Ester 2

Bɛ sɩ̀ Esita bugyu

1 Gamaama gɛtɛ Egyu-dɩrɛ Herihesi woturu wʋ nʋ̀n wɔ fɔ, ɛ kʋna Fasiti wade gɛtɛ ɛ mɛ, ma ose gɛtɛ ɛ sɩ̀ ka da ma wo koro fɔ. 2 Ɛwʋ gɛ egyu-dɩrɛ bɛsaranyan gɛtɛ bɛ̀ gbɛma wɔ fɔ bɛ dɔ̀ alan, <<Ɩ yɛ taà ma bugiti bɛsʋgʋgyan-bi ma ɔmɩrɩ gɛtɛ bɛɛn nyɩ̀ bete tɩ tɛ Egyu-dɩrɛ. 3 Egyu ɛ̀ talɩ e tiri bɛndɩrɛbi ɛ sɩ̀ gɛtɛ baà ka bɛsʋgʋgyanbi ma ɔmɩrɩ fɔ be ye ntʋnkwaa fɔ powu baanɩ bɛ ba ditele-dɩrɛ Susa fɔ daanɩ, ɔkʋn gɛtɛ awɔ, egyu-dɩrɛ aa bɛnanɩ bɛ̀ sa fɔ. Ka bɛsʋgʋgyan ma ɔmɩrɩ fɔ sa aasaranyan Hegayi gɛtɛ be tiri aforobi gɛ ɛ̀ fʋrʋma ɛɛ nya bɛnanɩ boo koro fɔ gʋlɔ. Fɔ ɛ̀ɛ̀ yɛ bàà pɩna bɛsʋgʋgyan fɔ, fɔ ɛ̀ɛ̀ yɛ bàà nya boo koro bàà mɛ ɔmɩrɩ gepepe. 4 Fɔ àà tiri ɛsʋgʋgyan gɛtɛ ee di wɔ gʋnʋn fɔ mɛ egyu-nanɩ sere Fasiti gɩsɩrɩ.>> Egyu Herihesi e to amɩnlɛ fɔ ɛ sa, gɛ ɛ mɛ anlɛ gɛtɛ bɛ dɔ̀ wɔ fɔ.

5 Ɔkʋna wʋtɔkɔ fɔ Yuda-te ɛkɩ gɛtɛ e ye Benyamin wofoli waanɩ gɛ bee kpèlè wɔ alɛ Modekayi fɔ è si Susa ditele daanɩ. Wote n di Yari, gɛ wotu n di Simeyi, gɛ Simeyi wote n di Kisi. 6 Modekayi nyawɔ ɛ̀ fɩya ma bɛnɩ gɛtɛ Babilon wogyu Nebukadinesa e gye Yerusalem ditele daanɩ ɛ san gisela, ɔkʋna gɛtɛ e gye Yuda wogyu Yehoyakin bɩtà ɛ san Babilon ditele fɔ. 7 Fɔ Modekayi woteti wobi ɛkɩ gɛtɛ bee kpèlè wɔ alɛ Hadasa fɔ è si wakʋn, yema ɛn ma ɛtaawe gɛ ɛn ma ɛnaawe. Bè biri bee kpèlè wɔ alɛ Esita, e ye gʋsʋgʋgyan gepepe, gɛ Modekayi e ton wɔ anlɛ ɛwɔ gbagba wobi ɔya gɛtɛ Esita wote ma wɔna be ku fɔ.

8 Gɛtɛ bɛnɩ bɛ nʋn Egyu-dɩrɛ Herihesi wade ma wose gɛtɛ ɛ tɛ̀ fɔ, bɛ ka bɛsʋgʋgyan kpekpesi bɛ bɛ kʋla ditele-dɩrɛ Susa gɛ bɛ ka bɛ bɛ sa Hegayi gʋlɔ. Fɔ Esita mɔ ɛ̀ fɩya ma ɛbɛ. Bɛ ka bɛsʋgʋgyan nyabɛ powu bɛ sa Hegayi gɛtɛ ɛwɔ n tɛ nya egyu-dɩrɛ wo bɛnanɩ boo koro fɔ gʋlɔ. 9 Esita wade i di wɔ gʋnʋn gɛ e wùlà wɔ gutunkoro. Disere-kɩlɩn fɔ, e sere ɔpɩ gɛtɛ ɛɛ nya wo koro gepepe, gɛ ɛɛ tɛ wɔ anyan-dɩlɛ-kpara. Gɛ e tiri bɛsʋgʋgyan kwarankɩ e ye digyu-kpaara fɔ daanɩ gɛtɛ bɛɛ sʋma wɔ, gɛ ɛ ka ɛwɔ ma ɛbɛ ɛ ma sɩ̀ ɔkʋn-kparakʋn.

10 Esita ɛn dɔ̀ ɔkʋn gɛtɛ e ye abɛɛ wɔ dɩkpaara daade ɛ tɛ ɛkɩ, yema Modekayi ɛ sʋ wɔ ɛ sa. 11 Duwi-kamasɛ, Modekayi ɛɛ bʋn ɛ waran digyu-kpaara ɔkʋn gɛtɛ Esita ɛ̀ sa fɔ, fɔ ɛ̀ɛ̀ nya alɛ anʋn ntɛ mɛ wɔ, gɛ lan gɛ è si.

12 Pɛ bɛsʋgʋgyan nyabɛ baanɩ ɛkɩ èè wura osele ɛ san Egyu-dɩrɛ Herihesi wakʋn fɔ, wù di gɛtɛ èè werema bebon fwo-bɛnyɔɔ, gɛtɛ bɛ sɩ̀ bɛ alɛ, bɛ ka bɛ pɩna boo koro fɔ pɛ. Bɛ ka bebon kooron bɛ sʋrʋ olife bʋnɔ ma mire gɛ bɛ ka bebon kooron mɔ bɛ sʋrʋ bʋnɔ-sʋrʋlɛ ma ofèn. 13 Nkele mɔ, pɛ bɛsʋgʋgyan fɔ baanɩ ɛkɩ eè gyu ɛ san egyu-dɩrɛ wakʋn fɔ, wù di gɛtɛ bàà tɛ wɔ anyan gɛtɛ ee len powu, ye egyu-dɩrɛ bɛnanɩ bɔɔ dɩkpaara fɔ daanɩ. 14 Ɔgyɔlɔ fɔ, wù di gɛtɛ ɛ̀ɛ̀ tɔ ɛ san egyu-dɩrɛ wakʋn. Kere gɩ̀ kpa gagyɩgyan fɔ ɛɛ̀ tɔ e ye egyu-dɩrɛ dɩkpaara ɛ san egyu-dɩrɛ bɛnanɩ bɔɔ gɛsarakʋn-nyɔɔfɛ gaanɩ. Egyu-dɩrɛ wɔsaranyan Saasigasi n tɛ nya egyu-dɩrɛ bedima boo koro. Wun di gɛtɛ ɛ̀ɛ̀ nɩ san egyu-dɩrɛ wakʋn ɛ nya, sɩyɛɛ egyu-dɩrɛ gbagba n te len wɔ, fɔ ɛ ka wo diyere ɛ tɛ alɛ, bɛ ma kpèlè wɔ, pɛ fɔ, ɛ̀ɛ̀ ba.

15 Gɛtɛ ɔya wʋ nɩma wʋ tɛ Esita gɛtɛ è di Modekayi woteti Abiyali wobi gɛtɛ e ton wɔ anlɛ ɛwɔ gbagba wobi ɛ̀ɛ̀ san egyu-dɩrɛ wakʋn fɔ, en lila gɩnyankɩ. Hegayi gɛtɛ be tiri aforobi, gɛ ɛɛ nya egyu-dɩrɛ bɛnanɩ boo koro fɔ, gɛ e lila alɛ ɛ tɛ wɔ amɩnlɛ. Gɛ Esita e di ɛkamasɛ gɛtɛ e we wɔ fɔ gʋnʋn. 16 Egyu Herihesi wo bugyu buu gedi wʋʋ gɩkyan-kwarankɩfɛ giibon-fwofɛ gɛtɛ bee kpèlè Tebeti fɔ wanɩ gɛ bɛ ka Esita bɛ san ma wɔ, wo digyu-kpaara daanɩ.

17 Esita wade ɩ mɛ egyu-dɩrɛ ɔmɩrɩ ɩ da bɛnanɩ fɔ powu. Gɛ bɛsʋgʋgyan gɛtɛ bɛɛn nyɩ̀ bete fɔ powu baanɩ fɔ, Esita na di wɔ gʋnʋn gepepe da bekurumakyɛɛ. Okoro egyu-dɩrɛ ɛ ka digyu-koto e tin Esita, gɛ ɛ sɩ̀ wɔ bugyu e sere Fasiti bɩsɩrɩ. 18 Okoro egyu-dɩrɛ e kpèlè bɛnɩ ɔsɛ wuu gedi gɛtɛ ɛ̀ɛ̀ ka bʋma Esita diyere. Ɛ fɩna gʋlɔ e kpèlè wo gebù gɩɩ bɛnɩ powu, ma wɔ bɛndɩrɛbi powu. Egyu e tiri duwi ɛ sɩ̀ gɛtɛ bàà sara gɛtɛ bɛ kara mɛ gʋtʋn gɩfɩɩ fɔ powu gaanɩ. Gɛ ɛ kyɛ bɛ anyan anlɛ gɛtɛ wù di gɛtɛ egyu ɛ̀ɛ̀ tɛ.

Modekayi e to egyu-dɩrɛ ɛ ya

19 Ɔkʋna gɛtɛ bɛsʋgʋgyan gɛtɛ bɛɛn nyɩ̀ bete fɔ be tuma disere-nyɔɔfɛ fɔ, Modekayi è si egyu-dɩrɛ dɩkpaara diitunu. 20 Mɔ Esita ɛn dɔ̀ ɛnɩ n di ɛnɩ ade ɩkɩ ka da ma wɔ dɩkpaara dɩɩ bɛnɩ boo koro abɛɛ wo geyekʋn anlɛ gɛtɛ Modekayi ɛ dɔ̀ ɛ sʋ wɔ fɔ. Yema ɛ̀ bɔ ɛ̀ tɛrɛma Modekayi wade-wùlàlɛ anlɛ ɔkʋna gɛtɛ è di ebi gɛ è si wakʋn fɔ.

21 Ɔya gɛtɛ Modekayi è si egyu-dɩrɛ dɩkpaara diitunu ɛɛ dɩyɛ dʋkɔ fɔ, egyu-dɩrɛ bɛndɩrɛbi bɛnyɔɔ, Bigitana ma Teresi gɛtɛ be tiri bɛ aforobi fɔ, n tɛ dɩyɛ egyu-dɩrɛ wo dikwo diitunu. Bɛ ka owurufa egyu-dɩrɛ wo koro, gɛ bɛ mɛ onyun wo koro gɛtɛ baà wolo wɔ. 22 Mɔ Modekayi ɛ nʋn amɩnlɛ-kpen gɛtɛ bɛɛ ka fɔ, gɛ ɛ dɔ̀ egyu-dɩrɛ-nanɩ Esita, gɛ ɛwɔ mɔ ɛ ma dɔ̀ egyu-dɩrɛ ade gɛtɛ Modekayi ɛ dɔ̀ wɔ fɔ, fɔ waà wura bʋma Modekayi. 23 Gɛ gɛtɛ be gyu ade fɔ yaanɩ gɛ be we gɛtɛ ɩ̀ sa waanɩ fɔ, bɛ sa bɛsaranyan bɛnyɔɔ fɔ gigyen ɔŋʋʋ bɛ kyɔlɔga ma iyon. Bɛ ŋwara ade nyayɩ powu bɛ sa begyu-dɩrɛ boo koro gaade yɩɩ gɩkpa-dɩrɛ fɔ gaanɩ, egyu-dɩrɛ bʋnʋn.