1 ताकतबर स्वर्गदूतेरे ज़ोइतां झ़ाड़नेरां बाद, मीं सुर्गे मां बड़े लोकां केरि भीड़ उच्‍चे आवाज़ी मां इन ज़ोते शुनी,

"हल्‍लिलूय्याह*! मुक्ति, महिमा, शक्ति इश्शे परमेशरेरीए।

2 तैसेरी बडीयाई भोए किजोकि तैसेरे सारे फैसले सही ते ठीक आन।

तैने मुशूर वेश्यारो न्याय कियो तैसां दुनियारे लोक पाप केरनेरे लेई प्रभावित किये।

परमेशर तैस बदलो देलो किजोकि तैसारे ज़िरिये परमेशरेरे दास मारोरेन।"

3 फिरी दूइयोवं बार तैनेईं ज़ोवं,

"हल्‍लिलूय्याह! ते तैसेरे फुकोनेरो तू सदा च़लतो रालो।"

4 ते चोब्ही बुज़ुर्गेईं ते च़ेवरे प्रैणेईं परमेशरे कां मथ्थो टेको; ज़ै तखते पुड़ बिशोरो थियो, ते ज़ोवं, "आमीन! हल्‍लिलूय्याह!"

5 ते तैखन मीं कोई ज़ोते शुनो, ते परमेशरेरे तखते मरां अक आवाज़ आई, तैने ज़ोवं,

"तुस इश्शे परमेशरेरे दास आथ ज़ैना तैसेरी आदर केरतथ,

कुन निकड़े, कुन बड्डे, तुस सब तैसेरी तारीफ़ केरा।"

6 फिरी मीं बड़ी भीड़री, ते बड़े पैनेरी आवाज़ शुनी, ते गुड़नेरी ज़ेरि आवाज़ शुनी,

"हल्‍लिलूय्याह! कि प्रभु इश्शो परमेशर, सर्वशक्तिमान राज़ केरते।

7 एज्जा अस खुश ते मघन भोम, ते तैसेरी तारीफ़ केरम;

किजोकि गबड़ेरो ड्लाह पुज़ोरोए, ते तैसेरे लैड़ां अपनो आप तियार केरोए।

8 ते तैस साफ ते चमकदार महीन मतलब मलमल लानेरो अधिकार दित्तो,"

किजोकि तैस महीन मलमलेरो मतलब परमेशरेरे लोकां केरां धर्मेरां कम्मन।

9 ते स्वर्गदूते मीं सेइं ज़ोवं, "इन लिख, कि धन आन तैना, ज़ैना गबड़ेरे ड्लाहेरे धामी मां कुजेवरेन।" फिरी तैने मीं सेइं ज़ोवं, "इना गल्‍लां ज़ैना परमेशरे ज़ोई सच़ आन।" 10 ज़ैखन मीं शुनू, अवं ज़ै मीं सेइं गल्‍लां लगोरो थियो केरने तैसेरी आराधना केरनेरे लेई तैस कां झुको तैने मीं सेइं ज़ोवं, "मेरी आराधना न केर, तै परमेशरे ज़ेसेरी आराधना कियोरी लोड़े। अवं भी परमेशरेरो दास आईं, ज़ेन्च़रे तू त तेरे विश्वासी साथी आन ज़ैना यीशुएरो अपने प्रभुएरे रूपे मां इकरार केरतन।" ई सच़्च़ाई यीशुए बांदी कियोरी ज़ै लोकन शक्ति देती कि परमेशरेरे वचनेरू एलान केरन।

11 फिरी मीं सुर्ग खुल्‍लू लाव; तैड़ी मेरे सामने छ़ितो घोड़ो थियो; ते तैस पुड़ अक सुवार थियो, ज़ै वफादार, ते झूठ न ज़ोए; ते ज़ैन परमेशरेरी नज़री मां सही आहे तैसेरे मुताबिक न्याय ते परमेशरेरे दुश्मन्न सेइं लड़ाई केरते। 12 तैसेरे एछ़्छ़ी अग्गरे लपरी ज़ेरि थी, ते तैने बड़ां ताजां लेवरां थियां; ते तैसेरू नवं तैस पुड़ लिखेरूए, तैसेरो मतलब सिर्फ तैए ज़ानतो थियो। 13 तैनी खूने मां डुबोरू लिगड़ लेवरू थियूं, तैसेरू नवं परमेशरेरू वचने। 14 ते सुर्गेरी सेना छ़ित्ते घोड़न पुड़ सुवारे; ते तैना छ़ित्ते ते साफ मलमल लेइतां तैस पत्ती पत्तीन। 15 ते कौमी-कौमी मारनेरे लेई तैसेरे ऐशी मरां अक तिख्खी तलवार निसतीए, ते तै लोंहेरे सोटे सेइं तैन पुड़ राज़ केरेलो, ते तै सर्वशक्तिमान परमेशरेरे बड़े परकोपेरी खालिस शराबी सेइं दाछ़ ढ्लेन्च़ेलो। 16 ते तैसेरां लिगड़न ते ज़ंघी पुड़ इन नवं लिखेरूए, "राज़ां केरो राज़ो ते प्रभुं केरो प्रभु।"

17 फिरी मीं अक स्वर्गदूत दिहाड़े पुड़ खड़ो लाव, ते तैने बेड़ि आवाज़ी सेइं अम्बरे मां उडने बाले च़ुड़ोलन सेइं ज़ोवं, "एज्जा परमेशरेरे बड़े धामी मां शामल भोनेरे लेई अकोट्ठे भोथ। 18 ज़ैस सेइं तुस राज़ां, प्रधानां, ताकतबर लोकां, घोड़ां ते कने तैन केरे सुवारां, आज़ादा, गुलामां, निकड़े, बडे, सेब्भी लोकां केरू मास खाथ।"

19 फिरी मीं हैवान लाव ज़ै समुन्दरे मरां एवरो थियो, ते धेरतलरे राज़े ते कने तैन केरि सेना तैस घोड़ेरे सुवार ते तैसेरी फौजी सेइं लड़नेरे लेई अकोट्ठी लाही। 20 ते तै पेइलो हैवान ते तैस सेइं साथी तै झूठो नबी ट्लाव, ज़ैने तैसेरे सामने एरो निशान हिरावरो थियो, ज़ेसेरे ज़िरिये तैने तैना सारे लोक टपलाए, ज़ैनेईं तैस हैवानेरी छाप नेवरी थी, ते ज़ैना तैसेरी मूरतरी पूज़ा केरते थिये, इन दूईये ज़ींते तैस अग्गरे झीली मां छ़डे जे, ज़ै गन्धके सेइं बलतीए। 21 ते बाकी लोक तैस घोड़ेरे सवारेरी तलवारी सेइं ज़ै तैसेरे ऐशी मरां निस्सती थी मारे जे; ते च़ुड़ोलू तैसेरे मासे सेइं रेज़्ज़ी जेआं।