1 Sawulo e di bɩkyan dikpilin ma fwo pɛgɛ ɛ mɛ egyu-dɩrɛ, gɛ e di bugyu Isareli bete boo koro bɩkyan akpilin anyɔɔ ma anyɔɔ.

2 Sawulo e tiri bɩtà bʋʋ bɛtàlɛ gbaa ma nkpɩn ton (3,000) e ye Isareli bete baanɩ. Ɛ yɛ bɛnɩ gbaa (2,000) bɛ sara ma ɛwɔ Mikimasi ditele ma Beteli wodon wʋʋ gɛtʋnkwaa gaanɩ. Gɛ nkpɩn ton (1,000) mɔ bɛ̀ sa ma Yonatan, Gibeya gɛtɛ wʋ̀ sa Benyamin gɛtʋnkwaa gaanɩ fɔ. Gɛ e birima bɛnɩ-kurumakyɛɛ fɔ ɛ tɩyɛma bɔɔ-ɩlɛ.

3 Yonatan ɛ tà bɩtà ma Filisiti bɩtà bʋʋtàlɛ gɛtɛ bè si Geba fɔ, gɛ e di boo koro, gɛ Filisiti bete bɛ nʋn ade fɔ. Gɛ Sawulo ɛ yɛ bɛ fʋn dɩkantan be silin gɛtʋnkwaa fɔ powu, gɛ bɛ dɔ̀ alan, <<Hebre bete ɩ nʋn!>> 4 Okoro Isareli bete powu bɛ nʋn ade fɔ alɛ, Sawulo e wolo Filisiti bɩtà bʋʋ bɛtàlɛ gɛtɛ bè si Geba fɔ, gɛlɛ wuu koro Filisiti bete bɛ ka owurufa Isareli bete boo koro. Gɛ Isareli bete be kpèlè getuma Sawulo wakʋn Giligali ditele daanɩ.

5 Gɛ Filisiti bete bɛ kʋla gɛtɛ bɛ̀ ma ta bɩtà ma Isareli. Bɛ kʋla tiiramisan ɛbɛ gbaa ma nkpɩn ton (3,000), ma abengyi yɩɩ bɛsaralɛ ɩgbaa isiyee (6,000), ma bɛnɩ dɩtɩnpan anlɛ ɛpʋ wɔ-ɩŋɛrɛ. Bɛ tɔ bɛ ma sara Mikimasi, gɛtɛ wʋ̀ sa Beti-Afen ofila wʋʋ gɛtakʋn wʋʋ gɩlan fɔ. 6 Gɛtɛ Isareli bete be we gɛtɛ boo geyelakʋn wʋ̀ ba ɔkɛma fɔ, gɛ bɔɔ bɩtà bʋʋ bɛtàlɛ boo koro gi gye bɛ fɔ, be serenti bɛ ma bu ataa-fwe yaanɩ, gɛ bɛkɩ mɔ be bu akantibi, ma afwe-dɩrɛ, ma ɩlɔkɔ yaanɩ. 7 Hebre bete fɔ bɛkɩ bɛ kaara Yodan getu bɛ san Gadi ma Gileyadi ntʋnkwaa baanɩ.

Sawulo ɛ wɔ Giligali, gɛ bɩtà bʋʋ bɛtàlɛ powu gɛtɛ bɛ̀ fɩya ma ɛwɔ fɔ gɩsaa gi gyu bɛ gɛ koro gɩ gbɛrɛ bɛ. 8 Sawulo e so dʋkɔbɛ awi kwarankɩ anlɛ gɛtɛ Samweli ɛ dɔ̀ fɔ, mɔ Samweli ɛn ba Giligali, gɛ Sawulo bɩtà bʋʋ bɛtàlɛ bɛ kya gɛyasɩ. 9 Gɛ Sawulo ɛ dɔ̀ alan, <<Ɩ ka gekuma gii gedi, ma olila wuu gedi yaanyan ɩ mɔma mɩ.>> Gɛ Sawulo ɛ tɛ gekuma gii gedi. 10 Gɛtɛ ɛ bɔ ɛ tɛ gedi fɔ e were fɔ, Samweli e bè gyu. Gɛ Sawulo e ye ɛ ma sa wɔ onyun.

11 Gɛ Samweli e lila wɔ alan, <<Anʋn gɛ a mɛ lɛ?>> Sawulo e tiri wuunyun alan, <<Gɛtɛ na we alɛ mɩɩn bɛnɩ bɛɛ yasɩ bɛ yɛ mɩ, gɛ awɔ mɔ an taa ba ɔya gɛtɛ a sɩ̀ fɔ, gɛ Filisiti bete mɔ bɛ bɛ kʋla Mikimasi fɔ, 12 na sa amɩnlɛ alɛ, <Nkele, Filisiti bete baà bɛ tà bɩtà ma nmɩ Giligali, gɛ mɩn lila Yahwe gutunkoro gii gewe.> okoro wʋ̀ nyɩ mɩ gɛ na tɛ Yahwe gekuma gii gedi fɔ.>>

13 Gɛ Samweli ɛ dɔ̀ Sawulo alan, <<A mɛ anyimapu-de. An ton Yahwe aa Wurubwarɛ wanyun-gyebi fɔ yaanɩ. Gengyi à daà ton yaanɩ fɔ, nafɔ ɛ̀ daà yɛ bugyu fɔ bàà wɔ awɔ ma aadu waanɩ wʋʋ bɛnɩ gakpaakpa Isareli. 14 Mɔ nkele, aa bugyu buu gedi bʋn nan kyɛrɩ. Yahwe e tiri ɛnɩ-fon gɛtɛ ɛwɔ gbagba è len wɔ ye woturu waanɩ gɛ ɛ mɛ wɔ egyegeyelɛ ɛ tɛ wɔ bɛnɩ, yema an di Yahwe wo-ise fɔ yii koro.>>

15 Ɛwʋ gɛ Samweli ɛ tɔ e ye Giligali gɛ ɛ bʋn ɛ da Gibeya gɛtɛ wʋ̀ sa Benyamin fɔ. Gɛ Sawulo ɛ kalan bɩtà bʋʋ bɛtàlɛ gɛtɛ be kuruma bɛ̀ sa ma ɛwɔ fɔ. Bɛ̀ ba nkpɩn bisiyee (600).

16 Waanɩ fɔ, Sawulo ma wobi Yonatan ma bɩtà bʋʋ bɛtàlɛ fɔ bɛ̀ sa Gibeya ditele, gɛtɛ dɩ̀ sa Benyamin gɛtʋnkwaa gaanɩ fɔ. Fɔ Filisiti bete mɔ bɛ kʋla bɛ̀ sa Mikimasi. 17 Filisiti bɩtà bʋʋ bɛtàlɛ gɛtɛ bee kpila anyan fɔ be yo akpen asiyee. Dikpen dɩkɩ dɩ da ma Ofira, gɛtɛ wʋ̀ sa ma Sula gɩlan fɔ, 18 dikpen dɩkɩ do dɩ dama Beti-Oron, gɛ dikpen-siyeefɛ fɔ dɩ da ma gɛtʋnkwaa fɔ gɩɩbalan, gɛtɛ wʋ̀ gbɛma Seboyim dɩtagba gɛtɛ wʋ̀ ten otonkuma fɔ.

19 Ɔya wʋtɔkɔ fɔ, Isareli gɛtʋnkwaa powu gaanɩ fɔ, ɛwɔrɔ ɛkɩ ɛn ma, yema Filisiti bete bɛ sʋ bɛ alan, <<Hebre bete, ɩ kara mɛ bedon abɛɛ buturunyan!>> 20 Okoro Isareli bete powu bɛ yɛ bɛɛ waran bɛ san gɛ Filisiti bete bɔɔ bɛwɔrɔ baakʋn bɛ ma lɔ bɔɔ bɩlɛlɛ, ma boo begyiga, ma baakyɔɔ, ma baawɔrɔnyan-kurumakyɛɛ. 21 Bè yo sɛkɛlɩ dibi akpen asiyee fɔ, akpen anyɔɔ n di bɩlɛlɛ, ma begyiga, ma akyɔɔ yɩɩ gɛlɔ yɩɩ gɩyɛ. Gɛ dikpen dɩkɩ mɔ n di awɔrɔnyan kurumakyɛɛ yɩɩ gɛlɔ gɩɩ gɩyɛ.

22 Okoro duwi gɛtɛ bɩtà fɔ baà sere fɔ, ɛkɩ ɛn ma Isareli bɛkpàlɛ fɔ baanɩ, gɛtɛ è de edon abɛɛ gɩtà fɩya ma Sawulo ma wobi Yonatan.

23 Ɛwʋ gɛ Filisiti bɩtà bʋʋ bɛtàlɛ dikpen dɩkɩ bɛ ma to osele gɛtɛ wʋ̀ dɔ wʋʋ fɔrɔ Mikimasi fɔ waanɩ be yela.