1 Nkele ɛsaranyan Samweli ɛ sʋma Yahwe Eli gatɩn. Awi ɩtɔkɔ yaanɩ fɔ, Yahwe wanyun-gyebi ma wade-tirilɛ-wùlàlɛ ɩn taa ba bilen-bilen.

2 Odente wʋkɩ, Eli ɛ̀ dɔ̀ ɔkʋn gɛtɛ ɛ̀ fʋrʋma ɛɛ dʋrɔ fɔ. Fɔ wɔ bʋnʋn bʋ yɔlɔ gɛtɛ ɛn taa ni we gepe. 3 Fɔ Samweli mɔ ɛ̀ dɔ Dikwo-dɩrɛ daanɩ, ɔkʋn gɛtɛ Dikola dɩɩ dɩdaka dɩ̀ sa fɔ. 4 Ɛwʋ gɛ Yahwe e kpèlè Samweli, gɛ e yera alan, <<Nte!>> 5 Gɛ e serenti ɛ san Eli wakʋn, gɛ ɛ dɔ̀ wɔ alan, <<Nyaamɩ! A kpèlè mɩ.>> Mɔ Eli ɛ dɔ̀ wɔ alan, <<Min kpèlè wɔ̀, biri san ma dʋrɔ!>> Gɛ e biri ɛ san ɛ ma dʋrɔ.

6 Gɛ Yahwe e biri e kpèlè alan,<<Samweli!>> Gɛ Samweli ɛ tɔ e biri ɛ san Eli wakʋn alan, <<A kpèlè mɩ, nyaamɩ!>> Mɔ Eli ɛ dɔ̀ wɔ alan, <<Miinbi min kpèlè wɔ̀, biri ma dʋrɔ.>> 7 Fɔ Samweli ɛn tɛ nyɩnla Yahwe gɛlɛ, yema Yahwe en te tiri ade anlɛ e wùlà wɔ. 8 Gɛ Yahwe e biri e kpèlè Samweli disere disiyeefɛ. Gɛ Samweli ɛ tɔ, gɛ ɛ san Eli wakʋn, gɛ ɛ dɔ̀ alan, <<A kpèlè mɩ, nyaamɩ wɔ lɛ.>>

Ɛwʋ gɛ Eli e we ɛ nyɩnla gɛtɛ, Yahwe n te kpèlè ɛsaranyan fɔ. 9 Okoro Eli ɛ dɔ̀ Samweli alan, <<Biri ma dʋrɔ, gɛ gengyi è biri è kpèlè wɔ̀ fɔ, dɔ̀ alan, <Yahwe tabʋrʋ, aasaranyan ɛɛ nʋn.> >> Okoro Samweli e biri ɛ ma dʋrɔ wɔ gɛdʋrɔkʋn. 10 Gɛ Yahwe e be yela, gɛ e kpèlè wɔ <<Samweli! Samweli!>> Anlɛ gɛtɛ ɛ̀ fʋrʋma ɛɛ mɛ fɔ.

Gɛ Samweli alan, <<Yahwe, tabʋrʋ, aasaranyan ɛɛ nʋn.>>

11 Ɛwʋ gɛ Yahwe ɛ dɔ̀ Samweli alan, <<Nya, n te len nan mɛ ade ɩkɩ Isareli bɛnɩ boo koro, gɛ ɛkamasɛ gɛtɛ ɛɛ̀ nʋ̀n yɩ fɔ, waà dʋrɔ onyun. 12 Duwi dɩtɔkɔ fɔ ade gɛtɛ na dɔ̀ na gyaga Eli ma wafʋrɩ yii koro fɔ, yaà ba waanɩ ye ade gyegeyelɛ ma sere iweremalɛ. 13 Yema na dɔ̀ Eli alan, nan tiira ɛwɔ ma wɔ dɩkpaara dɩɩ bɛnɩ giten gakpaakpa, yema ɛ̀ nyɩ̀ gɛtɛ wo bebi fɔ bɛ dɔ̀ mbusu wade bɛ gyaga nmɩ Yahwe miin koro, mɔ ɛn sʋ bɛ. 14 Wuu koro na kan ntam na dɔ̀ Eli dɩkpaara alan, <Eli dɩkpaara dɩɩ dɩpwɛ fɔ, nka gedi gɩɩ gɛtɛ̀ abɛɛ anyan yɩɩ gɛtɛ̀ gɛ baà ka bɛ kpa dɩ.> >>

15 Samweli ɛ dʋrɔ ma sere kere-kpalɛ, gɛ ɛ tɔ ɛ tana Yahwe Dikwo-dɩrɛ fɔ diitunu. Gɩsaa gi ton wɔ gɛtɛ ɛ̀ɛ̀ dɔ̀ Eli ade-welɛ gʋnʋn ŋɔrɔ gɛtɛ e we fɔ, 16 mɔ Eli e kpèlè wɔ gɛ ɛ dɔ̀ wɔ alan, <<Miinbi Samweli!>> Gɛ Samweli e yera alan, <<Nte!>>

17 Gɛ Eli e lila wɔ alan, <<Anʋn yaade gɛ Yahwe ɛ dɔ̀ wɔ̀? Kara ka yɩ bubwa mɩ. Gengyi à ka ade gɛtɛ ɛ dɔ̀ wɔ̀ bubwa mɩ fɔ, Yahwe eè tiira wɔ̀ giten.>> 18 Okoro Samweli ɛ dɔ̀ wɔ ade fɔ powu, gɛtɛ ɛn ka gɩnyankɩ e bubwa wɔ. Gɛ Eli ɛ dɔ̀ alan, <<Ɛwɔ n di Yahwe, yɛ wɔ ɛ̀ɛ̀ mɛ gɩnyan-kamasɛ gɛtɛ gɩ̀ kɔlɔ tɛ wɔ.>>

19 Samweli ɛ dan, gɛ Yahwe ɛ fɩya ma ɛwɔ, gɛ Yahwe wade powu gɛtɛ ɛ dama Samweli wo koro ɛ dɔ̀ ɛ sɩ̀ fɔ, ɩ ba waanɩ. 20 Wʋ yɛ Isareli powu, ye Dan ma sere Beeseba, be we bɛ nyɩnla alɛ Samweli è di Yahwe wɔtabʋrʋlɛ gbagba. 21 Yahwe ɛ̀ bɔ ee tiri koro e wùlà Silo ditele daanɩ, gɛ dʋkɔ gɛ e tiri koro e wùlà Samweli ka dama wanyun-gyebi fɔ yii koro.