोए, तै एज्जे ते ज़ै कोई चाए पानी ने ज़ैन मुफ्ते मां ज़िन्दगी देते।

18 अवं हेर एक्‍की ज़ै इस किताबरी भविष्यिवैनरी गल्‍लां शुनते गवाही देताईं, कि अगर कोई मैन्हु इन गल्‍लन मरां किछ बधाए, त परमेशर तैना आफतन ज़ैना इस किताबी मां लिखोरिन, तैस देलो। 19 ते अगर कोई इस भविष्यिवैनरी किताबरी किछ गल्‍लां कढे, त परमेशर तैस ज़िन्दगरे बुट्टे ते पवित्र नगरे मरां ज़ेसेरे बारे मां इस किताबी मांए, तैसेरो हिस्सो कढेलो।

20 ज़ै इन गल्‍लां केरि गवाही देते, तै इन ज़ोते, "हाँ, अवं जल्दी एजने बालोईं।" आमीन। हे प्रभु यीशु एई! 21 प्रभु यीशुएरो अनुग्रह परमेशरेरे लोकन सेइं साथी राए। आमीन।