1 Samweli 11

Sawulo e to Yabesi ditele ɛ ya

1 Ɔya wʋkɩ waanɩ fɔ, Amon-te gɛtɛ bee kpèlè Nahasi fɔ ma wɔ bɩtà bʋʋ bɛtàlɛ bɛ bʋn bɛ ma sʋ Yabesi ditele gɛtɛ dɩ̀ sa Gileyadi fɔ bɛ sa, gɛ ditele fɔ dii beteni powu bɛ dɔ̀ wɔ alan, <<Yɛ taà tà dikola ma awɔ, fɔ tàà sara aa gatɩn.>>

2 Mɔ Amon-te Naasa e tiri wuunyun alan, <<Nan tà dikola ma ɛyɩ, mɔ pɛgɛ nan tà dikola ma ɛyɩ fɔ, nan logoti eteni-kamasɛ wologyi wʋʋ gʋnʋn n tiri nan ka n fuli Isareli powu.>>

3 Gɛ Yabesi bɛndɩrɛ bɛ dɔ̀ wɔ alan, <<Tɛ tɩ awi kwarankɩ, fɔ taà sa bɛnɩ Isareli atele powu yaanɩ, gengyi tin wura etolɛ-yalɛ fɔ, taà ka koro tɩ tɛ wɔ̀.>>

4 Gɛtɛ bɛnɩ fɔ be gyu Gibeya, Sawulo ditele daanɩ, gɛ bɛ dɔ̀ ɔtʋn fɔ, ɛkamasɛ ɛ gbɛrɛ afala e wula. 5 Dʋkɔbɛ fɔ Sawulo e ye oli e be gyu ma bɛkwɔ, gɛ e lila alan, <<Anʋn n de bɛnɩ fɔ? anʋn yii koro gɛ bee wula?>> Gɛ bɛ dɔ̀ wɔ ɔtʋn gɛtɛ wu ye Yabesi bɛndɩrɛ baakʋn fɔ.

6 Gɛtɛ Sawulo ɛ nʋn ade nyayɩ fɔ, Wurubwarɛ Gifiye gi ba wo koro ɔkɛma waanɩ, gɛ ɛ ka owurufa gepepe. 7 Ɛ ka bɛkwɔ bɛnyɔɔ, gɛ e wolo bɛ, gɛ e belen bɔɔ gɩnan buru-buru, gɛ ɛ sa bɛnɩ alɛ, bɛ ka be silin Isareli gɩfɩɩ powu fɔ bàà dɔ̀ alan, <<Ɛnɩ gɛtɛ ɛn nan tɛrɛma Sawulo ma Samweli fɔ, anlɛ gɛ baà mɛ wɔ bɛkwɔ-teni.>> Yahwe geserenti gi gyu bɛnɩ fɔ baanɩ, gɛ ɛbɛ powu bɛ mɛ onyun-kɩlɩn gɛ be ye. 8 Gɛtɛ Sawulo ɛ kʋla bɛ Beseki fɔ, Isareli bete bɛ̀ ba asepekyi fwo-ton (300,000), gɛ Yuda bete bɛ̀ ba disepekyi dɩkɩ ma ɩgbaa-ton (30,000).

9 Gɛ bɛ dɔ̀ bɛnɩ gɛtɛ bɛ sa fɔ alan, <<Ɩ dɔ̀ Yabesi bɛnɩ gɛtɛ bɛ̀ sa Gileyadi fɔ alan, Gɩsa ofila ken-ken, baà to yɩ bɛ ya.>> Gɛtɛ bɛsalɛ fɔ bɛ ma dɔ̀ ade nyayɩ bɛ tɛ Yabesi bɛnɩ fɔ, wʋ mɛ bɛ ɔsɛ. 10 Ɛwʋ gɛ Yabesi bete bɛ dɔ̀ Amon bete fɔ alan, <<Gɩsa, taà ka koro tɩ tɛ yɩ, fɔ yàà mɛ tɩ anlɛ gɛtɛ ì len.>>

11 Duwi-nyɔɔfɛ fɔ Sawulo e yo wɔ bɩtà bʋʋ bɛtàlɛ fɔ akpen asiyee, gagyɩgyan-fuu gɩtɔkɔ. Gɛ Isareli bete be gyu Amoni bete boo gɛsarakʋn, gɛ be belen bɛ ayu ma sere ofila ken-ken. Ɛbɛ gɛtɛ be kuruma fɔ, bɛ yasɩ gɛtɛ an nan we bɛnyɔɔ bɛ̀ san.

Be to Sawulo bugyu bɛ sa

12 Isareli bɛnɩ be lila Samweli alan, <<Ɛnyan ɛbɛ na dɔ̀ alan, Sawulo ɛn nan talɩ ɛ mɛ egyu-dɩrɛ ɛ tɛ tɩ fɔ? Ɩ ka bɛ ɩ tɛ tɩ tàà wolo bɛ!>>

13 Mɔ Sawulo alan, <<Bɛ nan wolo ɛkɩ ǹdò, yema Yahwe e to Isareli ɛ ya.>>

14 Gɛ Samweli ɛ dɔ̀ bɛnɩ fɔ alan, <<Ɩ ba, taà san Giligali fɔ taà ma to Sawulo bugyu tɩ sa!>> 15 Okoro bɛnɩ fɔ powu bɛ san Giligali, gɛ bɛ ma to Sawulo bugyu fɔ bɛ sa Yahwe bʋnʋn. Dʋkɔ gɛ bɛ tɛ Yahwe olila wuu gedi. Gɛ Sawulo ma Isareli bɛnɩ powu be di ɔsɛ-dɩrɛ.